Sikis Rod Blong Lukaotgud Long Helt Blong Yu

Samting Ya i Hadwok Long Ol Pua Kantri

I NO isi long plante man tede blong stap klin, speseli long ol kantri we wota i doti mo i no gat ol gudfala tolet. Nating se i olsem, i impoten we yumi stap klin. Ol dokta oli talem se bitim stret haf blong ol pikinini we oli sik mo ded, oli kasem trabol ya from we ol bebet oli go insaed long bodi blong olgeta taem oli putum han blong olgeta we i doti i go long maot blong olgeta, mo taem oli tekem kakae no wota we i no klin. Yumi save blokem plante sik, speseli sitsitwota, sipos yumi folem ol advaes long wan buk blong United Nations Children’s Fund, nem blong buk ya Facts for Life.

1 Berem sitsit

Sitsit i karem plante bebet. Ol bebet ya oli save go long wota mo kakae blong yumi, no oli save fas long han blong yumi, no ol tul, no ples we yumi rerem kakae long hem. Long rod ya, oli save kasem maot blong yumi, nao yumi solemdaon olgeta mo yumi kam sik from. Beswan rod blong blokem ol bebet ya, i blong berem sitsit. Sitsit blong man i mas go long tolet no long wan hol. Meksua se i no gat sitsit blong anamol i stap klosap long haos, no long ol smosmol rod we man i wokbaot long hem, no long ples we pikinini i stap pleplei long hem.

Sipos i no gat tolet, yu mas berem sitsit kwiktaem. Yu no mas fogetem se sitsit i fulap long ol bebet we oli givim sik, hemia sitsit blong ol smosmol pikinini tu. Yu mas berem sitsit blong ol pikinini.

Klinim tolet oltaem. Sipos tolet i wan hol long graon nomo, yu mas kavremap oltaem. Sipos i wan prapa tolet, yu mas mekem wota i ron long hem afta we yu yusum.

2 Wasem han

Yu mas wasem han blong yu oltaem. I gud blong yusum sop no asis blong faea wetem wota, hemia bambae i karemaot ol bebet. I no naf blong wasem han long wota nomo, yu mas ravem tufala han blong yu wetem sop no asis blong faea.

I impoten blong wasem han blong yu afta we yu go long tolet no afta we yu waepem as blong pikinini. Mo tu, yu mas wasem han blong yu afta we yu tajem ol anamol, bifo we yu rerem kakae, mo bifo we yu givim kakae long pikinini.

Sipos yu wasem han blong yu oltaem, bambae yu no kasem ol wom we oli save givim sik long bodi. Ol wom ya oli smosmol tumas we yu no save luk olgeta wetem prapa ae blong yu. Oli stap long ol sitsit, pispis, wota we i stap olbaot long graon, graon we yumi wokbaot long hem, mo long mit we i no dan. Beswan rod blong blokem ol wom ya blong oli no go insaed long bodi blong yumi, i blong wasem han blong yumi. Mo tu, sipos yu werem savat no sus taem yu go long tolet, yu save blokem wom blong i no pastru long skin aninit long leg blong yu.

Plante taem, ol pikinini oli putum han blong olgeta long maot blong olgeta, taswe i gud blong wasem han blong olgeta oltaem, antap moa, afta we oli go long tolet mo bifo we oli kakae. Tijim pikinini blong wasem han blong hem wan, mo tijim hem se hem i no mas pleplei klosap long tolet, no klosap long ples we yufala i berem sitsit long hem.

3 Wasem fes blong yu evri dei

Blong mekem se ae blong yu i no kam soa, wasem fes blong yu wetem sop mo wota evri dei. Yu mas wasem fes blong ol pikinini tu. Fes we i doti i pulum ol flae, mo flae i karem bebet. Ol bebet ya oli save mekem ae i soa, mo oli save mekem man i blaen tu.

Jekem ae blong pikinini blong yu oltaem. Ae we i helti, hem i wetwet mo i saen. Sipos ae i drae, i red, i soa, no sipos wota i stap ron oltaem long ae blong hem, yu mas pasem hem long dokta no klinik.

4 Yusum klin wota nomo

Ol famle oli moa helti taem oli yusum klin wota no wota we i no gat bebet long hem. Ating wota blong yufala i klin sipos i kamaot long wota saplae, no sipos hem i springwota no wota blong wel we i no gat doti i go long hem. Wota blong reva, lek, no ol tang mo wel we oli no kavremap, ating i no klin tumas, be sipos yu boelem yu save kilim ol bebet long hem.

Yu mas kavremap ol wel. Ol baket, rop, mo botel we yu yusum blong kasem wota mo kipim, yu mas wasem olgeta oltaem, mo putum olgeta oli stapgud long wan klin ples, i no olbaot long graon. Ol anamol oli mas stap longwe long ples we famle i stap tekem wota long hem, mo oli mas stap afsaed long haos tu. I nogud blong yusum meresin blong kilim bebet, klosap long ples we yu stap tekem wota long hem.

Long haos, yu mas kipim wota long wan botel we i klin mo i gat led blong hem. I moagud sipos yu yusum wan dram we i gat tap long hem. Sipos i no gat tap, yu mas yusum wan klin kap blong karemaot wota long dram ya. Yu no mas tajem wota blong dring wetem han we i doti.

5 Blokem ol bebet blong oli no go long kakae

I gud blong mekem kakae i dangud, olsem nao yu kilim ol bebet long hem. I impoten blong mekem se mit mo faol i dangud. Ol bebet oli kam plante kwiktaem long kakae we i hot. Taswe, i gud blong kakae jes afta we kakae i dan. Sipos yu mas kipim kakae bitim tu aoa afta we hem i dan, meksua se hem i stap long wan ples we i hotgud no i kolgud. Mo tu, sipos yu wantem holem sam kakae i stap, yu mas kavremap. Olsem nao, ol flae mo bebet oli no save sidaon long hem. Bifo we yu kakae ol haf kakae we yu putumgud i stap, mekem i hot bakegen.

Titi i beswan melek blong pikinini mo i klin tu. Melek blong anamol we yu boelem no melek long paket we yu pem long stoa, i moagud i bitim melek we yu no boelem. I moagud we pikinini i no dring botel, be sipos yu mas yusum botel, yu mas klinimgud fastaem wetem wota we i boel finis. Ol botel ya oli save karem bebet we i givim sitsitwota. I moagud we mama i givim titi long pikinini, no i putum dring blong hem long wan kap we i klin.

Wasem ol frut mo ligim long klin wota. Hemia i impoten moa sipos pikinini i kakae ol samting ya taem oli no dan.

6 Sakemaot ol doti blong haos

Ol flae, kakros, mo rat, oli karem bebet. Ol anamol ya oli laekem blong kakae ol doti. Sipos trak blong doti i no pas long haos blong yu, fulumap ol doti long wan bigfala plastik evri dei, mo berem no bonem long faea. I no mas gat doti i stap olbaot long haos, no doti wota i stap long yad.

Sipos yu folem ol advaes ya oltaem, bambae hem i kam olsem haf blong laef blong yu. Ol advaes ya i no had mo yu no nidim bigfala mane blong folem, be bambae hem i lukaotgud long helt blong yu mo famle blong yu.

[Tok blong pija long pej 25]

Sipos i no gat tolet, berem sitsit kwiktaem

[Tok blong pija long pej 25]

Wasem han blong yu oltaem

[Tok blong pija long pej 26]

Ol famle oli moa helti taem oli yusum klin wota no wota we i no gat bebet long hem

[Tok blong pija long pej 26]

Wasem fes blong yu evri dei wetem sop mo wota

[Tok blong pija long pej 27]

Sipos yu wantem holem haf kakae we i dan blong yu kakae biaen, yu mas kavremapgud

[Tok blong pija long pej 27]

Evri dei yu mas berem no bonem ol doti