Tijim Kristi Blong Lavem God

GEL blong mitufala, Kristi, i bon long yia 1977. Smoltaem biaen, dokta i givim wan nogud nius long mitufala: Tufala sora blong Kristi i fasgud, mo tu, hem i gat wan sik (cerebral palsy) we i mekem se ol han mo leg blong hem oli no strong nating. Long taem ya, mitufala i no kasem save se nius ya bambae i jenisim laef blong mitufala bigwan.

Sam manis biaen, mi wetem man blong mi Gary, mitufala i stat go long ol spesel klas long Melbourne, Ostrelia. Long ples ya, mitufala i lanem wanem we mitufala i mas mekem blong lukaotgud long gel blong mitufala. Mo tu, mitufala i go long National Acoustic Laboratory long Melbourne. Long ples ya, ol dokta oli putum ol smosmol mesin long tufala sora blong Kristi, blong givhan long hem blong traem harem samting. Long taem ya Kristi i gat ten manis blong hem. Hem i no laekem nating tufala smosmol mesin ya. !Taem mitufala i putum tufala mesin ya long sora blong hem, wantaem nomo hem i pulum ol smosmol rop we oli joen long tufala, blong pulumaot tufala! Hem i mas werem wan strap tu we oli fasem ol batri long hem. Samting ya i hevi lelebet.

From sik blong Kristi, i hadwok long hem blong lanem blong wokbaot. Evri wik, mitufala i mas tekem hem i go long wan dokta we i mekem ol spesel eksasaes long han mo leg blong hem. Taem Kristi i gat tri yia blong hem, hem i save wokbaot hem wan, nating se hem i foldaon plante taem. Mitufala i gohed blong tekem hem i go long spesel dokta ya gogo hem i gat faef yia blong hem. Mo tu, mifala i muv i go long wan narafala taon we i no longwe tumas, nem blong hem Benalla. Long ples ya, Gary i gat prapa bisnes blong hem.

Kristi Long Skul

Wan man we i stap tijim ol pikinini we sora blong olgeta i fas, i toktok wetem mitufala long saed blong ol spesel edukesen we Kristi bambae i nidim. Hemia i min se mifala i mas muv bakegen. Mifala i mas go long taon ya Bendigo we i gat wan spesel skul blong ol pikinini we sora blong olgeta i fas. Be long taem ya, mi mi gat bel wetem seken pikinini blong mitufala. Ale mifala i wet kasem taem we Kristi i gat fo yia blong hem mo smol boe blong mitufala Scott, i gat faef manis blong hem. Long Bendigo, evri wik mitufala i tekem Kristi i go long wan hospital, blong hem i save lanem blong toktok. Mitufala i gohed blong mekem samting ya blong ten yia. Mi mo Gary tu i lanem blong mekem saen long han blong mitufala blong toktok wetem Kristi.

Mitufala i tingbaot moa blong tijim Kristi long saed blong Baebol. Mi mo Gary i Witnes blong Jeova, ale mitufala i gat strong tingting blong tijim Kristi “olsem we [Jeova] i stap stretem yumi, i stap tijim yumi.” (Efesas 6⁠:4) ?Olsem wanem mitufala i save mekem wok ya? Hed tija blong skul we Kristi i go long hem i talem long mitufala se: “Bambae i hadwok moa blong tijim Kristi long saed blong God i winim ol narafala samting. Yumi no save luk God. ?Olsem wanem bambae yutufala i save eksplenem God long hem?” !Mitufala i fesem wan hadwok tru! Kwiktaem nomo mitufala i luksave se blong mekem wok ya, mifala i mas tekem plante taem, mifala i mas stadi, mo mifala i mas gat longfala tingting.

Fastaem, mitufala i yusum ol pija, droem ol plan, mo mitufala i yusum ol isi toktok nomo. Mitufala i tekem Kristi i go long ol Kristin miting mo long wok blong prij, nating se hem i no kasem save long evri samting. !Taem Kristi i lanem blong mekem saen long han blong hem blong toktok, i olsem we hem i stap long wan niufala wol! Nating se i olsem, i hadwok yet blong eksplenem sam tok mo tingting long Baebol. Buk we hem i laekem moa, hemia My Book of Bible Storiesa we hem i wan spesel buk blong ol pikinini. Ol pija long buk ya, wetem ol plan we mitufala i droem, oli givhan gud long Kristi. Sloslo, Kristi i stat blong lavem God.

Hed tija blong skul blong Kristi i talem nem blong sam narafala Witnes we sora blong pikinini blong olgeta i fas. Ol Witnes ya oli givhan gud long mitufala, speseli taem oli eksplenem olsem wanem ol man we sora blong olgeta i fas oli save prij long ol man we sora blong olgeta i no fas. Oli save raetem toktok we i kamaot long Baebol long wan pepa, mo givim pepa ya long ol man blong oli ridim. !Ale, taem Kristi i naf blong serem trutok blong Baebol wetem ol narafala, hem i luksave se rod ya i isi nomo! Taem hem i gat 14 yia blong hem, hem i kam wan pablisa blong gud nius we i no baptaes yet. Long 1994, taem hem i gat 17 yia, hem i tekem baptaes.

Kristi i nidim ol gudfala fren. Be i no isi blong hem i fren wetem ol Witnes we sora blong olgeta i no fas. Ale mi mo Gary i mekem sam klas blong tijim samfala long kongregesen we oli wantem lanem blong mekem saen long han blong olgeta blong toktok wetem ol narafala we sora blong olgeta i fas. Biaen, sam long ol klas ya oli faenem wok blong tanem toktok i go long saen lanwis. Samting we i moa impoten se, plante oli lanem blong toktok wetem Kristi mo oli haremgud blong kampani wetem hem. Nao Kristi i haremgud fulwan long ol Kristin miting mo asembli. Kam kasem tede, hem i stap givim ansa mo mekem tok long ol miting ya. Kristi i glad tumas long lav mo intres we ol Kristin brata sista oli soem long hem.

Wan dei, Kristi i talem long mitufala se hem i wantem kam wan fultaem paenia, hemia i min se hem i wantem prij fultaem. Gary i givhan long hem blong winim pepa blong hem blong draevem trak, mo long 1995, taem ol narafala samting oli stret, Kristi i kam wan fultaem paenia. Long yia 2000, hem i stat wok haftaem blong kasem smol mane, long wan praemari skul. Long ples ya, hem i stap givhan blong tijim ol pikinini we sora blong olgeta i fas.

Naoia, mi, Kristi, Gary, mo boe blong mitufala Scott, mifala evriwan i haremgud blong mekem wok blong fultaem paenia. !Mifala i glad tumas blong yusum taem blong mifala blong tijim ol man long saed blong God blong mifala, Jeova!

‘Ol Samting We Yumi Wantem Tumas’

I tru se trabol ya we Kristi i gat i wan traem we mifala i mas gohed oltaem blong winim. Sam samtaem we Kristi i joen long Kristin wok blong prij, maet i no gat wan narafala i prij we i save mekem saen long han blong hem blong toktok wetem Kristi, ale Kristi i no save serem ol tingting mo filing blong hem. Long taem olsem hem i stap talem se: “Mi harem olsem se mi stap long wan kantri we ol man blong hem oli toktok narafala lanwis.” Nating se i olsem, mifala i lan finis blong laef wetem trabol ya we Kristi i gat.

Mifala i haremgud long tok blong Ol Sam 37⁠:4: “Yu mas luk long Hae God blong i mekem yu yu glad, nao bambae hem i givim long yu ol samting we yu yu wantem tumas.” Kristi i wantem tumas blong harem miusik, mo blong lesin long voes blong ol samting olsem ol pijin we God i wokem, mo blong toktok wetem maot blong hem long olgeta we hem i lavem olgeta. Mi mi wantem tumas we Kristi i harem voes blong mi. Mifala i bilif strong se i no longtaem, ol samting ya we mifala i wantem tumas bambae oli kamtru, olsem Baebol i promes finis.​—⁠Aesea 35⁠:5.​—⁠Wan famle i raetem stori ya.

[Futnot]

[Tok blong pija long pej 14]

Kristi we i gat 14 manis blong hem, wetem “My Book of Bible Stories”

[Tok blong pija long pej 15]

Blong talemaot gud nius, Kristi i yusum wan pepa we hem i raetem toktok long hem

[Tok blong pija long pej 15]

Scott, Kristi, Gary, mo Heather Forbes tede