Baebol i Talem Wanem
?Yumi Naf Blong Lego Ol Nogud Fasin?
MAN blong raetem buk, Mark Twain, i tok plei se: “I isi nomo blong lego fasin blong smok sigaret. Mi save, from we mi mekem samting ya plante taosen taem finis.” Plante man oli kasem save long tok ya we ating Mark Twain i sem lelebet blong talem. Oli save se sam fasin oli nogud mo oli save spolem bodi blong olgeta, be oli faenem i had blong blokem no winim ol fasin ya. Taem ol yia oli stap pas mo ol man ya oli gohed nomo blong mekem ol nogud fasin ya, i hadwok moa blong oli lego olgeta. Oli kam olsem we oli wantem ol samting ya tumas, nao taem oli traehad blong lego, oli harem se oli no moa gat paoa mo oli harem nogud tumas long bodi blong olgeta.
Dokta Anthony Daniels, we hem i dokta long wan presin, i talem se plante man we oli mekem ol nogud fasin oli talem se ol rabis tingting blong olgeta oli holemtaet olgeta we oli no save kamfri. Oli talem se, taem man i kam slef blong wan rabis fasin “we hem i wantem tumas, hem i no moa gat paoa blong blokem samting ya.” Sipos tok ya i tru, yumi no rong taem yumi folem ol rabis tingting we oli pulum yumi, from we oli strong tumas. ?Be tok ya i rili tru? ?Wanem tingting blong yu? ?Yumi naf blong blokem ol tingting we oli pulum yumi blong mekem nogud, no yumi no naf? Blong faenem wan ansa we yumi save trastem, bambae yumi lukluk i go long Baebol.
Samting We Yumi Wantem Mo Samting We Yumi Mekem
Baebol i talem klia se bambae yumi mas talemaot olgeta fasin blong yumi long God. (Rom 14:12) Mo tu, God i wantem se yumi folem ol stret rul blong hem long laef blong yumi. (1 Pita 1:15) God i wokem yumi, taswe hem i save wanem samting i gud long yumi. Ol rul we hem i putum, oli agensem plante fasin blong wol ya. (1 Korin 6:9, 10; Galesia 5:19-21) Be, hem i save tu se yumi no stretgud olgeta, ale hem i gat sore long yumi mo i no mekem i strong tumas long yumi.—Ol Sam 78:38; 103:13, 14.
Man blong raetem Sam 130, hem i talem se: “[Jeova.] ?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?” (Ol Sam 130:3) Yes, Jeova i savegud se “taem man i yangfala yet, be hat blong hem i wantem mekem ol nogud samting finis.” (Jenesis 8:21, NW ) Taem yumi jes bon, be sin i stap long yumi finis mo yumi kasem finis plante slak fasin tru long papa mama blong yumi. Samting ya wetem ol nogud samting we oli hapen long laef blong yumi i mekem se i mas gat sam nogud tingting we oli pulum yumi samtaem. Taswe, Jeova we i gat bigfala lav, i no talem long yumi ol sinman se yumi mas stretgud olgeta.—Dutronome 10:12; 1 Jon 5:3.
Yes God i sore long yumi, be hemia i no min se yumi no nidim blong traehad blong sakemaot ol tingting we oli pulum yumi blong wantem ol nogud fasin. Aposol Pol i talem se hem tu i faet agensem ol nogud tingting, mo hem i no kam slak long faet ya. (Rom 7:21-24) Hem i talem se: “Mi mi stap faetem gud bodi blong mi, mo mi mi stap bos long hem olsem we hem i wan slef nomo.” ?From wanem? “I nogud mi mi kam wan man we God i no save agri long mi from wan fasin blong mi.” (1 Korin 9:27, NW ) Yes, yumi mas bos long tingting mo ol filing blong yumi. Hemia wan bigfala samting we yumi nidim blong yumi save faet agensem ol nogud tingting mo fasin, mo blong yumi save winim olgeta.
Yumi Naf Blong Jenis
Ol dokta we oli stadi long fasin blong man, oli talem se ol nogud fasin, wetem ol gudfala fasin tu, hemia samting we yumi lanem no yumi wokem long ol yia we oli pas. !Sipos tok ya i stret mo yumi naf blong lanem ol fasin ya, ale yumi naf blong sakemaot ol fasin ya bakegen! ?Olsem wanem yumi save mekem olsem? Sam man we oli raetem wan buk blong tokbaot samting we yumi save mekem blong winim wari, oli talem se: “Yu mas tingbaot gudfala frut we bambae yu kasem taem yu sakemaot wan nogud fasin. Nao yu save raetem wan lis blong ol gudfala samting we oli save kamaot long laef blong yu sipos yu mekem ol jenis ya.” Yes, traem tingbaot ol gudfala frut we i save kamaot sipos yu jenisim ol nogud fasin blong yu. Ol tingting olsem oli save pusum yu blong wantem jenis.
Tingbaot advaes blong aposol Pol se ‘yumi mas kam olsem niufala man, from paoa we i stap wok long tingting blong yumi.’ (Efesas 4:22, 23, NW ) Paoa ya, hemia ol samting we yumi tingbaot moa bitim ol narafala samting. Yu save jenisim paoa ya sipos yu kam klosap long God, mo yu wokem fasin tangkiu from ol rul mo tingting blong hem. Taem yu kasem save se Jeova bambae i glad long niufala fasin blong yu, samting ya i save pusum yu blong sakemaot nogud fasin.—Ol Sam 69:30-33; Ol Proveb 27:11; Kolosi 1:9, 10.
I tru se i no isi blong sakemaot ol nogud fasin we maet oli bin bos long yu blong plante yia finis. Yu no mas ting se bambae yu save winim olgeta isi nomo. Maet bambae i gat sam samting we oli blokem yu, mo maet yu foldaon bakegen. Be yu save sua se sipos yu gohed oltaem blong faet agens long olgeta, sloslo bambae i kam moa isi. Moa we yu traehad, moa we fasin blong yu bambae i kam niuwan.
God i promes tu se bambae hem i givhan long man we i lavem Hem, mo bambae i blesem man olsem. Pol i talem se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be . . . hem bambae i mekem rod blong yumi, blong yumi winim samting ya.” (1 Korin 10:13) Klosap nao, Jeova God bambae i spolem ol rabis samting blong wol ya we oli save pulum yumi, mo ol nogud tingting blong wantem tumas ol samting we oli no stret. (2 Pita 3:9-13; 1 Jon 2:16, 17) Olgeta sinman we God i no spolem olgeta long taem ya we hem i spolem ol rabis samting, sloslo bambae oli kamgud bakegen fulwan, mo bambae oli kamgud blong olwe long saed blong bodi, tingting, mo filing. God i promes se: “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.” (Aesea 65:17) Sam long “ol samting ya we i hapen bifo,” hemia ol nogud tingting blong wantem samting we i no stret. ?Olsem wanem? ?Yu ting se hemia wan nambawan risen blong mekem bes blong yu naoia blong faet agensem ol nogud fasin?
[Bokis/Foto blong pija long pej 19]
WINIM OL NOGUD FASIN
1. Luksave se yu yu gat wan nogud fasin. Traem ansarem kwestin ya: ‘?Fasin ya i stap givhan long mi? ?Fasin ya i mekem narafala i harem nogud? ?Fasin ya i spolem helt blong mi, mane blong mi, glad blong mi, famle blong mi, mo pis long tingting blong mi? ?Sipos mi sakemaot fasin ya, bambae laef blong mi i kamgud olsem wanem?’
2. Putum wan gudfala fasin long ples blong nogud fasin ya. Olsem nao, maet yu stap westem plante tumas taem blong lukluk Intenet, mo maet yu stap lukluk sam samting we i no stret tu. Ale, yu save yusum taem ya blong ridim wan gudfala buk, mekem sam stadi, no plei spot.
3. Jekem yu wan blong luk olsem wanem yu stap kamgud. Evri dei, tekem sam menet blong jekemap yu wan. Sipos yu foldaon bakegen long nogud fasin ya, traem luksave wanem samting i hapen blong pulum yu blong gobak long hem.
4. Askem sam narafala blong givhan long yu. Talem long ol fren mo famle blong yu se yu stap traehad blong winim nogud fasin ya, mo askem olgeta blong talem long yu sipos oli luk se yu stap foldaon long nogud fasin ya bakegen. Mo tu, toktok wetem ol narafala we oli winim semfala nogud fasin ya finis.—Ol Proveb 11:14.
5. Holem stret tingting. Yu no mas ting se bambae yu winim nogud fasin ya wantaem nomo. Maet yu mas traehad longtaem blong winim ol fasin we yu bin tekem plante yia blong lanem olgeta.
6. Prea long God. Long paoa blong God, yu yu naf blong winim enikaen nogud fasin.—Ol Sam 55:22; Luk 18:27.