Ol Man Blong Ridim Wekap! Oli Talem
Ol Bebet We Oli Save Givim Sik Mi mi wok olsem wan tija long yunivesiti. Blong 24 yia, mi bin stap olsem hed blong dipatmen ya we i mekem ol tes mo stadi long ol smosmol bebet blong faenemaot trabol we oli mekem long bodi blong man, mo mi stadi tu long wok we ol kemikol oli mekem insaed long bodi. !Tru ya, ol buk blong yufala oli tokbaot ol save blong ol sayentis long fasin we i isi nomo blong kasem save long hem! Mi mi laekem tumas haf ya “Ol Bebet We Oli Save Givim Sik.” (Oktoba-Disemba, 2003) Sam save long ol buk blong ol sayentis mi mi no kasem save long hem. Be taem yufala i eksplenem, mi mi kasem save wantaem nomo. Tangkiu tumas long hadwok blong yufala.
M. R., Meksiko
Tangkiu tumas long stori ya “Ol Bebet We Oli Save Givim Sik.” Insaed long haf ya, i gat wan smol bokis we i tokbaot “?Ol Bebet Oli Save Givim Sik Ya HIV?” Blong sam yia nao, mi mi stap long wan taon we, long hot taem, i fulap long ol moskito. Oltaem mi stap fraet se oli save givim HIV long mi. !From haf ya blong yufala, long hot taem blong yia ya bambae mi no moa wari!
J. L., Albania
Wota Mi mi stadi long saed blong ol kakae we oli gud long bodi mo fasin blong lusum kilo. Haf ya “Blong Stap Laef, Yumi Nidim Tumas Wota,” i stret samting we mi mi nidim. (Jenuware-Maj, 2004) Long tu pej nomo, yufala i talem evri samting we mi bin lanem long wan kos blong 30 aoa we i tokbaot ol kakae we i gud long bodi. Bambae mi yusum haf ya blong givhan long ol man we mi stap halpem olgeta.
J.F.S.F., Brasil
Tangkiu long stori ya “Blong Stap Laef, Yumi Nidim Tumas Wota.” Haf ya i tokbaot wan dokta we i stap givhan long ol man we oli fatfat tumas, nao hem i talem se ol man we oli wantem stap helti oli mas dring 8 kasem 10 glas wota (samwe long 2 lita) evri dei. Be sam dokta oli talem se ol man we oli gat problem blong hat no we kidni blong olgeta i no wokgud, oli no mas dring plante wota.
T. A., Japan
Ansa blong “Wekap!”: I gat ol defdefren advaes long saed ya. Sam man we oli gat fulap save long bisnes ya, oli talem se samfala we oli gat helt problem oli no mas dring plante wota. I waes blong go luk wan dokta blong askem moa advaes.
Sik Ya Postpartum Depression Long Eprel, mi mo man blong mi, mitufala i kam wan papa mo mama. Afta we smol boe blong mitufala i bon, mi stat blong harem ol filing we haf ya “Kasem Save long Sik Ya Postpartum Depression” i tokbaot. (Oktoba-Disemba, 2003) Evriwan oli stap talem long mi se pikinini blong mitufala i naes tumas, be mi mi no wantem luk hem nating. Afta we mi ridim stori ya, mi putum han blong mi i goraon long man blong mi, mi soem haf ya long hem mo mi eksplenem ol filing blong mi. Hem i glad blong kasem save long samting we i mekem fasin blong mi i jenis. Mi talem tangkiu long yufala we i raetem stori ya long kaen fasin. Ol tok blong hem i tajem hat blong mi.
S. V., Itali
Mi mi mama blong wan naes smol gel we i gat wan yia blong hem. Taem mi openem Wekap! mo mi ridim haf ya “Kasem Save long Sik Ya Postpartum Depression,” mi harem se han blong Jeova i klosap moa long mi i bitim olgeta narafala taem bifo. Mi no save faenem stret tok blong talem tangkiu long yufala. Mi glad tumas blong stap long wan grup we i lukaotgud long wanwan memba blong hem. !Tangkiu, tangkiu tumas!
M. G., Spen
Tosta Long Saed Blong Spirit Mi mi krae taem mi ridim haf ya “Mi No Moa Tosta Long Saed Blong Spirit.” (Oktoba-Disemba, 2003) Mi mi gruap long wan Katolik famle mo mi bin go long wan Katolik skul blong eit yia. Long skul mo long Lames, mifala i no ridim Baebol. Be mi mi tinghae long Baebol mo mi bin ridim evri naet. Olsem Lucia Moussanett, mi bin wantem mekem ol samting we Baebol i talem, be mi no bin save olsem wanem blong mekem olsem. Taem mi stat stadi Baebol wetem ol Witnes blong Jeova, mi jes haremgud long saed blong spirit. !Tangkiu tumas from ol gudfala stori olsem!
K. F., Yunaeted Stet