Baebol i Talem Wanem
Yumi Mas Spenem Taem Wetem Pikinini
?OLSEM wanem? ?Pikinini blong God i gat taem blong toktok long ol pikinini? Sam disaepol blong Jisas oli no ting se hem i gat taem. Wan dei, oli traem blong blokem ol pikinini we oli kam long hem. Be Jisas i tok long olgeta se: “!Yufala i no blokem ol pikinini ya! Yufala i letem olgeta oli kam long mi.” Nao hem i putum han blong hem i goraon long ol pikinini ya wetem lav, mo hem i toktok long olgeta. (Mak 10:13-16) Olsem nao, Jisas i soemaot se hem i rere blong tektaem blong toktok long ol pikinini. ?Olsem wanem ol papa mama tede oli save folem eksampol blong Jisas? Oli save mekem olsem taem oli tijimgud ol pikinini blong olgeta mo spenem taem wetem olgeta.
Ol gudfala papa mama oli traehad blong lukaotgud long ol pikinini blong olgeta, mo oli no mekem samting blong spolem olgeta. Maet yumi talem se God i putum finis long ol man mo woman, tingting ya blong soem respek mo kea long ol pikinini blong olgeta. Be Baebol i givim woning se plante man long taem blong yumi bambae oli no moa “gat sore.” (2 Timoti 3:1-3) Ol papa mama we oli soemaot intres long ol pikinini blong olgeta, olgeta tu oli save lanem blong kam gud moa long wok blong papa mama. From samting ya, ol rul blong Baebol we bambae yumi tokbaot naoia, oli save pulum ol papa mama blong tingting bakegen long beswan rod blong tijim ol pikinini blong olgeta.
Tijim Pikinini Be No Mekem Hem i Kam Kros
Dokta Robert Coles we hem i stadi mo i tij long saed blong tingting blong man, i talem se: “Taem ol pikinini oli stap gru, semtaem oli lanem blong haremsave wanem samting i stret mo wanem samting i no stret. Mi mi ting se God i putum fasin ya long olgeta. From samting ya, oli wantem tumas blong save ol fasin we i stret blong folem.” ?Hu nao i save givhan long olgeta blong save ol fasin ya?
Baebol i talem long Efesas 6:4 (NW ) se: “Ol papa, yufala i no mas mekem ol pikinini blong yufala oli harem nogud gogo oli kam kros. Be yufala i mas gohed blong stretem olgeta, mo blong trenem tingting blong olgeta olsem we Jeova i wantem.” Makemgud se wok ya i stap long ol papa fastaem, blong oli tijim ol pikinini blong olgeta blong lavem God mo blong tinghae long ol rul blong hem. Long Efesas japta 6 vas 1, aposol Pol i tokbaot papa mama tugeta, taem i talem long ol pikinini se oli mas ‘obei long papa mo mama blong olgeta.’a
Sipos papa i no stap, i klia se mama nao i mas mekem wok ya. Plante mama we oli no stap wetem papa blong ol pikinini blong olgeta, oli mekemgud wok ya blong tijim mo stretem ol pikinini blong olgeta olsem we Jeova God i wantem. Be sipos mama ya i mared bakegen, Kristin hasban nao i mas lidim wok ya. Mama i mas glad blong folem man blong hem we i lidim wok ya blong tijim mo stretem ol pikinini blong tufala.
?Olsem wanem yu save stretem mo tijim ol pikinini blong yu, we yu no ‘mekem olgeta oli harem nogud gogo oli kam kros’? I no gat wan spesel rod we i haed. Ol pikinini oli no sem mak evriwan. Taswe ol papa mama oli mas tingting gud long fasin blong olgeta blong stretem ol pikinini, mo oltaem oli mas soemaot lav mo respek long olgeta. Tingting ya blong no mekem pikinini i kam kros, i kamaot bakegen long Baebol long Kolosi 3:21. Long ples ya, advaes i go long ol papa bakegen se: “Ol papa . . . Bambae yufala i no stap mekem ol samting we i save mekem ol pikinini blong yufala oli kros, from we sipos yufala i stap mekem olsem, bambae tingting blong olgeta i foldaon.”
Sam papa mama oli tok strong mo singaot long ol pikinini blong olgeta. Fasin ya i save mekem ol yangfala ya oli kam kros. Baebol i talem se: “Yufala i mas lego olgeta fasin blong kros, yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala.” (Efesas 4:31) Baebol i talem tu se, “man blong wok blong Masta blong yumi, hem i no mas man blong faet, hem i mas mekem i gud long olgeta man.”—2 Timoti 2:24.
Spenem Taem Wetem Olgeta
Blong spenem taem wetem ol pikinini blong yu, yu mas rere blong lego sam samting we yu yu laekem blong mekem, no lego rod we i isi long yu, nao yu mas tingbaot pikinini blong yu fastaem. Baebol i talem se: “Yufala i no mas fogetem ol tok ya we mi mi stap givim long yufala tede. Oltaem, yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.”—Dutronome 6:6, 7.
Tede, plante papa mama oli no save stap wetem ol pikinini blong olgeta moning kasem sapa, from we oli mas wok blong kasem naf mane blong laef. Be Dutronome i talem klia se ol papa mama oli “mas” faenem taem blong stap wetem ol pikinini blong olgeta. Blong mekem olsem, oli mas gat wan gudfala program, mo oli mas rere blong lego sam samting. Ol pikinini oli nidim we papa mama i spenem taem wetem olgeta.
Oli stadi long 12,000 yangfala, nao oli faenemaot se: “Beswan samting we i mekem yangfala i strong gud long bodi mo i blokem hem blong i no mekem ol rabis fasin, hemia we hem i harem se hem i klosap long papa mama blong hem.” Yes, ol pikinini oli wantem tumas we papa mama blong olgeta oli spenem taem wetem olgeta. Wan mama i askem long ol pikinini blong hem se, “?Sipos yufala i save kasem eni samting we yufala i wantem, bambae yufala i wantem wanem?” Ol fo pikinini blong hem oli talem se, “Mifala i wantem spenem moa taem wetem Mama mo Papa.”
Taswe, blong mekemgud wok blong papa no mama, yu mas meksua se yu stap givim samting we pikinini blong yu i nidim, wetem tijing long saed blong spirit mo gudfala fasin fren tu. Yu mas givhan long ol pikinini blong yu blong gruap long fasin we oli naf blong mekem plante samting, oli gat respek mo stret fasin, oli mekem i gud long ol narafala, mo oli givim ona long God. (1 Samuel 2:26) Yes, taem ol papa mama oli tijim mo stretem pikinini blong olgeta olsem God i wantem, oli stap mekemgud wok blong olgeta.
[Futnot]
a Long ples ya, Pol i yusum Grik tok ya go·neuʹsin we i kamaot long go·neusʹ. Tok ya i minim “papa no mama.” Be long vas 4, hem i yusum Grik tok ya pa·teʹres we i minim “ol papa.”
[Tok blong pija long pej 31]
Singaot strong long pikinini i save mekem hem i harem nogud mo i kros
[Tok blong pija long pej 31]
Spenem taem wetem ol pikinini blong yu