Tu Taem Kot i Jajem Mi Blong Wok Slef 25 Yia

EFREM PLATON I TALEM STORI YA

Klosap long en blong yia 1951, mi pas long kot mo oli givim panis long mi blong go wok slef 25 yia long kalabus. Hemia seken taem we oli givim semfala panis ya long mi. Long seken taem ya oli putum mi long wan rabis kalabus blong ol man Rasia long Vorkuta, hemia wan taon longwe long not blong wol, long ples we i kolkol bitim mak. Bambae mi storebaot from wanem mi kasem panis ya mo olsem wanem klosap mi bin lusum laef blong mi.

MI MI bon long Julae 16, 1920. Famle blong mi i pua mo mifala i laef long Bessarabia, hemia ples ya we tede oli kolem Ripablik blong Moldova. Smoltaem bifo we mi bon, papa blong mi i ded, mo biaen, taem mi gat fo yia, mama blong mi tu i ded. Mifala sikis pikinini i stap we mifala i no gat papa mama. Mi tangkiu bigwan long ol bigfala brata blong mi we oli wok olsem papa mama blong lukaot long mifala we mifala i smol yet.

Taem mi mi yang, mi intres bigwan long eni samting we i joen wetem jos, mo mi tekpat plante long wanem we Otodoks Jos i stap mekem long ples blong mifala. Be sloslo, mi stat harem nogud long Jos, mi no glad long fasin blong ol pris from we oli stap prea blong askem blesing long ol man we oli go faet long Wol Wo Tu we i stat long Septemba 1939.

Long stat blong ol yia 1940, ol man Romania oli faet wetem ol man Soviet Yunion. Kantri blong mifala, Bessarabia, i stap medel long tufala kantri ya we tufala i stap faet. Jenrol Ion Antonescu i stap rul long Romania long taem ya, mo hem i kam tekova long kantri blong Bessarabia. Ale niufala gavman ya i tekem evri yang man we oli gat 20 yia i go antap, blong oli kasem trening long ami. Mi mi wan long olgeta we oli tekem. Trening ya oli mekem long wan ples we oli kolem Boroseni, hemia i klosap long vilej we mi mo woman blong mi, Olga, mitufala i laef long hem.

Mi Lanem Ol Trutok Blong Baebol

Taem mi stap long trening ya, wan dei mifala i spel blong kakae long medel dei, nao mi luk wan grup blong man we oli stap stori. Mi faenemaot se oli ol Witnes blong Jeova. Mi joen long storian blong olgeta, nao biaen, mi stat joen oltaem blong storian wetem olgeta. Mi glad tumas from we, sloslo, mi stap luksave se mi faenem trutok blong Baebol, ale mi serem ol trutok ya wetem Olga mo papa mama blong hem.

Long dei ya we mi bin joen long storian blong ol Witnes ya, oli stap tokbaot fasin blong no joen long faet. Oli luksave se oli mas tekem wan stret desisen long saed blong bisnes ya. Desisen blong olgeta se bambae oli gohed long trening ya, be long en blong trening ya bambae oli no mekem promes blong joen long ami.

Mi talemaot long Olga mo papa mama blong hem se mi tu mi plan blong mekem olsem ol Witnes ya, mo oli agri wetem mi. Long Jenuware 24, 1943, trening blong mifala i finis, nao mifala i mas mekem promes blong joen long ami. Mifala eit i stanap fored long ol pris we olgeta nao oli stap raetemdaon nem blong ol man we oli joen long ami. Nao mifala eit i no mekem promes, be mifala i talemaot klia se mifala i no wantem joen long ami from we mifala i no wantem tekpat long faet.

Ol polis oli arestem mifala eit, mo oli tekem mifala i go long polis stesen long Boroseni. Taem mifala i kasem ples ya oli kilim nogud mifala, ol kil we mi kasem i mekem se klosap woman blong mi i no luksave mi. Biaen oli karem mifala eit i go long bigfala taon we nem blong hem Chişinău (bifo nem blong hem Kishinev), mifala i mas pas long kot blong ami we i stap long ples ya.

Mifala i wokbaot 140 kilometa, mo i tekem 21 dei blong wokbaot from we ples i kolkol we i kolkol tumas. Oli fasem han blong mifala eit long jen, we jen blong wan i joen long jen blong narawan. Ale mifala i maj wetem ol soldia klosap long mifala we oli holem masket. Oli no givim kakae mo dring long mifala. Evri taem we mifala i kamtru long wan polis stesen, ol polis oli faetem mifala. !Oli mekem olsem long olgeta 13 polis stesen we oli stap long wokbaot ya! I no gat wan long mifala we i ded from we taem mifala i slip long naet long wanwan polis stesen ya, oltaem ol man long vilej oli karem kakae mo wota i kam long mifala. Kaen fasin blong ol man ya i soemaot se God i stap lukaot long mifala.

Mi Kasem Paoa Nating Se Tingting i Foldaon

Taem mifala i kasem Chişinău, mifala i mas wet long kalabus bifo we mifala i pas long kot. Ale long taem ya bakegen ol polis oli mekem i nogud tumas long mifala. Oli wantem daonem bilif blong mifala, nao oli talem se sam Witnes we oli stap long Zaicani, wan vilej long not blong Moldova, oli lego bilif blong olgeta finis, mo from samting ya ol polis oli letem olgeta oli fri blong gobak hom. Biaen mifala i faenemaot se tok ya i giaman nomo, ol polis oli bin sanem ol Witnes ya oli gobak hom, blong oli stap wet nomo blong kasem toktok se wetaem bambae oli mas pas long kot. Wan narafala polis i tokbaot wan stori we hem i ridim long niuspepa we i talem se 80 Witnes oli pas long kot blong ami long Yukren, mo oli kasem panis blong ded.

Tingting blong sam long mifala eit i foldaon, oli ting se bambae oli neva save luk ol pikinini blong olgeta bakegen. Ol polis oli talem se sipos mifala i lego bilif blong mifala bambae mifala i save gofri nomo. Ale oli sanem mifala i gobak long hom blong mifala wanwan, mifala i go stap wan wik wetem ol famle blong mifala blong mifala i save tingbaot fiuja. Afta long hemia, i gat tri nomo long mifala eit we i holemstrong long desisen ya blong no joen long faet.

Long Februari 20, 1943, oli tekem mi mi gobak long polis stesen ya long Boroşeni, ples ya we oli bin kilim mi fastaem. Taem mi kasem ples ya mi mitim tufala narafala Witnes fren ya blong mi we tufala tu i holemstrong long desisen ya. !Mifala i glad tumas blong luk mifala bakegen! Ale oli putum mifala long wan kat we hos i pulum blong tekem mifala i go kasem Bălţi. Be taem mifala i stap ron i go, mi mi sik we mi sik, ating hemia wan blesing we mi sik olsem from we samting ya i mekem se oli karemaot mifala long kat ya mo oli putum mifala long wan bas. Mifala i wokbaot long bas ya go kasem Chişinău.

Taem mifala i kasem Chişinău, ol gad oli luksave se mitrifala ya nao we i bin holem strong long desisen blong mitrifala. Ale oli kilim mifala bakegen. Wan manis biaen, kot i panisim mitrifala se mitrifala i mas wok slef 25 yia long wan presin kamp long Romania.

Mi Baptaes Long Hol Blong Wan Bom

Mifala i kamtru long Cugir, long Romania, ples ya nao we hem i presin kamp. Wok blong mifala i blong katemdaon ol tri. Sipos mifala i finisimgud wok we oli putum blong mifala blong wan dei, ale mifala i save kasem smol moa kakae. Mifala ten Witnes i stap long kamp ya. Mifala i wokhad, taswe mifala i kakae gud moa long kamp ya i bitim taem we mifala i bin stap long ol narafala kalabus.

Long 1944, ol plen blong Amerika oli sakem bom long ol ples klosap long kamp blong mifala. Wan dei wan bom i bosta klosap long wan smol springwota, bom ya i mekem wan bigfala hol long graon. Sloslo springwota ya i stap fulumap hol ya gogo i fulapgud long wota. Ale, long Septemba 1944, mi mi baptaes long hol ya, nating se mi bin givim laef blong mi long Jeova God wan yia haf bifo.

!Naoia Mi Fri!

Sam wik biaen, ami blong Rasia i letem plante handred Witnes oli gofri, mo mifala i gobak hom. Hemia fastaem we mi luk boe blong mi Vasile, we hem i bon long 1943 taem mi stap long presin kamp.

Taem Wol Wo Tu i finis long Yurop long Mei 1945, Bessarabia i kam aninit long Soviet Yunion mo oli putum nem blong hem se Soviet Sosialis Ripablik blong Moldova. Fastaem, niufala gavman ya i no agensem ol Kristin wok blong mifala. Be i no longtaem ol man blong gavman ya oli luk se mifala i no stap vot. Hemia wan samting we long lukluk blong gavman ya, hem i wan bigfala samting agensem loa.

Long 1946, seken bon boe blong mitufala, Pavel, i bon. Mo long 1947, gel blong mitufala, Maria, i bon. !Mifala i gat wan hapi famle! Be samting olsem tu yia biaen, trabol i kamaot. Smol gel blong mitufala, Maria, i sik bigwan mo i ded. Mifala i berem hem long Julae 5, 1949. Biaen sam narafala samting i kamaot, we i spolem laef blong mifala bakegen.

Kalabus Long Saebiria

Sam aoa nomo afta we mifala i berem Maria, hemia eli moning nekis dei, taem ples i tudak yet, tri soldia wetem tu man blong vilej blong mifala oli kam wekemap mifala. Oli talem long mifala se gavman i dipotem mifala from we mifala “i no gat fasin we i laenap wetem Soviet gavman.” Oli letem mifala i tekem sam kakae mo sam klos, nao oli tekem mifala i go. Hemia long Julae 6, 1949. Oli sanem mifala i go 4,000 kilometa longwe long hom, kasem ples ya Kurgan, long Saebiria, hemia long not blong Kazakhstan.

Trip blong mifala i tekem 18 dei. Oli putum mifala long ol bokis blong tren olsem we mifala i buluk nomo. Long fulwan trip ya blong 18 dei oli givim kakae long mifala tu taem nomo. Mifala i seraotem gud ol kakae we mifala i karem wetem mifala, blong mekem se mifala i gat smol kakae blong evri dei. Evriwan insaed long bokis ya we mifala i stap long hem, oli Witnes blong Jeova. Evri dei mifala i tokbaot defdefren poen long saed blong Baebol blong mekem mifala i strong long saed blong spirit. Wan samting we mifala i holem long taem ya we i sas tumas long mifala, hemia wan Baebol.

Taem mifala i kasem Kurgan, mifala i faenemaot se, nating we mifala i stap long wan presin kamp, mifala i fri moa blong mekem samting i bitim long kalabus. Mi faenem wan wok long wan woksap blong kilim aean mo mi stat tokbaot hop blong Baebol long ol man long ples blong wok. Tu yia biaen, long Septemba 27, 1951, polis i arestem mi mo oli putum mi long kot bakegen. Kot i lesin long toktok blong 18 man we oli ripotem se mi bin talem long olgeta se Gavman blong kantri ya bambae i lus. Ol man ya oli tok olsem folem save we mi bin serem wetem olgeta we i stanap long profet tok blong Daniel 2⁠:44. Vas ya i soem se Kingdom blong God bambae i finisim olgeta gavman blong man mo hem nomo bambae i rulum wol.

Ol polis oli go long haos blong mifala mo oli lukluk long evri ples. Ale oli faenem wan Wajtaoa we ol brata blong Moldova oli bin sanem i kam long fasin haed. Plante taem finis ol polis oli bin faenem sam kopi blong ol magasin we man i raetem nomo long han, no we oli prentem nomo long ples ya. Be oli no glad nating long Wajtaoa ya we oli faenem, from we hem i kam long wan kantri afsaed long Soviet Yunion. Long taem ya nao, kot i panisim mi seken taem se mi go wok slef 25 yia long kalabus. Long seken taem ya oli sanem mi mi go wok long maen blong digim jakol long Vorkuta. Plante man oli save long kamp ya we ol presina blong hem oli wokhad olsem slef nomo. Hem i stap long ol Bigfala Hil ya Ural, long not blong wol, long ples we i kolkol bitim mak.

Mi Glisim Ded Long Vorkuta

Presin kamp blong Vorkuta i bigbigwan, i gat 60 kamp evriwan insaed long hem. Mo long wan kamp ya nomo we mi mi stap long hem, i gat bitim 6,000 wok man. Ples ya i kolkol we i kolkol bitim mak, ol man oli no gat gudfala ples blong slip, mo oli wok long ol maen blong digim jakol, olgeta samting ya oli spolemgud helt blong olgeta. Klosap evri dei i gat man i ded. Bodi blong mi i kam wik tumas, mekem se mi no gat naf paoa blong mekem ol strong wok. Ale oli givim wok long mi we oli talem se hem i smol wok, hemia se mi mas savelem jakol i go long ol kat.

From we laef long kamp ya i nogud tumas, ol presina oli mekem straek. Be straek ya i mekem faet i kamaot. Ol presina oli putumap prapa lida blong olgeta mo oli jusumaot 150 man we oli save faet agensem ol polis. Oli wantem we mi mo ol narafala 30 Witnes, mifala i joen long ami blong olgeta. Be mifala i no wantem joen wetem olgeta.

Straek blong olgeta i gohed blong tu wik gogo kasem we ol polis oli kamtru mo oli sutumdaon bighaf blong ol presina ya oli ded. !Biaen mifala i harem nius se ol rebel ya oli bin wantem hangem mifala 30 Witnes stret long woksap ya! Laki nomo we plan blong olgeta i no bin gat janis blong kamtru. !Mifala i sua se Jeova God nomo i mekem we mifala i laef tru long taem ya!

Yusumgud Fasin Fri Blong Mifala

Taem Stalin i ded long Maj 1953, sam samting i jenis long saed blong mifala. Long 1955, oli letem mi mi fri. Mi aot long Vorkuta mo mi gobak long famle blong mi, we oli stap yet long kamp blong Kurgan. Ale mifala i gohed blong prij long ol man long ples ya blong talemaot nambawan fiuja we God i promes blong givim long ol man.

Long 1961, mifala i wantem muf i go long wan niufala teritori blong prij. Ale mifala i raetem wan leta i go long lida blong kantri, nem blong hem Nikita Khrushchev, blong askem hem blong letem mifala i muf from we i no gat skul blong ol pikinini blong mifala​—⁠hemia wan samting we i tru tu. Oli letem mifala i muf i go long smol taon ya Makushino. I gat wan presin kamp tu long ples ya. Mifala i glad tumas from we mifala i halpem fo bigfala famle long ples ya blong oli kam ol man blong Jeova.

Ale long 1965, oli talem se mi mi fri long kamp ya. Oli no letem mifala i gobak long Moldova, be oli talem se mifala i save go long eni narafala ples long Soviet Yunion. Long yia we i kam biaen, mifala i go long Qostanay (we bifo, nem blong hem Kustanai), long Kazakhstan. I gat tu kongregesen blong ol Witnes long ples ya. Ol brata sista long ples ya oli wokem teritori blong olgeta plante, mekem se afta long 3 yia, mifala i muf i go long Chirchik long Uzbekistan. Long taem ya, tufala boe blong mitufala, Vasile mo Pavel, tufala i mared finis. Mitufala i wok blong halpem tufala nara pikinini blong mitufala​—⁠Dumitru, we i gat 10 yia, mo Liuba we i gat 7 yia​—⁠blong tufala i gru long saed blong spirit.

Mifala i stap 10 yia long Uzbekistan. Long olgeta yia ya mifala i gat janis blong halpem sam moa man blong oli save Jeova. Long 1979, mifala i muf i go long wan ples we i stap klosap 2,000 kilometa longwe, hemia long taon ya Krasnodar we i klosap long Blak Si, long saot blong Rasia. Mi mo Olga, mitufala i mekem wok blong fultaem paenia blong tu yia long ples ya, mo mitufala i halpem sam man mo woman blong oli kam ol Witnes.

Mifala i Gobak Long Moldova

Nao long hot taem blong 1989, mifala i plan blong gobak hom long Moldova. Hemia 40 yia afta we oli bin dipotem mifala. Taem mifala i kasem hom blong mifala bakegen, mifala i mekem wok blong paenia bakegen gogo kasem 1993. Mifala i gat janis blong halpem bitim 30 man blong kam ol Witnes blong Jeova. Hat blong mi i glad we i glad taem mi tingbaot olsem wanem Jeova i rili blesem famle blong mifala bigwan. Sore tumas, gudfala waef blong mi i ded long Mei 2004.

Samting we i leftemap tingting blong mi hemia taem mi luk se olgeta 4 pikinini blong mitufala, wetem ol 14 pikinini blong fofala, mo 18 smosmol bubu blong mitufala, oli mekem wok blong Jeova. !I tru, laef blong mifala i no bin isi, be i gud tumas blong save se Jeova i bin halpem mifala blong holemstrong long hem long ol traem blong mifala!

Moa we ol yia i pas, moa we helt blong mi i godaon, mo mi no moa save mekem plante long wok blong prij. Be mi traem bes blong mi oltaem. Mi lanem se nomata wanem traem we yumi kasem long laef, oltaem nomo Jeova i stap blong givim paoa we yumi nidim mo blong leftemap tingting blong yumi.a

[Futnot]

[Tok blong pija long pej 30]

Ol Witnes blong Jeova long presin kamp blong Vorkuta

[Tok blong pija long pej 31]

Mi wetem Olga long 2002