Mi Mi Winim Ol Hadtaem Long Wok Blong God

IVAN MIKITKOV I TALEM STORI YA

Haeman blong Soviet Stet Sekuriti Komiti (KGB) i givim woning ya long mi: “Sipos yu yu stap long taon ya, bambae yu go kalabus bakegen.” Mi mi stap 12 yia finis long kalabus, mo oli jes letem mi mi kamaot. Papa mama blong mi tufala i sik tumas, tufala i nidim we mi mi lukaot long tufala. ?Ale, mi mas mekem wanem?

MI MI bon long yia 1928, long wan vilej blong T̩aul long Moldova.a Taem we mi mi gat wan yia blong mi, papa blong mi, Alexander, i wokbaot i go long Ias̩i, Romania. Long ples ya, hem i mitim ol Baebol Studen, hemia nem blong ol Witnes blong Jeova bifo. Taem hem i kambak bakegen long T̩aul, hem i serem ol samting we hem i lanem wetem ol famle blong hem, mo wetem ol man we oli stap raonabaot long mifala. I no longtaem, wan smol grup blong ol Baebol Studen i stat long T̩aul.

Mi mi lasbon blong fo pikinini​—⁠evriwan oli boe​—⁠mo stat long taem we mi mi smol nomo, mi stap long medel blong ol man we oli laekem ol samting long saed blong spirit. Olgeta ya oli givim wan gudfala eksampol long mi. Sloslo, mi luksave se sipos mi mekem wok blong Jeova, bambae plante man oli agensem mi. Maet i no isi blong winim ol hadtaem ya. Mi mi rimemba gud olsem wanem ol polis oli kam plante taem long haos blong mifala blong traem faenem ol buk we mifala i haedem. Mi mi no fraet long olgeta ya. Mi bin lanem long stadi blong mifala long Baebol se ol man oli bin mekem i nogud long Jisas Kraes, stret Pikinini blong God, mo long ol disaepol blong hem. Long ol miting, oltaem oli mekem mifala i tingbaot se ol man blong Jisas oli mas save se bambae ol narafala oli agensem olgeta.​—⁠Jon 15⁠:⁠20.

Kam Strong Blong Fesem Fasin Agens

Long 1934, mi mi gat sikis yia blong mi. Long taem ya, oli ridimaot wan leta long kongregesen long T̩aul, we i tokbaot ol hadtaem we ol Kristin brata sista blong mifala i stap kasem long Jemani, aninit long rul blong ol Nasi. Oli askem long mifala blong prea from olgeta. Mi mi smol nomo, be mi neva fogetem leta ya.

Fo yia biaen, mi mi kasem faswan traem blong mi long saed blong bilif. Long skul, taem mifala i stap mekem lesen long saed blong ol tijing blong jos, pris blong Otodoks i talem strong long mi bakegen mo bakegen se mi mas hangem wan kros long nek blong mi. Taem mi no wantem, hem i askem ol pikinini long klas blong oli soem ol kros blong olgeta, blong pruvum se oli ol gudfala memba blong jos. Pris ya i poenem fingga blong hem long mi, mo i askem long klas se: “?Yufala i wantem wan boe olsem long klas blong yufala? Yufala we i no wantem, leftemap han blong yufala.”

Ol pikinini oli fraet long pris ya, ale olgeta evriwan oli leftemap han blong olgeta. Pris i tanem hem blong lukluk mi, i talem se: “Yu luk. I no gat wan we i wantem yu. Yu goaot naoia nomo.” Sam dei biaen, daerekta blong skul i kam long haos blong mifala. Hem i toktok wetem papa mama blong mi, mo i askem long mi sipos mi wantem gohed blong skul. Mi talem ‘yes.’ Hem i se: “Oltaem we mi mi stap daerekta blong skul ya, bambae yu skul. Pris ya bambae i no blokem yu.” Hem i talem tru. Oltaem we hem i daerekta blong skul ya, pris ya i no moa mekem trabol long mi.

Trabol i Kam Bigwan Moa

Long yia 1940, eria we mifala i stap long hem, Bessarabia, i kam haf blong Soviet Yunion. Long Jun 13 mo 14, 1941, oli sanem ol haeman blong eria ya wetem ol haeman blong politik, oli go kalabus long Saebiria. Oli no sanem ol Witnes blong Jeova. Be stat long taem ya, mifala i lukaotgud taem mifala i mekem miting mo prij.

Klosap long en blong Jun 1941, ol Nasi long Jemani oli mekem wan bigfala sapraes atak long Soviet Yunion. Kam kasem taem ya, Soviet Yunion mo Jemani tufala i stap long semfala saed blong faet. Smoltaem biaen, ol soldia blong Romania oli winimbak Bessarabia. Bakegen, ples blong mifala i stap aninit long gavman blong Romania.

Long sam vilej klosap long ples blong mifala, ol polis oli holem ol Witnes we oli no wantem joen long ami blong Romania. Long bighaf blong olgeta, oli givim panis blong wok slef blong 20 yia long kalabus. Ol polis oli singaot Papa i go luk olgeta. Oli kilim hem nogud from we hem i wan Witnes. Oli karemaot mi long skul tu, oli tekem mi mi go long jos mo oli fosem mi blong joen long wan sevis.

Nao ol samting i jenis long saed blong Wol Wo Tu. Long Maj 1944, ol ami blong Soviet Yunion oli winim Bessarabia kwiktaem nomo. Long Ogis, fulwan kantri ya i stap long han blong olgeta. Mi mi gat samwe long 16 yia long taem ya.

Smoltaem biaen, oli singaot evri man blong vilej, we bodi blong olgeta i strong, blong oli joen long ami blong Soviet Yunion. Be ol Witnes oli holemstrong long desisen blong olgeta blong no joen long faet. Ale oli sanem ol Witnes oli go kalabus blong ten yia. Long Mei 1945, ol ami blong Jemani, olgeta nomo oli letem olgeta oli go long han blong ol enemi blong olgeta, ale Wol Wol Tu i finis long Yurop. Nating se wo i finis, be long Moldova, plante Witnes oli stap kalabus go kasem 1949.

Ol Hadtaem Afta Long Wo

Afta we wo i finis long 1945, i gat bigfala draetaem long Moldova. Nating se i no gat ren, gavman blong Soviet Yunion i talem long ol fama se oli mas givim bighaf blong ol kakae long garen blong olgeta, blong pem takis blong olgeta. Samting ya i mekem se ol man oli hanggri bitim mak. Go kasem yia 1947, mi stap luk plante dedbodi olbaot long rod long T̩aul. Brata blong mi, Yefim, hem tu i ded. Mi mi slak we mi slak nogud from hanggri, mekem se blong plante wik, klosap mi no moa save muvum bodi blong mi. Be hadtaem ya blong kasem kakae i pas, mo ol Witnes we oli laef i stap, oli gohed blong prij. Mi mi prij long ples blong mifala nomo, mo bigfala brata blong mi, Vasile, we hem i gat seven yia moa long mi, hem i prij long ol vilej klosap.

Taem ol Witnes oli kam strong moa long wok blong prij, ol polis oli stat wajemgud olgeta. From we mifala i prij mo mifala i no joen long politik mo ami, gavman blong Soviet Yunion i stat jekem ol haos blong mifala blong lukaot ol buk, mo oli holem sam long mifala. Long 1949, oli sanem sam Witnes blong ol kongregesen klosap, oli go long Saebiria. Bakegen, mifala we i stap, mifala i mas lukaotgud taem mifala i prij.

Long taem ya, mi mi kasem wan strong sik we sloslo i kam moa nogud. Ol dokta oli faenemaot se tibi i stap insaed long ol bun blong mi, ale long 1950, oli kavremap raetsaed leg blong mi wetem simen.

Oli Sanem Mifala i Go Long Saebiria

Nating se simen i stap long leg blong mi, be long Epril 1, 1951, oli holem mi mo famle blong mi wetem sam narafala Witnes, mo oli sanem mifala i go long Saebiria.b Oli givim smoltaem nomo blong mifala i mekemrere, ale mifala i save karem smol kakae nomo. Mifala i flatem kakae ya kwiktaem nomo.

Afta we mifala i ron long tren blong tu wik, mifala i kamtru long Asino, long distrik blong Tomsk. Long ples ya, oli tekemaot mifala long tren, olsem we oli stap tekemaot ol buluk. Ples i kolkol bitim mak, be nating, mifala i glad blong pulum freswin lelebet. Long manis Mei, reva we i aes nomo, i stat ron bakegen. Nao oli putum mifala long wan sip, we i karem mifala i go 100 kilomita go kasem ples ya Torba, wan kamp blong katem timba long bus blong Saebiria. Long ples ya nao, mifala i statem panis blong mifala blong wok slef, mo oli talem long mifala se panis ya i blong olwe.

I tru se wok long ol kamp olsem i defren lelebet long laef insaed long wan kalabus. Nating se i olsem, oli wajemgud mifala. Long naet, famle blong mifala i slip insaed long wan haf blong tren. Long hot taem, mifala i wokem ol haos​—⁠ol rabis haos nomo we haf i stap antap long graon mo haf i stap aninit long graon. Hemia blong givhan long mifala blong stap wom long koltaem we i klosap.

From we simen i stap long leg blong mi, oli no givim wok long mi long bus, be mi mi mas wokem ol nil. Wok ya i givim janis long mi blong mekem ol kopi blong Wajtaoa mo sam narafala buk, long fasin haed. Long ol defren fasin haed, ol buk mo magasin ya oli aot long wes Yurop we i stap plante taosen kilomita longwe, oli kam kasem mifala.

Oli Holem Mifala Mo Sakem Mifala Long Kalabus

Long 1953, oli tekemaot simen long leg blong mi. Be bifo long taem ya, nating we mi lukaotgud, ol KGB oli faenemaot wok blong mi long saed blong spirit, wetem wok ya blong mekem kopi blong ol buk we oli tokbaot Baebol. From samting ya, oli givim panis long mi wetem sam narafala Witnes, se mifala i mas go long kalabus blong 12 yia. Long kot, mifala i givim wan gudfala witnes long saed blong God blong yumi, Jeova, mo ol gudfala samting we bambae hem i mekem long ol man from we hem i lavem olgeta.

Sloslo, oli sanem mifala i go long ol kalabus klosap long Irkutsk, hemia wan taon we i stap plante handred kilomita longwe, long saed i go long is. Oli wokem ol kalabus ya blong givim panis long olgeta we oli jajem olgeta se oli enemi blong gavman blong Soviet Yunion. Stat long Epril 8, 1954, go kasem yia 1960, mi mi stap long 12 kalabus olsem. Afta, oli tekem mi mi go 3,000 kilomita long wes, go kasem wan bigfala kalabus blong Mordovia, we i stap 400 kilomita longwe long Mosko, long saed i go long saotis. Long ples ya, mi mi kasem blesing blong kampani wetem plante Witnes blong ol defren ples long Soviet Yunion, we olgeta tu oli stap holemstrong long God.

Ol haeman blong Soviet Yunion oli luksave se taem ol Witnes blong Jeova oli stap kalabus wetem ol man we oli no Witnes, sam long ol man ya oli kam Witnes. Taswe, long kalabus ya blong Mordovia, we hem i olsem plante kamp we oli stap wanples go kasem 30 kilomita longwe, oli traehad blong mekem se mifala i stap longwe long ol narafala prisena. Long kalabus blong mifala, i gat bitim 400 Witnes. Sam kilomita longwe, i gat wan narafala kalabus we 100 Kristin sista oli stap long hem.

Long kalabus, mi mi wok strong blong ogenaesem ol Kristin miting, mo blong mekem kopi blong ol buk we mifala i stap kasem long fasin haed. Be ol bos blong kalabus oli faenemaot wok ya blong mi. Smoltaem biaen, long Ogis 1961, oli sanem mi mi go blong wan yia long wan kalabus we i rabis moa, hemia Vladimir Prisen, we oli bin wokem long taem we ol czar oli rul long Rasia. Kalabus ya i stap 200 kilomita longwe long Mosko, long saed i go long notis. Wan man Amerika, Franis Gary Powers, hem tu i stap long kalabus ya. Hem i paelot blong wan plen we i kam blong spae long Rasia, ale long Mei 1, 1960, oli sutum plen blong hem, mo oli putum hem i go long kalabus ya go kasem Februari 1962.

Taem mi mi stap long Vladimir Prisen, mi kasem naf kakae blong stap laef nomo. Mi lan finis long hanggri, from we mi bin pastru long hadtaem ya taem mi yangfala. Be i had long mi blong winim koltaem blong yia 1961/1962, from we ples i kolkol bitim mak. Ol paep blong hot wota we oli mekem ples i wom, oli brobrok, mo long rum blong mi, evri samting i kam aes. Wan dokta i luksave se klosap mi mi ded, ale hem i mekem rod blong mi save go stap long wan narafala rum blong kalabus, long ol wik we ples i kolkol moa.

Kasem Paoa Blong Winim Hadtaem Ya

Afta we man i stap long kalabus blong plante manis, tingting i save foldaon. Hemia nao samting we ol bos blong kalabus oli wantem. Be mi mi prea oltaem, nao tabu spirit blong Jeova mo ol vas blong Baebol we mi traehad blong tingbaot, oli givim paoa long mi.

Taem mi mi stap long Vladimir Prisen, mi kasem save long tok blong aposol Pol se, “mifala i gat trabol, be neva tingting blong mifala i foldaon,” mo “mifala i no save rod, be neva mifala i lus olgeta.” (2 Korin 4⁠:​8-10) Wan yia i pas, nao oli tekem mi mi gobak long kalabus blong Mordovia. Mi stap long ples ya gogo, long Epril 8, 1966, mi mi finisim panis blong 12 yia long kalabus. Taem oli letem mi mi gofri, oli raetem long pepa blong mi se oli “no save faenem rod blong stretem fasin” blong mi. Long tingting blong mi, hemia pruf se mi mi bin holemstrong long Jeova.

Plante man oli askem long mi olsem wanem mifala i bin kasem mo wokem ol kopi blong ol buk, taem mifala i stap long ol kamp mo kalabus blong Soviet Yunion, nating se ol bos blong kalabus oli traehad blong blokem mifala. Wan woman Latvia we i wan woman blong politik, i stap kalabus blong fo yia long Potma kamp blong ol woman. Hem i talem se rod blong kasem ol buk ya, hemia wan sikret we smol man nomo oli faenemaot. Long 1966, afta we hem i kamaot long kalabus, hem i raetem se: “Mi no save long wanem rod, be oltaem ol Witnes oli stap kasem plante buk lelebet.” Hem i finisim toktok blong hem, i se: “I olsem we ol enjel oli flae i kam long naet mo lego ol buk ya oli foldaon insaed long kalabus.” !Tru ya, mifala i save mekem wok blong mifala from help we God i givim nomo!

Wan Taem We Mifala i Fri Smol

Afta we mi mi kamaot long kalabus, olgeta we oli lukaot long wok blong prij oli askem long mi blong muv i go long wes Yukren, klosap long Moldova. Oli wantem se mi givhan long ol Kristin brata blong mifala we oli blong Moldova. Be from we mi bin stap long kalabus mo KGB i stap wajemgud mi, mi no save mekem plante samting. Afta we tu yia i pas, i luk olsem we bambae mi gobak long kalabus. Ale, mi muv i go long Soviet ripablik blong Kasakstan. Long ples ya, polis i jekem ol pepa blong ol man sam samtaem nomo. Long yia 1969, papa mama blong mi, tufala i sik tumas, ale mi muv i gobak long Yukren blong lukaot long tufala. Long taon ya Artyomosk we i stap long not saed blong bigfala taon ya Donetsk, wan haeman blong KGB i tok strong long mi se bambae hem i putum mi long kalabus bakegen, olsem mi talem long stat blong stori ya.

Biaen, i kam klia se polis ya i stap traem blong mekem mi mi fraet nomo. Oli no gat naf pruf blong sakem mi long kalabus bakegen. From we tingting blong mi i strong blong gohed long Kristin wok blong prij, mo from we ol KGB oli stap biaen long mi oltaem, mi mi gohed nomo blong lukaot long papa mama blong mi. Papa Mama tugeta i holemstrong long Jeova go kasem ded blong tufala. Papa i ded long Novemba 1969, be Mama i stap laef go kasem Februari 1976.

Taem mi kambak long Yukren, mi mi gat 40 yia blong mi. Long kongregesen we mi stap long hem taem mi stap lukaot long papa mama blong mi, i gat wan yangfala woman we nem blong hem Maria. Long Epril 1951, taem hem i gat eit yia nomo, gavman i bin sanem hem wetem papa mama blong hem oli aot long Moldova oli go long Saebiria, olsem oli bin mekem long famle blong mi. Maria i talem se, taem mi mi singsing, hem i laekem blong lesin. Hemia i statem fasin fren blong mitufala, mo nating se mitufala tugeta i bisi long wok blong prij, be mitufala i faenem taem blong frengud tugeta. Long yia 1970, mi mi pulum hem blong i mared wetem mi.

I no longtaem biaen, mitufala i gat wan smol gel, nem blong hem Lidia. Long 1983, taem Lidia i gat ten yia blong hem, wan man we fastaem hem i Witnes, i putum mi mi go long han blong ol KGB. Long taem ya, mi bin wok klosap ten yia finis olsem wan elda we i goraon blong visitim ol kongregesen long is Yukren. Long kot, samfala we oli agensem Kristin wok blong mifala, oli singaot sam man blong oli givim giaman witnes, ale kot i givim panis long mi blong stap faef yia long kalabus.

Long kalabus, oli no letem mi mi joen wetem ol narafala Witnes. Nating se mi stap mi wan blong plante yia, be i no gat wan man we i save blokem mi blong toktok mo kam klosap long Jeova, mo oltaem hem i givim paoa long mi. Mo tu, mi lukaot janis blong prij long ol narafala presina. Afta we mi stap fo yia long kalabus, oli letem mi mi kamaot mo mi joen bakegen wetem woman mo gel blong mi. Tufala i no bin lego Jeova.

Gobak Long Moldova

Mifala i stap wan yia bakegen long Yukren. Biaen, mifala i go stap bakegen long Moldova. Long ples ya, oli nidim plante moa brata we oli bigman long saed blong spirit mo we oli bin stanap strong longtaem long trutok. Soviet gavman i stap letem mifala i fri moa nao blong mekem sam samting. Ale, mifala i kamtru long Bălţi long yia 1988. Hemia ples we Maria i bin stap long hem 37 yia bifo, taem hem i no kalabus yet. Long 1988, long namba tu bigfala taon blong Moldova, i gat samwe long 375 Witnes. !Naoia i gat bitim 1,500! Nating se mifala i stap long Moldova, be mi mi stil goraon blong visitim ol kongregesen long Yukren.

Long Maj 1991, gavman i rejistarem skul blong mifala. Plante taosen man oli harem nogud from we Komunis rul i no bin givhan nating long olgeta. Plante oli no moa save rod mo oli no gat wan hop blong fiuja. Taswe, taem Moldova i kam wan independen ripablik, ol man raonabaot long mifala, mo samfala we fastaem oli mekem i nogud long mifala, oli kam olsem wan gudfala graon we i karem plante kakae long wok blong prij. Taem oli sanem mifala i go long kalabus long 1951, sam Witnes nomo oli stap long Moldova. Be naoia, i gat bitim 18,000 Witnes long smol kantri ya blong 4,200,000 man. !Tru ya, ol nambawan frut ya we mifala i haremgud tumas long hem, i mekem se mifala i fogetem ol nogud samting we i bin mekem mifala i safa!

Long 1995, helt blong mi i kam nogud, ale mi mas stop long wok ya blong visitim ol kongregesen. I gat sam taem we helt blong mi i mekem tingting blong mi i foldaon. Nating se i olsem, mi mi lanem finis se Jeova i save wanem we yumi nidim blong leftemap tingting blong yumi. Hem i givim stret samting we yumi nidim long stret taem. Sipos mi mi save statem laef blong mi bakegen, bambae mi no save jusum wan defren rod. Wan samting nomo we bambae mi wantem, hemia blong gat tingting we i strong moa long wok blong prij mo blong wok strong moa.

Mi mi ting se Jeova i blesem mi bigwan long laef blong mi, mo se olgeta man blong hem oli gat blesing blong hem, nating se oli kasem wanem trabol long laef blong olgeta. Yumi gat wan hop we i klia, wan bilif we i laef, mo promes ya se i no longtaem bambae yumi evriwan i gat nambawan helt long niufala wol we Jeova bambae i mekem.

[Futnot]

[Tok blong pija long pej 21]

Haos blong mifala long yia 1953, taem mifala i stap kalabus long Torba, Saebiria. Papa mo Mama (lefsaed), wetem brata blong mi, Vasile, mo boe blong hem (raetsaed)

[Tok blong pija long pej 21]

Long kalabus, long yia 1955

[Tok blong pija long pej 23]

Sam Kristin sista long Saebiria, taem Maria (lefsaed daon) i gat samwe long 20 yia

[Tok blong pija long pej 23]

Mitufala wetem gel blong mi, Lidia

[Tok blong pija long pej 23]

Mared blong mitufala long yia 1970

[Tok blong pija long pej 23]

Mi wetem Maria tede