Rerem Gel Blong Yu From Sikmun Blong Hem

Taem ol pikinini oli kasem yangtaem blong olgeta, bodi blong olgeta i jenis bigwan. Long saed blong ol gel, wan jenis we i soemaot se oli stap gruap, hemia faswan sikmun blong olgeta.

TAEM wan gel i kasem faswan sikmun blong hem, hem i save wari mo ating hem i fraet tu. Jenis ya i save mekem tingting blong hem i fasfas, olsem plante narafala jenis we oli kamaot long ol yangfala. Plante gel oli fraet mo wari from we narafala i bin givim rong save long olgeta, no from we oli no gat save nating long saed ya.

Ol gel we oli rere finis from faswan sikmun blong olgeta, oli haremgud moa. Be samfala we oli raetem ripot long saed blong ol gel, oli faenem se plante gel oli no gat save nating bifo we oli luk sikmun blong olgeta. Long 23 kantri oli askem kwestin long ol gel, nao oli faenem se 1 long evri 3 gel i no save nating long sikmun. From samting ya, ol gel ya oli no save wanem blong mekem taem oli luk sikmun blong olgeta.

Ol gel we oli harem nogud moa long faswan sikmun blong olgeta, hemia olgeta we oli no gat save long saed ya. Sam woman oli talem se taem oli bin luk faswan sikmun, oli “seksek,” oli “harem nogud long filing” blong olgeta, oli “sem,” mo oli “fraet.”

Klosap yumi evriwan yumi fraet taem yumi luk blad. Long tingting blong yumi, taem blad i ron, yumi gat kil mo yumi harem i soa. Taswe, sipos gel i no gat save mo i no rere from faswan sikmun blong hem, no sipos hem i gruap long kantri we i tabu blong tokbaot samting ya, no sipos hem i gat save we i no stret, no hem i no gat save nating, ale hem i save gat rong tingting long saed blong sikmun. Hem i save ting se hem i gat wan sik no wan kil samples, no maet hem i ting se sikmun i wan samting blong sem from.

Gel blong yu i mas save se i stret nomo we blad i ron taem hem i kasem sikmun, mo se hemia samting we i joen wetem gudfala helt, i no wetem sik. Yufala ol mama papa, yufala i save givhan long ol gel blong yufala blong oli no wari mo oli no fraet. ?Olsem wanem yufala i save mekem olsem?

Wok Blong Mama Papa i Impoten

I gat plante ples blong faenem save long saed blong sikmun. Ol skul tija mo ol dokta oli save givim save, mo i gat plante buk mo video kaset tu we oli givim gudfala save long saed ya. Plante mama papa oli luk se sipos oli yusum ol rod ya, oli faenem gudfala save long saed blong samting we i stap hapen long bodi blong woman long taem blong sikmun, mo tu, oli faenemaot samting we woman i save mekem blong stap klin mo helt long bodi blong hem long taem ya. Be maet ol gel oli gat sam narafala kwestin mo nid. Maet samfala oli save wanem blong mekem taem oli luk sikmun, be oli no save olsem wanem blong winim filing blong olgeta we i olbaot long taem ya.

Ol bubu woman, ol bigfala sista, mo antap moa, mama blong ol gel ya oli save givim ol narafala save we oli nidim, mo oli save givhan long olgeta blong winim filing blong olgeta tu. Bighaf blong ol gel oli wantem se mama blong olgeta nao i givim save long olgeta long saed blong sikmun.

?Olsem wanem long ol papa? Plante gel oli sem blong toktok wetem papa blong olgeta long saed ya. Sam gel oli wantem se papa blong olgeta i kasem save long filing blong olgeta mo i leftemap tingting blong olgeta. Be sam narafala gel oli no wantem se papa i kam insaed long bisnes ya.

Long plante kantri, long ol yia we oli jes pas, i gat plante moa papa we olgeta nomo oli stap lukaot long ol pikinini blong olgeta, from we mama i no moa stap.a Taswe, ol papa tu oli mas lanem blong tijim ol gel blong olgeta long saed blong sikmun. Oli mas save ol stamba samting long saed ya, wetem ol narafala jenis we bambae oli kamaot long bodi mo filing blong gel blong olgeta. Maet ol papa ya oli save toktok wetem stret mama blong olgeta bakegen no wetem stret sista blong olgeta, blong kasem advaes mo help long saed ya.

Wetaem Blong Statem Ol Storian

Long ol kantri we oli gat plante samting, olsem Yunaeted Stet, Saot Koria, mo sam kantri long Wes Yurop, ol gel oli luk faswan sikmun taem oli gat 12 no 13 yia. Be sam long olgeta oli kasem sikmun taem oli gat 8 yia nomo. Mo sam oli defren bakegen, oli jes kasem sikmun taem oli gat 16 no 17 yia. Long sam ples long Afrika mo Esia, ol gel oli olfala moa taem oli luk faswan sikmun. Olsem nao, long Naejeria, ol gel oli kasem sikmun taem oli gat samwe long 15 yia. Yia we gel i kasem faswan sikmun blong hem i dipen long plante samting. Maet hem i sem mak long ol woman long laen blong hem bifo, maet hem i gruap long wan ples we i pua no wan ples we i rij, i dipen long kakae we hem i kasem, eksasaes we hem i mekem, mo ples we hem i laef long hem, sipos i antap long ol bigfala hil no i daon long solwota.

I moagud blong givim save long gel blong yu bifo we hem i luk faswan sikmun blong hem. Taem hem i smol nomo, maet taem i gat samwe long eit yia, yu save stat blong storian wetem hem long saed blong ol jenis we bambae hem i luk long bodi blong hem mo long saed blong sikmun. Maet yu ting se hem i smol tumas. Be sipos gel blong yu i gat eit no ten yia, ating ol homon long bodi blong hem we oli stap kam plante, oli mekem sam jenis finis insaed long bodi blong hem. Bambae yu stat luk sam jenis afsaed tu we oli soemaot se hem i kasem yangtaem blong hem, olsem, titi blong hem i stat solap, mo i gat moa hea long bodi blong hem. Plante gel oli gru hareap jes bifo we oli luk faswan sikmun blong olgeta, oli kam longfala mo oli tekem sam kilo.

?Olsem Wanem Blong Storian Long Saed Ya?

Plante gel oli wantem save wanem bambae i hapen taem oli kasem sikmun. Ating oli harem sam gel long skul oli tokbaot bisnes ya. Olgeta gel oli gat kwestin, be plante gel oli faenem i had blong askem kwestin. Maet oli sem blong tokbaot samting ya.

Sem mak long ol mama papa. Nating se klosap oltaem mama nao i givim save long saed blong sikmun, be plante mama oli harem se oli no gat naf save mo oli sem blong tokbaot bisnes ya. Ating yu tu yu harem olsem. ?Taswe, olsem wanem blong statem wan storian wetem gel blong yu long saed blong sikmun?

Ol gel we oli no gat 13 yia yet, oli naf blong kasem save long ol klia, isi tok. Maet yu talem long gel blong yu se bambae hem i kasem sikmun wan taem long wan manis, mo yu save talem hamas dei bambae sikmun i gohed, mo hamas blad bambae hem i lusum. Ale long ol faswan storian blong yutufala, i gud blong tokbaot ol stamba samting we hem i nidim blong save, mo wanem we hem i mas mekem taem hem i kasem sikmun. Mo tu, maet yu mas ansarem ol kwestin olsem: ?Bambae mi harem olsem wanem? ?Taem blong sikmun bambae i olsem wanem?

Biaen, long ol narafala storian, maet yu save tokbaot wanem i hapen insaed long bodi blong gel taem hem i kasem sikmun. Sipos yu askem long dokta no yu luk long laebri no long stoa blong salem ol buk, yu save faenem ol gudfala save. Ol buk ya oli save givhan blong eksplenem gud ol samting we i hapen. Maet sam gel oli laekem moa blong ridim ol buk ya olgeta nomo. Be sam gel oli glad sipos yu ridim buk ya wetem olgeta.

I gud yu jusum wan ples we i kwaet blong storian wetem gel blong yu. Stori fastaem long saed blong fasin blong gruap mo ol jenis we oli kamaot long bodi taem gel i kasem yangtaem blong hem. Yu save talem samting olsemia: “I no longtaem bambae yu luk wan jenis i kamaot long bodi blong yu we i hapen long evri gel. ?Yu yu save wanem?” Sipos mama nao i stap storian, hem i save tokbaot wanem i bin hapen long hem. Maet hem i stat olsem: “Taem mi mi yangfala olsem yu, mi tingbaot se bambae i olsem wanem taem mi kasem sikmun. Ol fren blong mi long skul oli tokbaot samting ya long mi. ?Olsem wanem? ?Ol fren blong yu oli bin talem wan samting long yu?” I gud blong faenemaot wanem we hem i save finis long saed blong sikmun, mo blong stretem ol tingting we oli rong. Yu mas tingbaot se long ol faswan storian blong yutufala, gel blong yu bambae i no toktok plante, maet i no toktok nating.

From we yu yu bin wari mo fraet bifo long faswan sikmun blong yu, yu save tokbaot ol filing blong yu. ?Wanem save we yu yu nidim? ?Yu bin askem wanem kwestin? ?Wanem save we i rili givhan long yu? Traehad blong givim stret tingting long gel blong yu. Talem ol gudfala samting mo ol nogud samting long saed blong sikmun. Yu mas glad blong ansa long ol kwestin blong hem.

Gohed Blong Tijim Hem

I no wan storian nomo we bambae i tijim gel blong yu long saed blong sikmun. Yu mas gohed nomo blong tijim hem. Yu no nid blong talem evri samting wantaem nomo. Sipos yu givim plante tumas save, gel blong yu i save fraet. Ol pikinini oli stap lanem samting sloslo nomo. Mo tu, maet yu mas talem ol semfala save bakegen mo bakegen. Taem ol gel oli kam bigwan moa, oli naf blong kasem save long plante moa samting.

Wan narafala samting, se tingting blong ol gel long saed blong sikmun i stap jenis taem oli kam bigwan moa. Afta we gel blong yu i stap kasem sikmun longtaem lelebet, ating bambae hem i gat ol niufala wari mo kwestin we hem i wantem tokbaot. Taswe, yu mas gohed oltaem blong givim save long hem mo blong ansarem ol kwestin blong hem. Tokbaot ol save we i stret long nid blong hem mo long yia blong hem, mo ol samting we hem i naf blong kasem save long hem.

Yu Nao Yu Mas Toktok

?Be olsem wanem sipos i luk olsem se gel blong yu i no wantem toktok long saed ya? Maet hem i fraet blong tokbaot samting we i bisnes blong hem nomo. Maet hem i nidim we smoltaem i pas nao bambae hem i no moa sem blong askem kwestin long saed ya. Maet hem i talem se hem i save finis evri samting we hem i nidim blong save.

Long Yunaeted Stet, samfala oli raetem wan ripot long saed blong ol gel long klas sikis. Oli faenem se bighaf blong ol gel ya oli ting se oli rere finis from sikmun blong olgeta. Be taem oli askem sam moa kwestin long olgeta, i klia se oli no gat naf save, mo se oli bilivim ol rong save we i stanap long kalja mo kastom blong olgeta. Taswe, nating sipos gel blong yu i talem se hem i rere finis, be i nidim yet we yu yu toktok wetem hem long saed ya.

Ating yu nao yu mas jusum wan stret taem mo statem wan smol storian wetem gel blong yu, mo yu mas gohed oltaem blong mekem olsem. Yes, hemia i wok blong yu olsem mama no papa. Gel blong yu i nidim help blong yu, nating se hem i luksave samting ya no i no luksave. Maet yu harem se yu yu no naf mo yu no save olsem wanem blong storian, be yu no mas sakemaot wok ya. Yu mas gat longfala tingting. Sloslo, bambae gel blong yu i gat tangkiu from ol traehad blong yu, mo bambae hem i luksave se ol storian ya oli givhan bigwan long hem.

[Futnot]

[Tok blong makem poen long pej 11]

I moagud blong givim save long gel blong yu bifo we hem i kasem faswan sikmun blong hem

[Bokis blong pija long pej 13]

?OLSEM WANEM BLONG STORIAN LONG GEL BLONG YU LONG SAED BLONG SIKMUN?

❖ Faenemaot wanem we hem i save finis. Stretem ol rong tingting. Meksua se yu mo hem tugeta i gat stret save.

❖ Tokbaot samting we i bin hapen long yu. Taem yu tokbaot wanem i bin hapen long yu long faswan sikmun blong yu, yu save givhan long gel blong yu olsem hem i nidim long saed blong filing blong hem.

❖ Givim advaes we i stret long nid blong hem. Klosap olgeta gel oli askem ol kwestin olsem: “?Bambae mi mekem wanem sipos mi kasem sikmun long skul?” “?Wanem ol samting we mi mas yusum taem mi kasem sikmun?” “?Olsem wanem mi yusum olgeta?”

❖ Givimaot stret save long fasin we i isi blong kasem. Givim ol save we i stret long yia blong gel blong yu mo we hem i naf blong kasem.

❖ Gohed blong givim save. Statem ol storian ya bifo we gel blong yu i kasem faswan sikmun blong hem, mo storian bakegen mo bakegen taem we hem i nidim. Gohed long ol storian ya afta we hem i kasem sikmun tu.

[Tok blong pija long pej 12]

Soem se yu kasem save long filing blong gel blong yu. Maet hem i fraet blong tokbaot samting ya we i bisnes blong hem nomo