Ol Jenis Long Bodi Taem Mi Stap Gruap—?Olsem Wanem Mi Save Lan Long Olgeta?

“Taem ya we i gat ol jenis long bodi, i had long ol gel. Oli harem i soa long bodi, oli harem se oli doti, mo tingting blong olgeta i fasfas. !I luk olsem se evri samting long saed blong taem ya i nogud!”—Oksana.

“Fasin blong mi i stap jenis oltaem, fastaem mi hapi, be wan minit biaen mi harem nogud. Mi no save sipos hemia i nomol long mifala ol boe, be mi mi olsem nao.”—Brian.

Taem ya we i gat ol jenis long bodi blong yangfala, i olsem we yu ron long roller coaster—!yu harem gud bitim mak be long semtaem yu fraet! ?Olsem wanem blong winim ol filing ya we oli stap jenis oltaem?

• Taem ya we yangfala i stap gruap

• Ol jenis long bodi

• Ol jenis long filing

• Samting we yu save mekem

Taem ya we yangfala i stap gruap

Blong talem stret, taem ya i impoten from i halpem yu blong yu gruap long bodi mo filing blong yu. I gat ol jenis long bodi mo ol homon, we oli rerem yu blong mekem mo bonem pikinini.

Hemia i no min se yu rere blong kam wan papa o wan mama. Be ol jenis ya oli soemaot se yu no moa wan pikinini. Maet yu harem se yu wantem tumas blong kam bigman, be yu sad tu blong lego ol yia blong pikinini.

Kwestin: Long tingting blong yu, ?ol jenis ya oli mas stat taem yu gat hamas yia?

• 8

• 9

• 10

• 11

• 12

• 13

• 14

• 15

• 16

Ansa: Ol jenis ya oli save hapen long eniwan long ol yia ya.

Hemia i min se yu no nid blong wari tumas sipos yu gat samwe long 15 yia be yu no luk ol jenis ya yet, o yu no gat 10 yia be yu luk ol jenis ya oli stat. Yu no save kontrolem wetaem ol jenis ya bambae oli kamaot long bodi mo filing blong yu.

Ol jenis long bodi

Ating jenis ya we ol narafala bambae oli luk, hemia se yu kam longfala kwiktaem. Be wan problem se, i no evri pat blong bodi we i gru kwik olsem. Taswe yu no mas sapraes sipos yu stambol o yu mekem sam samting oli foldaon. Biaen, ol pat blong bodi blong yu bambae oli gru gud.

I gat plante narafala jenis tu we oli save kamaot long bodi blong yu.

Ol jenis long ol boe:

• Ol pat blong bodi we oli yusum long saed blong seks, oli kam bigwan moa

• Hea i gru aninit long tufala han, long tabu pat blong bodi, mo long fes

• Voes i jenis

• Tabu pat blong bodi blong mekem seks i stat blong wok, mo wota blong man i save ron long naet

Ol jenis long ol gel:

• Tufala titi i gru

• Hea i gru aninit long tufala han, mo long tabu pat blong bodi

• Oli luk sikmun blong olgeta

Ol jenis long ol boe mo ol gel tugeta:

• Bodi i smel from swet mo ol bakteria.

  Advaes: Wasem gud bodi blong yu, mo yusum spre blong blokem smel blong swet.

• Ol lam long fes mo sam pat blong bodi, from we bakteria i fas long ol smosmol hol long skin.

  Advaes: I tru se i no isi blong blokem ol lam, be bambae i givhan long yu sipos yu wasem fes blong yu plante, mo yu yusum wota we i gat meresin long hem blong klinim skin.

Ol jenis long filing

Ol homon we oli mekem ol jenis long bodi blong yu oli save afektem ol filing tu. Maet ol filing blong yu oli stap jenis mo oli olbaot.

“Wan dei yu stap krae, long nekis dei yu harem gud. Wan minit yu kros, long nekis minit yu go haed long rum blong yu from tingting i foldaon.”—Oksana.

Mo tu, plante yangfala oli sem bigwan, oli ting se evriwan oli stap wajem mo jajem olgeta. !Mo from we bodi blong yu i luk defren, yu stap sem moa!

“Taem mi stap gruap, mi benem tufala solda blong mi mo mi werem ol bigbigfala sot. Mi save from wanem bodi blong mi i stap jenis, be mi harem se i no nomol mo mi sem bigwan. Mi harem se i narakaen.”—Janice.

Maet filing we i jenis moa, hemia filing we boe i gat long gel mo gel i gat long boe.

“Mi no moa stap kros long ol boe. Naoia mi stat blong harem se mi gat filing long olgeta, mo mi harem se i oraet nomo sipos mi laekem wan boe. Blong talem stret, ol yangfala we oli stap gotru long taem ya oli wantem tumas blong tokbaot ‘hu i laekem hu.’”—Alexis.

Long taem ya we ol jenis oli kamaot long bodi blong yangfala, sam boe oli harem se oli gat filing long ol boe, mo sam gel oli harem se oli gat filing long ol gel. Sipos yu tu yu gat filing olsem, yu no mas ting se yu homoseksuol. Long plante yangfala, ol filing ya oli lus sloslo.

“From we mi stap skelem mi wetem ol narafala boe, mi stat blong gat filing long olgeta. Sam yia biaen nomo, mi stat blong gat filing long ol gel. Naoia ol filing ya blong homoseksuol oli lus olgeta.”—Alan.

Samting we yu save mekem

• Traehad blong gat positif tingting. Blong talem stret, taem ya we bodi mo filing blong yu i jenis, hemia samting we i mas hapen. Sam ya we Deved i raetem i save mekem tingting blong yu i strong, hem i se: “Mi mi presem yu from we yu mekem mi long wan fasin we i nambawan tumas, mo mi sapraes tumas from.”—Ol Sam 139:14.

• Yu no mas skelem yu wetem narafala, mo yu no mas wari se yu no luk naes. Baebol i talem se: “Man i lukluk bodi nomo, be Jehova i lukluk samting we i stap long hat.”—1 Samuel 16:7.

• Mekem eksasaes mo tekem taem blong spel tu. Sipos yu slip gud, bambae yu no kros tumas, yu no stres, mo tingting bambae i no foldaon tumas.

• Sakemaot ol nogud tingting long saed blong yu wan. ?I rili tru se evriwan i stap wajem yu? Nating sipos samfala oli jikim yu from ol jenis long bodi blong yu, yu no mas letem tingting blong yu i foldaon. Baebol i talem se: “Yu no mas tingting tumas long ol toktok we ol man oli stap talem.”—Prija 7:21.

• Lanem blong kontrolem ol filing blong seks mo no folem olgeta. Baebol i talem se: “!Yufala i mas ronwe long enikaen doti fasin blong seks! . . . Man we i mekem enikaen doti fasin blong seks, hem i mekem sin agensem prapa bodi blong hem.”—1 Korin 6:18.

• Toktok long papa mo mama blong yu o wan narafala bigman we yu trastem hem. I tru, maet fastaem yu sem blong tokbaot samting ya. Be bambae yu glad taem oli givim gudfala advaes long yu.—Ol Proveb 17:17.

Stamba poen: Long taem ya we ol jenis oli kamaot long bodi blong yu, yu save fesem hadtaem. Be samting ya i givim janis long yu blong gru, i no long saed blong bodi nomo, be long tingting, filing, mo spirit.—1 Samuel 2:26.