OL YANGFALA OLI ASKEM
?Mi Save Mekem Wanem Taem Filing Blong Mi i Stap Jenis Oltaem?
“Wan dei mi harem gud, long nekis dei mi harem nogud. Ol samting we i isi blong mekem yestede, mi luk se tede i had we i had.”—Carissa.
?Filing blong yu i stap jenis oltaem, olsem we yu ron long wan rod we i gat plante hol long hem?a Sipos yes, haf ya bambae i givhan long yu.
?From wanem samting ya i stap hapen?
Ol jenis we oli hapen long bodi blong yu taem yu stap gruap, oli save mekem se samtaem yu harem gud be samtaem yu harem nogud. Nating se yu gat klosap 20 yia, be maet yu sapraes yet olsem wanem ol filing blong yu oli stap jenis oltaem.
Sipos ol jenis ya oli mekem tingting blong yu i fasfas, yu mas tingbaot se plante long ol filing ya oli kamaot from ol jenis we oli stap hapen long bodi blong yu, mo from we plante taem ol yangfala oli harem se oli no sef mo oli no sua gud long plante samting. Be gudfala nius se, yu yu naf blong kasem save long ol filing blong yu mo lanem blong winim olgeta.
Samting we i tru: I impoten blong lanem blong winim ol nogud filing blong yu taem yu yangfala yet, from we bambae yu nidim fasin ya plante taem long laef blong yu biaen.
Ol filing blong harem nogud oli olsem ol hol long rod. Sipos yu waes, yu save trikim bighaf blong ol hol ya, mo harem gud long wokbaot blong yu
Tri samting we yu save mekem
Storian wetem narafala. Baebol i talem se: “Wan tru fren i soemaot lav oltaem, mo hem i wan brata we i kamtru long yu long taem blong trabol.”—Ol Proveb 17:17.
“I gat wan fren blong famle we mi singaotem se ‘anti.’ Hem i stap lesin gud long mi, mo mi harem se mi no fraet blong toktok long hem. Taem tingting blong mi i stret, hem i glad long mi, mo taem tingting blong mi i no stret, hem i stretem mi long gudfala fasin.”—Yolanda.
Advaes: I moa gud yu storian wetem papa o mama blong yu o wan narafala fren we i bigman finis mo yu trastem hem, i bitim we yu storian wetem wan yangfala we i stap gotru long semfala trabol olsem yu.
Raetemdaon ol filing blong yu. Baebol i tokbaot Job we i harem nogud tumas, i se: “Bambae mi talemaot ol samting we mi stap komplen from. !Bambae mi toktok from mi harem nogud tumas!” (Job 10:1) Yu save storian wetem narafala, mo wan narafala rod blong “toktok,” hemia blong raetemdaon ol filing blong yu.
“Oltaem mi karem wan smol notbuk wetem mi. Taem mi harem nogud from wan samting, mi raetemdaon. Samting ya i olsem wan gudfala meresin blong mi.”—Iliana.
Advaes: Karem wan notbuk wetem yu blong raetemdaon ol filing blong yu, samting we i mekem ol filing ya oli kamaot, mo samting we yu save mekem blong winim olgeta. I gat wan pepa blong fulumap i stap wetem haf ya we i save givhan long yu.
Prea. Baebol i talem se: “Yu sakem ol hevi baden blong yu long Jehova, mo hem bambae i sapotem yu. Bambae hem i neva letem wan stret man i foldaon.”—Ol Sam 55:22.
“Taem mi harem nogud, mi prea plante long Jehova. Oltaem mi harem gud afta we mi talemaot evri samting long hem.”—Jasmine.
Advaes: Taem yu harem nogud mo yu stap wari, traem tingbaot tri samting long laef blong yu we yu save talem tangkiu from. Taem yu prea long Jehova, askem long hem blong i halpem yu, be yu no mas fogetem blong talem tangkiu tu from ol blesing we yu kasem.
a Haf ya bambae i tokbaot olsem wanem filing blong ol yangfala i save jenis oltaem. Sipos yu gat sik ya bipolar o tingting blong yu i foldaon olgeta, yu save luk haf ya “?Olsem Wanem Mi Save Winim Tingting We i Foldaon?”