3 | Ol Eksampol Long Baebol Oli Save Givhan

BAEBOL I TOKBAOT . . . Sam man mo woman bifo we olgeta tu we oli “gat filing olsem yumi.”—JEMES 5:17.

Hemia i Minim Wanem

Baebol i fulap long ol trufala stori blong ol man mo woman we oli gat ol defdefren filing. Taem yumi ridim stori blong olgeta, maet yumi kasemsave long filing blong sam long olgeta.

Hemia i Givhan Olsem Wanem

Yumi evriwan i nidim we narafala i kasemsave filing blong yumi. Hemia i tru moa taem tingting blong yumi i trabol. Taem yumi ridim ol stori long Baebol, maet yumi faenem wan man we i gat sem tingting o filing olsem yumi. Hemia i givhan long yumi blong tingbaot se i no yumi nomo we i stap fesem ol problem ya, so yumi no stap yumi wan.

Long Baebol i gat plante defren toktok blong ol man we oli harem se oli nogat paoa mo oli nidim help. Maet samtaem yu talem se: ‘Mi harem se i naf nao.’ Moses, Elaejah mo Deved tu oli gat tingting ya.—Namba 11:14; 1 King 19:4; Ol Sam 55:4.
Baebol i tokbaot wan woman, nem blong hem Hana we hem i “harem nogud tumas” from i no save gat pikinini, mo narafala waef blong man blong hem i stap jikim hem.—1 Samuel 1:6, 10.
Baebol i tokbaot wan man we maet yu gat sem filing olsem hem, nem blong hem Job. Nating se hem i wan man blong bilif, be tingting blong hem i foldaon bigwan mo i talem se: “Mi no laekem nating laef blong mi. Mi no moa wantem gohed blong laef.”—Job 7:16.

Taem yumi save olsem wanem ol man ya long Baebol oli winim ol negatif tingting we oli gat, hemia i soemaot se yumi tu yumi save winim ol negatif tingting we yumi gat.

Baebol i Givhan Long Kevin

Sik Ya Bipolar Disorder i Spolem Mi

“Taem mi gat klosap 50 yia, mi kasem wan sik long tingting we i mekem se fasin blong mi i jenis oltaem (bipolar disorder). Samtaem mi harem se mi save winim eni problem we mi kasem. Be sam narafala taem, mi harem se mi no moa wantem laef.”

Baebol i Givhan Long Mi

“Stori blong Baebol we i givhan long mi hemia stori blong aposol Pita. Hem i bin mekem sam mastik we i mekem hem i harem se hem i gud blong nating nomo. Be i bitim we Pita i gohed blong tingbaot samting ya, hem i spenem taem wetem ol fren we oli kea long hem. Taem bipolar disorder i afektem mi, mi harem nogud from ol slak fasin blong mi, mo mi harem se mi gud blong nating nomo. Olsem Pita, mi traehad blong joen wetem ol fren blong mi we oli givhan long mi blong mi no givap.

“Wan narafala stori we i givhan bigwan, hemia stori blong King Deved. Plante taem tingting blong hem i foldaon from situesen we hem i stap long hem mo from ol mastik blong hem. Mi kasemsave filing blong hem, from we samtaem mi tu mi talem o mekem sam samting we mi rigret from. Mi makem se ol tok blong Deved long Ol Sam 51 i rili givhan long mi. Long vas 3, Deved i se: ‘Mi save gud ol rong blong mi, mo sin blong mi i stap oltaem long fored blong mi.’ Hemia sem filing we mi gat taem tingting blong mi i foldaon, mo i had blong gat positif tingting. Mo tu mi kasemsave vas 10, taem hem i se: ‘O God, plis yu wokem wan hat we i klin gud insaed long mi, mo yu putum wan niufala tingting insaed long mi, yes, wan we i stap strong oltaem.’ Mi tu mi askem God, blong i halpem mi blong gat stret tingting long mi wan. Mo vas 17 tu i givhan long mi, i se: ‘O God, man we hat blong hem i brok mo i harem nogud tumas, bambae yu no tanem baksaed long hem.’ Vas ya i mekem mi sua se God i lavem mi.

“Taem mi fokas long ol eksampol we i stap long Baebol mo ol samting we God i givim long mi naoia, hemia i mekem hop blong mi long saed blong fiuja i kam strong moa. Naoia ol promes blong Baebol oli kam ril long tingting blong mi, mo hemia i halpem mi blong holemstrong.”