2 | “Ol Tok Blong Baebol Oli Mekem Yumi Harem Gud”

BAEBOL I TALEM SE: “Olgeta tok we oli raetem bifo, oli blong tijim yumi. Nao yumi save gat hop from we Ol Tok Blong Baebol oli mekem yumi harem gud mo oli mekem se yumi save stanap strong longtaem.”—ROM 15:4.

Hemia i Minim Wanem

I gat sam gudfala advaes long Baebol we i save givim paoa long yumi, blong sakemaot ol negatif tingting we yumi gat. Mo tu, hem i givim hop se wan dei bambae yumi no moa harem nogud long tingting mo filing.

Hemia i Givhan Olsem Wanem

Yumi evriwan i harem nogud samtaem. Be olgeta we oli kasem dipresen o oli wari, oli stap harem nogud evritaem. ?Olsem wanem Baebol i save givhan?

Baebol i fulap long ol positif tingting we yumi save ridim blong fogetem ol negatif tingting. (Filipae 4:8) Mo i save kamfotem yumi mo mekem tingting blong yumi i kwaet nao yumi naf blong kontrolem ol filing blong yumi.—Ol Sam 94:18, 19.
Baebol i save givhan long yumi blong sakemaot tingting ya se yumi gud blong nating nomo.—Luk 12:6, 7.
I gat plante vas long Baebol we i soemaot se yumi no stap yumi wan mo se God we i Krieta blong yumi, i kasemsave filing blong yumi.—Ol Sam 34:18; 1 Jon 3:19, 20.
Baebol i promes se God bambae i mekem se yumi no moa harem nogud long tingting o ol nogud memori. (Aesea 65:17; Revelesen 21:4) Sipos yumi stap safa from ol nogud tingting mo filing, promes ya i save givhan long yumi blong no fraet mo stanap strong.

Baebol i Givhan Long Jessica

Dipresen i Spolem Mi

“Taem mi gat 25 yia, mi wari tumas nao tingting blong mi i foldaon bigwan, mo ol dokta oli faenemaot se mi gat sik ya dipresen. Samtaem ol nogud memori blong bifo oli stap kambak long tingting blong mi. Mo ol dokta oli eksplenem se mi kasem dipresen from ol negatif tingting we mi gat long samting we i bin hapen bifo. Oli givim sam meresin blong givhan long mi mo mi mas toktok plante wetem dokta blong faenemaot mo stretem ol negatif tingting we mi gat.”

Baebol i Givhan Long Mi

“Taem dipresen i afektem mi, mi fraet bitim mak, mi wari tumas, mo mi no save slip gud. Plante taem long naet, mi stap gat ol nogud tingting ya bakegen mo i had blong mi kontrolem. Ol Sam 94:19 i soem se, God i save kamfotem yumi mo mekem tingting blong yumi i kwaet taem yumi wari bitim mak. So klosap long bed blong mi, mi putum wan Baebol mo wan notbuk we mi raetem ol vas we i leftemap tingting blong mi. So taem mi no save slip, mi ridim ol vas ya nao mi harem gud bakegen.

“Baebol i enkarejem yumi blong sakemaot ol tingting we oli no laenap wetem tingting blong God. Bifo mi gat tingting ya se i no gat man i laekem mi mo mi gud blong nating nomo. Be biaen, mi lanem se ol tingting ya oli no laenap wetem Baebol, from we Baebol i talem se God i wan Papa we i lavem, i sore, mo i kea long yumi wanwan. Sloslo ol tingting blong mi oli no moa kontrolem mi, be mi nao mi kontrolem olgeta. Mi lanem blong luk mi wan olsem we God i luk mi. Hemia i givhan bigwan long mi blong no ting nating long mi wan.

“Mi luk fowod long taem ya we bambae yumi no moa tingbaot ol nogud memori mo ol negatif tingting. Taem mi tingbaot se wan dei bambae i no moa gat ol problem long tingting, hemia i givim paoa blong mi stanap strong mo luk fowod long taem ya we bambae mi no moa nid blong faet agensem dipresen.”[6]