Ol Yangfala Oli Askem . . .
?Bambae Mi Mekem Wanem Long Laef Blong Mi?
“Fastaem mi no wari long saed blong fiuja. Be taem mi stap long laswan yia blong skul blong mi, mi luksave se i no longtaem nao bambae mi save i olsem wanem blong wok, winim mane, mo pem ol bil.”—Alex, 17.
TAEM yu pikinini yet, ating yu stap tingbaot wanem wok we bambae yu mekem taem yu kam bigman. ?Be naoia, olsem wanem long ol tingting ya? ?Yu yu wari lelebet se bambae yu winim mane olsem wanem blong lukaot long yu wan? Sipos hemia wari blong yu, i gud yu save se i gat plante narafala yangfala we oli olsem yu. Wan buk (Career Coaching Your Kids) i talem se: “Desisen we plante yangfala oli faenem i had tumas blong mekem, hemia ol desisen blong jusum wok.”
Be maet yu yu no wari nating long saed blong wanem wok bambae yu mekem. Maet tingting blong yu i stap naoia long pleplei fastaem. I no rong blong gat gudtaem, from we Baebol i talem se “naoia we yufala i yangfala yet, i gud yufala i stap mekem ol fasin we yufala i save harem gud long hem.” (Prija 11:9) Be i gud tu we yu stat tingbaot wanem bambae yu mekem long laef blong yu biaen. Ol Proveb 14:15 i talem se: “Man we i gat hed, hem i stap lukluk gud long rod we bambae i folem.” ?Olsem wanem yu save lukluk gud long rod we bambae yu folem?
‘Plan Fastaem Long Samting We Yu Wantem Mekem’
Tingbaot sipos yu wantem wokbaot long wan narafala kantri farawe. Ating fastaem yu mas lukluk wan map blong ples ya we bambae yu go long hem, blong yu no lus. Hemia i sem mak taem yu stap rerem fiuja blong yu. Wan yangfala man, nem blong hem Michael, we i wok long wan branj ofis blong ol Witnes blong Jeova, i talem se: “I gat plante samting we yu save jusum.” ?Olsem wanem bambae yu save weswan samting nao blong jusum? Michael i talem se: “Hemia bambae i dipen long wanem mak nao yu wantem kasem long laef blong yu.”
Mak we yu wantem kasem long laef blong yu i olsem kantri ya farawe we yu wantem wokbaot long hem. Sipos yu no lukluk wan map we i soemaot ol ples blong kantri ya long yu, bambae yu stap wokbaot olbaot nomo, mo maet yu lusum rod. Ating fastaem bambae yu sidaon, yu jekem map ya mo yu lukluk wanem rod bambae yu folem. Hemia nao advaes we Ol Proveb 4:26 i talem se: “Yu mas mekem gudfala plan fastaem, long ol samting we yu wantem mekem.”
Long ol yia we oli kam, bambae yu gat plante bigfala desisen blong mekem long saed blong wosip, wok, long saed blong mared, famle, mo plante narafala impoten samting bakegen. Bambae i moa isi long yu blong mekem desisen we i waes sipos yu save fastaem se yu yu wantem kasem wanem mak. Taem yu stap tingbaot se wanem rod bambae yu folem, i olsem we yu stap lukluk map fastaem bifo we yu go wokbaot. Be taem yu mekem olsem, i gat wan impoten samting blong tingbaot.
‘Tingbaot God We i Mekem Yu’
Sipos yu yu wantem kasem trufala glad, yu mas tinghevi long ol tok ya blong waes King Solomon se: “God i mekem yumi, mo naoia we yufala i yangfala yet, oltaem yufala i mas tingbaot hem.” (Prija 12:1) Tingting ya blong wantem mekem God i glad i mas lidim yu taem yu jusum rod we yu folem long laef blong yu.
?From wanem i impoten blong mekem God i glad? Long Revelesen 4:11 Baebol i talem se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” Yes, olgeta man long heven mo long wol oli mas gat bigfala tangkiu long Man ya we i Wokem Olgeta. ?Yu yu talem tangkiu long hem from we hem i givim “laef mo win mo olgeta samting” long yu? (Ol Wok 17:25, NW ) ?Yu yu no harem se yu wantem givim samting i gobak long Jeova God blong soem tangkiu we yu yu gat from olgeta samting we hem i givim long yu?
Plante yangfala Witnes blong Jeova we oli tingbaot Man ya we i Wokem Olgeta, oli jusum blong joen long wok blong God fultaem. Wok blong God i wan wok we i hae mo we man i ona long hem, mo i wan wok tu we i karem plante blesing. (Malakae 3:10) Be yu mas tingting gud fastaem. Maet yu save askem long yu wan se: ‘?Mi mi gat gudhan blong mekem wanem? ?Gudhan ya bambae i save halpem mi blong kasem samting we mi nidim long laef nao mi save joen long wok blong God fultaem?’
Kelly we naoia hem i gat 27 yia blong hem, i stat taem hem i yangfala blong mekem plan long saed blong laef blong hem. Mak blong hem i klia long tingting blong hem. Hem i wantem mekem wok blong paenia. Nao taem hem i kam klosap long 20 yia blong hem, hem i stat tingbaot wanem kaen wok nao we bambae i stret long hem. Hem i se: “Mi mas faenem wan wok we bambae i save sapotem mi blong mi save mekem wok blong paenia.”
Kelly i tekem kos long haeskul blong kam asisten blong dokta blong tut. Hem i lan kwik mo i winim wan praes tu long wan kompetisin long provins blong hem. Be nating se hem i gud long wok ya, hem i no fogetem mak we hem i gat fastaem. Kelly i talem se: “Wok blong paenia, hemia nao wok we mi mi wantem mekem. Ol narafala samting oli stap long seken ples nomo.” Tede, Kelly i stap yet long wok blong paenia. Hem i se: “Mi harem mi glad long desisen ya we mi bin mekem, hem i beswan desisen blong mi.”
Askem Advaes
Taem yu stap wokbaot long wan kantri we yu neva go long hem bifo, ating yu folem wan map, be samtaem bambae yu mas askem advaes tu long ol manples. Yu save mekem sem samting taem yu stap mekem plan from laef blong yu long fiuja. Askem advaes long narafala man. Ol Proveb 20:18 (NW ) i talem se: “Ol advaes oli save mekem ol plan oli stanap strong.” Yu save kasem plante gudfala advaes long papa mama blong yu. Mo yu save askem advaes tu long olgeta we oli bigman finis long ol Kristin fasin mo we yu luk long laef blong olgeta se oli stap folem waes blong God. Roberto i givim advaes ya: “Lukluk olgeta we oli givim gudfala eksampol long kongregesen blong yu mo long nara ples bakegen we yu savegud olgeta. Olgeta ya oli save talem sam gudfala advaes long yu we samtaem maet bambae yu sapraes long hem.”
Be Jeova God nao we i wantem givhan moa long yu i bitim eni narafala man. Hem i wantem halpem yu blong tekem ol desisen we oli save mekem yu yu harem gud. Taswe i gud yu askem hem blong halpem yu blong ‘traem save olgeta samting we hem i wantem blong yu yu mekem.’ (Efesas 5:17) Sipos yu trastem Jeova long fulhat blong yu, “hem bambae i soemaot stret rod long yu, blong yu yu folem.”—Ol Proveb 3:5, 6.
Yu save ridim sam narafala haf blong “Ol Yangfala Oli Askem . . . ” long Intenet long adres ya www.watchtower.org/ypa
SAM SAMTING BLONG TINGBAOT
◼ ?Wanem samting we yu yu gat gudhan long hem mo we yu naf blong mekem?
◼ ?Yu save tingbaot sam rod we maet yu save yusum save ya blong presem Jeova?
◼ ?Weswan long ol wok blong Jeova we yumi tokbaot long haf ya we yu yu intres long hem?
[Bokis blong pija long pej 24]
WAN ROD WE I NO GO KASEM WAN PLES
Baebol i talem se: ‘Ol man we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.’ Man we i wok strong blong kam rij, i olsem we hem i stap long wan rod we i gat fulap hol long hem. Biaen, taem hem i kasem en blong rod ya, i no gat wan gudfala samting i stap. I gat kaon nomo, wari, mo bilif i lus.—1 Timoti 6:9, 10.
[Bokis blong pija long pej 25]
WOK BLONG PAENIA
Wan paenia i wan Kristin man no woman we i baptaes finis, mo we i wan gudfala eksampol. Kristin man no woman ya i wokem wan program we i save halpem hem blong kasem 70 aoa evri manis long wok blong talemaot gud nius blong Kingdom blong God. Trening mo ekspiriens we ol paenia oli kasem, i mekem oli kamgud moa long wok blong tijim ol man long Baebol.
WOK LONG HAOS BETEL
Ol memba blong Betel famle oli wok long ol branj ofis blong ol Witnes blong Jeova. Ol memba ya oli ol volontia we oli givhan blong rerem, printim, mo sanemaot ol buk we oli tokbaot Baebol. Evri wok we i stap gohed insaed long wan haos Betel oli tabu wok we man i mas tinghae long hem.
MUF I GO LONG PLES WE I NIDIM MOA MAN BLONG PRIJ
Sam paenia oli naf blong muf i go long ples we i nidim moa man blong talemaot Kingdom. Samfala maet oli lanem wan narafala lanwis nao oli go long narafala kantri no oli joen long kongregesen we ol man blong hem oli toktok narafala lanwis ya.
INTENASNAL WOK
Ol brata sista we oli wok olsem intenasnal volontia oli wokbaot i go long plante kantri blong bildim ol Haos Kingdom mo ol branj ofis. Hemia wan wok bakegen we i tabu, i sem mak olsem wok blong bildim tempol long taem blong Solomon.—1 King 8:13-18.
MINISTERIOL TRENING SKUL
Hemia wan kos blong 8 wik we i trenem ol elda mo ol man blong givhan we oli no mared yet. Oli tren long saed blong ol wok insaed long ogenaesesen mo long fasin blong toktok long fored blong plante man. Samfala we oli mekem skul ya, oli gohed blong wok long ples blong olgeta. Samfala, oli agri blong go wok long narafala kantri.
WOK BLONG MISINARI
Ol paenia we helt blong olgeta i gud mo we oli strong, oli kasem trening blong prij long narafala kantri. Laef blong wan misinari i fulap long ol nambawan ekspiriens mo i karem gudfala frut we oli harem gud tumas long hem.
[Bokis blong pija long pej 25]
?BAMBAE MI MEKEM WANEM LONG LAEF BLONG MI?
Hemia wan DVD we ol Witnes blong Jeova oli wokem. Long DVD ya oli askem kwestin long sam yangfala long Bresil, Inglan, Jemani, mo Yunaeted Stet. Bambae oli tanem ol tok blong DVD ya i go long plante narafala lanwis tu.
[Tok blong pija long pej 24]
“I dipen long wanem mak nao we yu wantem kasem.”—Michael we i wok long haos Betel
[Tok blong pija long pej 25]
“Hem i beswan desisen blong mi.”—Kelly, we i paenia 6 yia finis
[Tok blong pija long pej 26]
“Lukluk olgeta we oli givim gudfala eksampol.”—Roberto, we i wok long haos Betel