Wok Blong Fultaem Paenia i Karem Bigfala Glad
1 Yangfala, i sua se yu yu stap tingting long fiuja blong yu. Ol Proveb 21:5 i talem se: “Man we i mekem gudfala plan mo i stap wok strong long hem, hem i save kasem plante samting.” Bambae i givhan long yu sipos yu tingting gud long ol samting we yu wantem kasem mo mekem long laef blong yu. Taem yu stap mekem plan long saed blong fiuja, i gud blong tingbaot wok blong fultaem paenia. ?From wanem?
2 Askem tingting blong sam bigman we oli bin paenia taem oli yangfala. Ating olgeta evriwan bambae oli givim semfala ansa nomo long yu se: “!Hemia ol beswan yia long laef blong mi!” Wan brata we i kasem plante glad long wok blong fultaem paenia long yangtaem blong hem, i talem sam yia biaen se: “Mi harem gud tumas blong tingting bak long yangtaem blong mi. Mi glad we mi bin lesin long waes advaes ya: ‘Yu mas tingbaot Bigfala Man we i wokem yu. Yu mas tingbaot hem taem yu yu yang yet.’ ” (Pri. 12:1, NW ) Yu mo papa mama blong yu, yufala i mas mekem gudfala plan naoia, blong yufala i faenem wan rod we i givhan long yu blong kasem sem kaen glad ya long yangtaem blong yu.
3 Papa Mama, Leftemap Wok Blong Paenia: Jeova i wan Papa we i gat lav, taswe hem i soemaot stret rod blong folem. (Aes. 30:21) Taem hem i soemaot rod wetem lav, hem i givim wan gudfala eksampol long ol Kristin papa mama. Yufala i no mas livim i stap long ol pikinini blong yufala blong olgeta nomo oli jusum wanem samting i gud long olgeta. Be, yufala i mas waes, yufala i mas trenem olgeta long rod we oli mas folem, blong oli save kasem blesing blong Jeova. Biaen, taem oli kam bigwan, trening we yufala i givim bambae i mekem olgeta oli “naf blong jusumaot wanem fasin i gud mo wanem fasin i nogud.” (Hib. 5:14) Ol bigman oli save se oli no save trastem prapa tingting blong olgeta, mo se oli mas dipen long Jeova blong hem i stretem rod blong olgeta. (Prov. 3:5, 6) Samting ya i tru moa long ol yangfala from we oli no gat plante save long laef.
4 Ol papa mama, taem ol pikinini blong yufala oli stap kam bigwan, no bifo long taem ya, toktok long olgeta long saed blong wok we oli wantem mekem long laef blong olgeta. Ol man blong givim advaes long skul, ol tija, mo ol fren long klas blong olgeta bambae oli traem pulum olgeta blong oli ronem ol sas samting mo ol narafala samting we wol i save givim. Yufala i mas halpem ol pikinini blong yufala blong oli jusum ol kos long skul we i save trenem gud olgeta, we i save mekem olgeta oli naf blong kasem ol samting we oli nidim long saed blong bodi, mo long sem taem mekem wok blong Kingdom. (1 Tim. 6:6-11) Maet oli nidim nomo blong finisim hae skul mo mekem wan kos no trening blong wan wok. Plante taem hemia nomo i naf blong kasem ol samting we oli nidim blong laef taem oli stat long wok blong fultaem paenia.
5 Leftemap tingting blong ol yangfala blong oli stap olsem we oli no mared fastaem. Sipos biaen oli wantem mared, bambae oli naf gud blong mekem ol hevi wok insaed long mared. (Lukluk paragraf 19 long pepa we i stap insaed long Kingdom Wok Blong Yumi blong manis Jun 2001 “?Yu Yu Rere Blong Wok?”) Talem ol gudfala toktok long saed blong wok blong paenia, wok blong prij long ol ples we i gat moa nid, wok blong Betel, mo wok blong misinari. Olsem nao, taem ol yangfala oli smol yet, bambae yufala i putum wan tingting long hat blong olgeta blong wantem yusum laef blong olgeta long fasin we i mekem Jeova i glad, we i givhan long ol narafala man, mo we i karem glad long olgeta wan.
6 Ol Yangfala, Putum Wok Blong Paenia Fastaem: Ol yangfala, i no nid blong yufala i tingbaot se wok blong paenia i olsem wanem. Yufala i save traem wok ya. Long yia we i kam, mekem haftaem paenia taem yufala i gat janis mo taem yufala i spel long skul. !Bambae yufala i haremsave bigfala glad we wok blong paenia i save givim! ?Yu save mekem plan naoia blong joen long wok blong haftaem paenia long ol manis we oli kam?
7 Sipos yu yu wan yangfala brata long kongregesen blong God, yu save tingting gud tu blong traem kam naf blong mekem wok blong man blong givhan long kongregesen. (1 Tim. 3:8-10, 12) Mo tu, jusum sipos yu wantem wok long Betel no joen long Ministeriol Trening Skul, taem bambae yu gat naf yia. Wok blong paenia bambae i tijim yu long plante impoten samting. Bambae i tijim yu olsem wanem blong laef folem wan program, olsem wanem blong gat oda long laef blong yu we ol samting oli no fasfas, olsem wanem blong joengud wetem ol narafala, mo olsem wanem blong karem ol bigfala wok. Olgeta samting ya bambae oli mekem yu yu rere from ol narafala blesing blong wok we oli bigwan moa long fiuja.
8 Blong karem gudfala frut long wok blong fultaem paenia, wan impoten samting i blong gat wan tingting we yu wantem wok strong long ol wok blong God. Aposol Pol i leftemap tingting ya mo hem i talem ol blesing we oli kamaot from: “Long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong Masta blong yumi, . . . yufala i save we Masta ya blong yumi bambae hem i givim pei long yufala.” (Kol. 3:23, 24) !Bambae yu kasem plante blesing long Jeova long wok blong fultaem paenia we i karem bigfala glad!