Baebol i Talem Wanem

?Taem Man i Ded Hem i Kam Wan Enjel?

WAN smol gel we nem blong hem Argyro, hem i ded taem i gat seven yia blong hem. Papa mama blong hem, tufala i harem nogud tumas. Tufala i lukluk smol gel ya we i slip long bokis blong dedman, i werem klos we i waet evriwan, mo tufala i stap krae. Pasta i traem blong mekem tufala i haremgud, hem i se: “God i wantem wan narafala enjel, ale hem i tekem smol Argyro i go stap wetem hem. Naoia spirit blong hem i stap flae i goraon long jea blong Hae God.”

Nating we sam jos nomo oli tijim se spirit blong dedman i kam enjel, be plante man oli bilif strong long samting ya. Plante stori long televisin mo vidio kaset, olgeta tu oli pulum ol man blong oli bilif se ol dedman oli save kam ol enjel. Be fastaem oli mas halpem mo protektem sam man we oli laef i stap, nao sipos oli mekemgud wok ya, biaen oli save kam ol prapa enjel.

?I stret blong yu ting se ol famle blong yu bambae oli kam enjel taem oli ded? ?Baebol i tijim wanem long saed ya? Blong faenem ansa, i gud we fastaem yumi luk wanem we Baebol i talem long saed blong ol enjel mo ol dedman.

Ol Enjel Oli Defren Long Ol Narafala Samting We God i Wokem

Ol enjel oli stap long heven mo yumi no save luk olgeta. Oli ol man blong wok blong God we oli gat paoa. Ol enjel oli no kamaot long ol man. God nao i wokem olgeta oli olsem ol spirit man. Baebol i talem se: “I gud [ol enjel] evriwan oli presem nem blong [Jeova], from we hem i mekem olgeta long tok blong hem.”​—Ol Sam 148:​2, 5.

Baebol i talem se i gat plante milian gudfala enjel long heven, sam long olgeta oli seraf, mo sam oli jerubim. Olgeta ya oli obei long God, mo oli mekem ol spesel wok we Jeova i givim long olgeta stret long posisen blong olgeta. (Ol Sam 103:​20, 21; Aesea 6:​1-7; Daniel 7:​9, 10) ?Olsem wanem? ?Blong mekem se God i save wokem ol enjel ya, plante milian man oli mas ded? Nogat. ?From wanem i olsem?

Baebol i soemaot se God i wokem ol enjel longtaem bifo we hem i wokem ol man. Taem Jeova i wokem wol ya blong bambae ol man oli stap long hem, ol enjel we Baebol i kolem olgeta se ‘ol sta blong moning,’ “oli glad tumas, oli stap singsingaot.” (Job 38:​4-7) Taswe ol enjel oli stap plante milian yia bifo we man i laef long wol ya.

Mo tu, fasin blong ol enjel i defren long fasin blong ol man, mo Jeova i givim defren wok long ol enjel.a Hem i wokem man “i daon moa long ol enjel.” Taswe ol enjel oli hae moa long yumi, oli gat moa paoa, mo oli naf blong kasem save long plante moa samting i bitim yumi. (Hibrus 2:7) “Prapa ples” blong ol enjel hemia heven. (Jud 6) Be long saed blong ol man, plan blong God se bambae oli laef olwe long wol ya. (Jenesis 1:28; 2:17; Ol Sam 37:29) Sipos faswan man mo woman i bin obei long God, tufala i no save ded. Ale, stat long taem bifo olgeta, God i mekem plan finis se ol enjel oli gat defren wok long man.

?Wanem i Hapen Long Man We i Ded?

I gat sam narafala impoten kwestin we yumi mas faenem ansa blong olgeta. ?Wanem i hapen long ol man taem oli ded? ?Oli gohed blong laef samples long wan defren bodi, maet long wan spirit bodi olsem ol enjel? Baebol i talem ansa we i isi mo i klia, i se: “Ol man we oli laef yet oli save se bambae oli ded, be ol man we oli ded finis oli no moa save wan samting.” (Prija 9:5) Taswe, taem man i ded hem i no moa laef samples. Ol dedman oli no gat save, oli no filim wan samting, mo oli no save mekem wan samting nating.

?Ale, ol dedman oli gat hop? !Yes! Baebol i soemaot se bighaf blong ol man we oli ded oli save laef bakegen. Plante long olgeta bambae oli girap bakegen long paradaes long wol ya, olsem man nomo.​—Luk 23:43; Jon 5:28.

Sam man oli gat hop blong laef bakegen long heven. Namba blong olgeta i smol nomo, 144,000 evriwan. Be olgeta ya oli defren long ol enjel. Ol 144,000 ya oli rul olsem ol king mo pris wetem Kraes, mo oli no save kam nogud samtaem. Oli gat raet mo paoa blong jajem ol man tu. (1 Korin 6:3; Revelesen 20:6) ?Olsem wanem? Olgeta ya oli ol pikinini we oli ded long wol ya? Nogat. !Oli ol man blong Kraes we oli kasem bigfala traem finis, blong pruvum se oli naf blong mekem wok blong olgeta long heven!​—Luk 22:​28, 29.

I gud blong tingbaot olsem wanem ol man we oli ded oli defren long ol enjel we oli laef. Ol dedman “oli no moa save wan samting.” Be tingting blong ol enjel i wekap gud, oli gat filing, mo oli save mekem ol desisen. Oli fri blong jusum rod blong olgeta. (Jenesis 6:​2, 4; Ol Sam 146:4; 2 Pita 2:4) Ol dedman “oli no moa gat paoa,” oli no save mekem wan samting. Be ol enjel oli ‘strong, mo oli gat paoa.’ (Aesea 26:​14, NW; Ol Sam 103:20) Ol man oli pikinini blong Adam, taswe oli mas ded from sin we Adam i givim long olgeta. Be ol enjel we oli onagud long God oli stretgud olgeta, mo Jeova i glad we i glad long olgeta.​—Matiu 18:10.

Ating ol stori long televisin mo vidio kaset we oli stanap long bilif ya se ol enjel oli spirit blong ol dedman, oli pulum gud tingting blong ol man. Be bilif ya i no kamaot long Baebol. Trutok blong Baebol we yumi luk finis antap, i save givhan long yumi blong yumi no gat rong tingting long saed blong ol famle mo fren blong yumi we oli ded. Baebol i talem se ol gudfala enjel, God i wokem olgeta oli defren long ol man, oli gat paoa, mo oli mekem wok blong God. Oli hae moa long ol man mo oli rere oltaem blong mekem samting we Jeova i wantem. Yumi glad tumas se, wan samting we God i wantem ol enjel blong mekem, hemia blong lukaotgud mo givhan long olgeta we oli onagud long Jeova, mo we oli traehad blong mekem wok blong hem.​—Ol Sam 34:7.

[Futnot]

?YU YU BIN TINGBAOT?

◼ ?Ol famle mo ol fren blong yu we oli ded, oli kam ol enjel we oli mekem wok blong God long heven?​—Prija 9:​5, 10.

◼ ?Ol pikinini oli ded from we God i wantem sam moa enjel long heven?—Job 34:10.

◼ ?Ol dedman oli save kambak blong protektem ol man we oli laef?​—Aesea 26:14.

[Tok blong makem poen long pej 11]

“I gud [ol enjel] evriwan oli presem nem blong [Jeova], from we hem i mekem olgeta long tok blong hem.”—Ol Sam 148:​2, 5