Ol Enjel—?Oli Hu?

BITIM 2,000 yia bifo, tri man i kasem jajmen ya se bambae oli bonem trifala long faea blong kilim trifala i ded. !Wan king we i rul long wan strongfala gavman i no save bilivim taem hem i luk we faea i no bonem trifala man ya i ded! ?Hu i sevem trifala man ya? King ya i talem long trifala man ya se: “!Yumi presem God [blong yufala]! Hem i sanem enjel blong hem i kam, nao hem i sevem [yufala ol man] blong wok blong hem, mo [yufala] i trastem hem.” (Daniel 3:28) King ya blong Babilon we i rul long taem ya i luk klia wan enjel i sevem trifala man ya. Plante milian man bifo oli bilif long ol enjel. Plante man tede oli no bilif nomo se ol enjel oli laef i stap, be oli haremsave tu se ol enjel oli gat paoa long laef blong olgeta long defdefren fasin. ?Hu ya ol enjel mo oli kamaot weples?

Folem wanem we Baebol i talem, ol enjel oli ol spirit man olsem God we hem i wan spirit. (Ol Sam 104:4; Jon 4:24) I gat plante milian enjel. (Revelesen 5:11) Mo olgeta evriwan oli ‘gat bigfala paoa.’ (Ol Sam 103:20) Long sam fasin, ol enjel oli olsem man. Olgeta wanwan oli gat prapa fasin blong olgeta, mo oli fri blong jusum rod blong olgeta. Be i no stret blong ting se fastaem ol enjel oli bin ol man bifo we oli kam ol enjel. Defren olgeta, God i wokem ol enjel longtaem bifo we hem i wokem man, mo tu, bifo we hem i wokem wol. Baebol i talem se, taem God i “putum fandesen blong wol ya, . . . ol sta blong moning [hemia ol enjel] oli singaot bigwan tugeta, oli glad, mo olgeta pikinini blong God oli stat singaot from we oli harem gud.” (Job 38:​4, 7, NW ) From we God nao i wokem ol enjel, taswe Baebol i kolem olgeta se ol pikinini blong God.

?From wanem God i wokem ol enjel? ?Wanem wok we ol enjel oli mekem long laef blong ol man bifo finis kam kasem tede? ?Ol enjel oli gat paoa long laef blong yumi tede? ?From we ol enjel oli gat fasin ya we oli fri blong jusum rod blong olgeta, i gat sam enjel we oli folem Devel Setan mo oli mekem olgeta oli kam enemi blong God? Baebol i givim ol trufala ansa long ol kwestin ya.