Letem God i Lidim Yu Blong Kasem “Laef Ya We i Prapa Wan”
IMPOTEN fasin we wan lida i mas gat, hemia se ol man oli save trastem hem. Olgeta we oli save Jeova, Man we i raetem Baebol, oli bilif se oli save trastem hem i bitim olgeta narafala man. Hem “i no save giaman.” (Taetas 1:2; 2 Timoti 3:16) Josua, man we i onagud long God mo i lidim ol man Isrel oli go long Promes Lan, i talem klia se man i save trastem Jeova fulwan. Long wan tok we hem i givim long neson ya, hem i se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.”—Josua 23:14.
Afta long taem blong Josua, plante moa profet tok blong Baebol oli kamtru. Samting ya i mekem bilif blong yumi i strong se ol profet tok long saed blong fiuja tu oli mas kamtru. Plante long ol profet tok ya oli tokbaot plan blong God long saed blong wol mo ol man we oli obei long hem.
?Bambae Yu Letem God i Lidim Yu Mo Kasem Blesing From?
Jeova we hem i nambawan eksampol blong lav, i wantem we yumi hapi naoia mo blong olwe. (Jon 17:3; 1 Jon 4:8) Yes, God i wantem we yumi kasem “laef ya we i prapa wan,” hemia laef we i no save finis. (1 Timoti 6:12, 19) From samting ya, bitim sikis milian Witnes blong Jeova oli glad blong obei long tok blong God blong talemaot “gud nius ya, se God i King blong olgeta man.” (Matiu 24:14) !Oli stap mekem wok ya long 235 kantri, hemia klosap evri neson long wol!
Kingdom blong God i wan gavman long heven we i stap long han blong Jisas Kraes. (Daniel 7:13, 14; Revelesen 11:15) Aninit long rul blong hem, ol rabis man bambae oli lus. Hemia olgeta we oli no wantem obei long ol stret rul blong Jeova. (Ol Sam 37:10; 92:7) Afta, bambae wol “i fulap gud long ol man we oli savegud Hae God, olsem we solwota i fulap gud long ples blong hem.”—Aesea 11:9.
Tingbaot pis mo fasin joengud we bambae i stap taem evri man long wol oli wosipim God “long spirit mo trutok,” mo olgeta evriwan oli glad nomo blong obei long ol stret rul blong hem mo letem hem i lidim olgeta wetem lav. (Jon 4:24, NW ) !Yes, long taem ya, ol man bambae oli jes kasem “laef ya we i prapa wan” we God i promes blong givim!—1 Timoti 6:19.
Be Baebol i talemaot finis se smol man nomo bambae oli letem God i lidim olgeta blong kasem laef. (Matiu 7:13, 14) ?Olsem wanem? ?Yu yu wantem stap wetem ol man ya? Sipos yes, ol Witnes blong Jeova oli singaot yu wetem fulhat blong olgeta blong yu stadi Baebol mo letem ol advaes blong God i lidim yu. Sipos yu mekem olsem, bambae yu “faenemaot” yu wan se Jeova i gud tumas. (Ol Sam 34:8) Jeova bambae i lidim ol man we oli stap tru long hem blong oli kasem laef long Paradaes. !Promes ya i sua blong kamtru, olsem we waes blong ol pijin i sua blong lidim olgeta oli go long stret ples we oli wantem go long hem!—Luk 23:43.
[Tok blong pija long pej 8, 9]
“Olgeta we oli kwaet man oli save harem gud, from we God bambae i givim wol ya long olgeta.”—MATIU 5:5
“Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—OL SAM 37:11
“God i mekem ples blong hem wetem ol man. . . . Hem bambae i ravemaot wota blong ae blong olgeta. Nao bambae i no moa gat man i ded.”—REVELESEN 21:3, 4
“Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.”—OL PROVEB 2:21, 22