Ol Samting We Kingdom Blong God Bambae i Mekem

“Letem kingdom blong yu i kam. Letem wil blong yu i kamaot long wol olsem we i kamaot finis long heven.”—MATIU 6:10, NW.

1. ?Taem Kingdom blong God i kam, bambae hem i mekem wanem?

TAEM Jisas i tijim ol man blong hem blong prea from Kingdom blong God, hem i save se Kingdom ya bambae i kam blong karemaot rul blong ol man we oli bin lego God blong plante taosen yia finis. Long olgeta yia ya, ol man long wol oli no bin mekem samting we God i wantem. (Ol Sam 147:19, 20) Be afta we Kingdom blong God i stanap long heven, ol man long evri ples oli mas mekem wanem we God i wantem. Taem ya we rul blong man i finis mo Kingdom blong God long heven i rulum wol, hem i klosap nao.

2. ?Wanem bambae i soemaot se rul blong Kingdom i tekem ples blong rul blong man?

² Blong makem stat blong jenis ya bambae i gat wan taem we Jisas i kolem “bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Matiu 24:21) Baebol i no talem se trabol ya bambae i gohed blong hamas taem. Be, ol nogud samting we bambae oli hapen long taem ya oli nogud moa i winim eni narafala samting we wol i luk bifo. Long stat blong bigfala trabol ya, wan samting bambae i hapen we i save mekem plante man long wol ya oli sek bigwan. Hemia taem we olgeta giaman skul oli lus. Ol Witnes blong Jeova bambae oli no sapraes long samting ya from we oli bin wet longtaem finis blong samting ya i hapen. (Revelesen 17:1, 15-17; 18:1-24) Amagedon bambae i makem en blong bigfala trabol ya, taem Kingdom blong God i spolem olgeta samting we oli stap long paoa blong Setan.—Daniel 2:44, NW; Revelesen 16:14, 16.

3. ?Jeremaea i talem wanem long saed blong fiuja blong ol man we oli no obei?

³ ?Samting ya bambae i minim wanem long ol man ‘we oli no save ona long God, mo olgeta we oli no save obei long gud nius’ blong Kingdom blong hem long heven we i stap long han blong Kraes? (2 Tesalonaeka 1:6-9) Ol profet tok blong Baebol oli talem long yumi se: “I gat bigfala trabol i stap kam, we bambae i spolem olgeta kantri. I gat bigfala hariken i aot finis long narasaed wol, i stap kam blong spolem olgeta. Long taem ya, ol dedbodi blong ol man ya we mi bambae mi kilim olgeta, bambae oli finisim olgeta ples long wol. Bambae i no moa gat man i stap blong krae from olgeta, mo blong berem olgeta. Bambae oli stap olbaot long graon nomo olsem sitsit blong buluk.”—Jeremaea 25:32, 33.

En Blong Rabis Fasin

4. ?From wanem i stret nomo we Jeova i finisim rabis wol blong naoia?

⁴ Blong plante taosen yia, Jeova i letem rabis fasin i gohed. Longfala taem ya i naf blong soemaot long ol man we hat blong olgeta i stret, se rul blong man i fulap long trabol nomo. Eksampol, wan ripot i soemaot se long ol yia 19 handred nomo, bitim 150 milian man oli ded long ol faet, ol revolusen, mo narafala problem bakegen we oli kamaot insaed long wanwan kantri. Rabis fasin blong man i kamaot klia moa long taem blong Seken Bigfala Faet blong Wol. Long taem ya samwe long 50 milian man oli ded, we plante long olgeta oli ded long fasin we i nogud olgeta long ol rabis kalabus blong ol Nasi. Olsem Baebol i bin talemaot, long taem blong yumi “ol man nogud wetem ol man blong giaman, bambae oli save gohed blong mekem i mowas olgeta.” (2 Timoti 3:1-5, 13) Tede, ol nogud fasin long saed blong seks, fasin blong brekem loa, raf fasin, kruked fasin, mo fasin blong no laekem nating ol loa blong God, oli kam antap bigwan. Taswe, Jeova i gat raet fulwan blong finisim rabis wol ya.

5, 6. Tokbaot rabis fasin we i bin stap long kantri blong Kenan bifo.

⁵ Ol samting ya i sem mak lelebet long wanem we i bin hapen long Kenan samwe long 3,500 yia bifo. Baebol i talem se: “Taem oli stap mekem wosip long ol god blong olgeta, oli stap mekem ol fasin we i nogud we i nogud, we Hae God i no laekem nating, i agens long hem. Nating we ol pikinini blong olgeta nomo, be oli save bonem olgeta long olta blong mekem sakrefaes long ol god blong olgeta.” (Dutronome 12:31) Jeova i talem long nesen blong Isrel se: “[God] bambae i ronemaot olgeta oli gowe long kantri ya, from we oli stap mekem sin, fasin blong olgeta i nogud olgeta.” (Dutronome 9:5) Henry H. Halley, wan man blong stadi long histri blong Baebol, i makem se: “Long wosip we i go long Bal, Astoret, mo ol narafala god blong Kenan, ol man oli mekem ol bigfala lafet we long ol lafet ya oli no moa bos long fasin blong olgeta; ol haos wosip blong olgeta oli stamba ples blong olkaen fasin we oli nogud olgeta.”

⁶ Man ya Halley i soemaot olsem wanem we rabis fasin blong olgeta i bitim mak tumas. Hem i talem se ol man blong digim graon oli faenem “plante graonpot we insaed long olgeta i gat bun blong ol smosmol pikinini we ol man oli bin kilim i ded olsem sakrefaes i go long Bal.” Hem i se: “I luk olsem we fulwan ples ya [we ol man oli digim] hem i wan beregraon blong ol bebi we oli jes bon . . . Ol man Kenan oli stap mekem wosip wetem rabis fasin, hemia kastom blong skul blong olgeta blong ona long ol god blong olgeta. Mo, oli kilim i ded fasbon pikinini blong olgeta, olsem wan sakrefaes i go long ol god ya. Ples ya Kenan i kam olsem Sodom mo Gomora, be ol nogud fasin blong hem oli bigwan moa, from we oli kavremap wan ful nesen. . . . ?Wan nesen olsem, we i fulap long doti fasin mo raf fasin we i bitim mak olgeta, i gat raet blong gohed blong stap laef long wol ya? . . . Ol man blong digim graon, we oli faenem ol ston blong ol olfala taon blong Kenan, oli sapraes we God i no bin spolem olgeta bifo long taem ya we hem i mekem olsem.”

Tekem Graon Ya i Blong Olgeta

7, 8. ?Olsem wanem God bambae i klinim wol ya?

⁷ I no longtaem bambae God i mekem sem mak olsem we hem i bin mekem long Kenan. Bambae hem i klinim fulwol mo i givim wol ya i go long ol man we oli mekem ol samting we hem i wantem. “Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long ples ya.” (Ol Proveb 2:21, 22) Mo man blong raetem Sam i talem se: “Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:10, 11) Mo tu, Setan bambae i no moa stap, mekem se ‘bambae hem i no moa giaman long ol man, blong pulum olgeta oli go krangke, gogo wan taosen yia i pas.’ (Revelesen 20:1-3) Yes, “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:17.

⁸ Jisas i tokbaot nambawan hop ya blong olgeta we oli wantem laef olwe long wol, i se: “Olgeta we oli kwaet man oli save harem gud, from we God bambae i givim wol ya long olgeta.” (Matiu 5:5, NW) I sua se hem i stap tingbaot Ol Sam 37:29, we i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” Jisas i save se stamba tingting blong Jeova hemia se ol man we hat blong olgeta i stret oli laef long wan paradaes long wol ya blong olwe. Jeova i talem se: “Wol ya, wetem ol man mo ol anamol we oli stap long hem, mi mi mekem olgeta evriwan long paoa blong mi. Mo mi save givim ol samting ya i go long man, we mi mi luk se i stret blong hem i kasem.”—Jeremaea 27:5.

Wan Nambawan Niufala Wol

9. ?Kingdom blong God bambae i karem wanem kaen wol i kam?

⁹ Afta long Amagedon, Kingdom blong God bambae i karem wan nambawan “niufala wol” i kam we “stret fasin nomo bambae i stap long hem.” (2 Pita 3:13) !Ol man we oli laef tru long Amagedon bambae oli save harem gud fulwan taem rabis wol ya i lus! Bambae oli glad tumas blong go insaed long niufala wol aninit long Kingdom gavman ya we i stap long heven, mo blong kasem ol nambawan blesing wetem laef we i no save finis long fored blong olgeta.—Revelesen 7:9-17.

10. ?Wanem ol nogud samting we bambae oli no moa stap taem Kingdom i rul?

¹⁰ Bambae ol man oli no stap long denja from ol faet, fasin blong brekem loa, hanggri, mo ol rabis anamol tu. “Mi bambae mi mekem wan strong promes wetem yufala [ol man blong mi], se bambae mi lukaot gud long yufala oltaem. Bambae mi ronemaot olgeta wael anamol long kantri ya. . . . Olgeta tri bambae oli karem plante frut, mo ol garen bambae oli karem plante kakae, mo yufala evriwan bambae i save stap gud long graon blong yufala.” “Long taem ya, ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet. Olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”—Esikel 34:25-28; Maeka 4:3, 4.

11. ?From wanem yumi sua fulwan se ol sik mo trabol long saed blong bodi bambae oli finis?

¹¹ Sik, fasin sore, mo ded tu bambae oli lus olgeta. “Bambae i no moa gat man olbaot long kantri ya we i save talem se hem i sik, from we Hae God bambae i fogivim ol man blong ples ya, i tekemaot ol sin blong olgeta.” (Aesea 33:24) “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta. . . . ‘!Yu luk! Mi mi stap mekem olgeta samting oli kam niuwan bakegen.’” (Revelesen 21:4, 5) Taem Jisas i stap long wol, hem i soemaot se hem i naf blong mekem plante samting long paoa we God i givim long hem. Tru long tabu spirit, Jisas i go long olgeta ples blong mekem ol man we oli handikap mo we oli sik oli kamgud bakegen.—Matiu 15:30, 31.

12. ?Wanem hop i stap blong ol man we oli ded?

¹² Be, Jisas i mekem sam samting moa. Hem i mekem ol dedman oli laef bakegen. ?Ol man we tingting blong olgeta i stap daon oli mekem wanem taem oli luk samting ya? Taem Jisas i mekem wan gel blong 12 yia i laef bakegen long ded, papa mama blong hem “oli sapraes tumas.” (Mak 5:42) Hemia wan narafala eksampol blong soemaot wanem we Jisas bambae i mekem long fulwol taem Kingdom i rul, from we long taem ya “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Tingbaot bigfala glad we bambae i kamaot taem wan grup blong dedman afta long narawan oli laef bakegen mo oli joen bakegen wetem ol fren mo famle blong olgeta. I sua se long taem ya bambae Kingdom i lidim wan bigfala wok blong tijim ol man mo mekem se “kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.”—Aesea 11:9.

Jeova Bambae i Leftemap Hae Rul Blong Hem

13. ?Olsem wanem ol man bambae oli luksave se rul blong God i stret?

¹³ Long en blong wan taosen yia we Kingdom ya bambae i rul, ol man long wol bambae oli stretgud olgeta long tingting mo bodi blong olgeta. Fulwol ya bambae i wan naesfala garen blong Iden, wan paradaes. Pis, fasin glad, fasin sef, mo wan kampani blong man we oli gat lav, bambae oli stap long wol ya. Bifo we Kingdom ya i rul, neva long histri blong man i gat wan samting olsem i hapen. !Long taem ya nao, ol man bambae oli luksave bigfala jenis we i stap bitwin ol taosen yia ya blong trabol aninit long rul blong man, mo gudfala wan taosen yia rul blong Kingdom blong God we i stap long heven! Rul blong God tru long Kingdom bambae i soemaot klia se hem i hae moa olgeta long eni narafala rul. God bambae i pruvum fulwan se hem i gat raet blong rul, mo se hae rul blong hem i stret.

14. ?Long en blong wan taosen yia, wanem bambae i hapen long ol man we oli rebel?

¹⁴ Long en blong wan taosen yia, Jeova bambae i letem ol man we oli stret gud olgeta, oli yusum fasin fri we oli gat blong jusum se oli wantem mekem wok blong hu. Baebol i soem se bambae “Setan i kamaot long kalabus.” Bambae hem i traem bakegen blong lidim ol man oli gorong, mo sam long olgeta ya bambae oli jusum blong lego God. Blong blokem ‘ol man blong oli no agensem Hae God tu taem,’ Jeova bambae i finisim Setan, ol dimon blong hem, mo olgeta we oli rebel agensem hae rul blong Jeova. Long taem ya, i no gat wan man we bambae i save tok agensem God se hem i no givim janis long ol man ya we hem i kilim olgeta oli ded. Mo i no gat man we bambae i save talem se olgeta ya oli mekem mastik from we oli gat sin. Nogat. Ol man ya oli olsem stret man mo woman ya Adam mo Iv, we tufala nomo i jusum blong rebel agensem stretfala rul blong Jeova.—Revelesen 20:7-10; Neham 1:9.

15. ?Ol man we oli stap tru long God bambae oli gat wanem kaen fasin fren wetem Jeova?

¹⁵ Defren olgeta, ating bighaf blong ol man bambae oli jusum blong sapotem hae rul blong Jeova. Afta we olgeta rebel oli lus evriwan, ol stret man bambae oli save stanap fored long Jeova, from we oli winim laswan traem ya blong luk hu olgeta we bambae oli stap tru long God. Nao Jeova bambae i tekem olgeta ya we oli stap tru, oli kam olsem ol pikinini boe mo gel blong hem. Long rod ya oli kasem fasin fren ya we Adam mo Iv tufala i gat wetem God bifo we tufala i rebel. Ale, Rom 8:21 (NW) bambae i kamtru: “Ol samting we God i mekem [hemia ol man], olgeta tu bambae oli fri, oli no moa slef blong fasin rotin, mo bambae oli save kasem gudfala fasin fri, we i blong ol pikinini blong God.” Profet Aesea i talemaot se: “Hae God i Masta blong yumi, mo long taem ya, hem bambae i mekem we ded bambae i go lus olgeta. Bambae hem i ravemaot wota blong ae blong yufala.”—Aesea 25:8.

Hop Blong Laef We i No Save Finis

16. ?From wanem i stret blong tingbaot praes ya blong laef we i no save finis?

¹⁶ Hemia wan nambawan hop blong ol man we oli holem bilif, se bambae God i kafsaedem plante blesing long saed blong spirit mo bodi i kamdaon long olgeta blong olwe. Man blong raetem Sam i talem tru se: “Yu openem han blong yu, nao yu mekem we olgeta samting we i laef oli haremgud, from we oli kasem ol samting we oli wantem tumas.” (Ol Sam 145:16, NW) Jeova i leftemap tingting blong ol man ya we bambae oli laef long wol se oli mas tingbaot hop ya blong laef long Paradaes olsem wan haf blong bilif blong olgeta. I tru se bisnes long saed blong hae rul blong Jeova i moa impoten, be nating se i olsem, Jeova i no askem ol man blong hem blong mekem wok blong hem we hem i no givim wan praes long olgeta. Oltaem long Baebol yumi luk se fasin blong stap tru long God i joen wetem hop ya blong laef we i no save finis, tufala i wan impoten haf blong Kristin bilif long God. “Sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.”—Hibrus 11:6.

17. ?Olsem wanem Jisas i soemaot se i stret nomo we hop blong yumi i givhan long yumi blong stanap strong?

¹⁷ Jisas i talem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3, Nyutesteman Wetem Ol Sam Long Bislama) Long vas ya Jisas i joenem fasin blong save God mo ol stamba tingting blong hem wetem praes ya we man i save kasem. Eksampol, taem wan rabis man i askem Jisas blong tingbaot hem taem hem i go long Kingdom, Jisas i ansa se: “Bambae yu stap wetem mi long Paradaes.” (Luk 23:43, NW) Jisas i no talem long man ya se hem i mas bilif, nating sipos hem i no kasem wan praes. Jisas i save se Jeova i wantem ol man blong hem blong gat hop ya blong laef we i no save finis long wan paradaes long wol from we samting ya i save givhan long olgeta blong stanap strong taem oli fesem ol defren kaen traem long wol ya. Taswe, fasin blong tingbaot praes ya i wan impoten rod blong halpem ol Kristin blong stanap strong long fasin we oli stap folem.

Wanem Bambae i Hapen Long Kingdom

18, 19. ?Wanem bambae i hapen long King mo Kingdom long en blong Taosen Yia Rul?

¹⁸ ?From we Kingdom i wan gavman we Jeova i yusum nomo blong mekem wol ya mo ol man blong hem oli kam stretgud bakegen mo oli fren wetem hem bakegen, olsem wanem long King Jisas Kraes mo ol 144,000 king mo pris afta we Rul blong Taosen Yia i pas? “Nao biaen long samting ya, en blong olgeta samting bambae i kamtru. Kraes bambae i spolem ol jif blong ol devel we oli stap olbaot long wol ya, mo ol gavman blong olgeta, wetem olgeta we oli gat paoa, nao bambae oli lus olgeta, mo bambae hem i finis long king, i givimbak olgeta paoa blong hem long God, Papa blong hem. Be yumi save. Kraes i mas rul fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes.”—1 Korin 15:24, 25.

¹⁹ ?Sipos Kraes i givimbak Kingdom i go long God, olsem wanem long tok blong sam vas blong Baebol we oli talem se Kingdom ya i mas stap blong olwe? Ol vas ya oli minim se ol blesing we Kingdom ya i mekem oli kamtru, bambae oli stap blong olwe. Kraes bambae i kasem ona blong olwe from wok we hem i bin mekem blong leftemap hae rul blong God. Be from we sin mo ded bambae oli finis olgeta, mo ol man long wol bambae oli fri, i no moa nidim we hem i wok olsem Man blong Pemaot ol man. Mo tu, Taosen Yia Rul blong Kingdom bambae i kasem mak blong hem; taswe bambae i no moa nidim wan seken gavman blong stap bitwin long Jeova mo ol man we oli gat fasin obei. Yes, “God bambae i holem paoa bakegen, blong i rul long olgeta samting.”—1 Korin 15:28.

20. ?Olsem wanem yumi save faenemaot wanem bambae i hapen long Kraes mo ol 144,000 long fiuja?

²⁰ ?Kraes mo olgeta we oli rul wetem hem bambae oli mekem wanem wok afta we Rul blong Taosen Yia i finis? Baebol i no talem. Nating se i olsem, yumi sua se Jeova bambae i givim plante narafala wok long olgeta blong mekem long medel blong ol samting we hem i wokem. I gud yumi evriwan tede i leftemap hae rul blong Jeova mo gat janis blong laef gogo i no save finis. Nao long fiuja bambae yumi save laef blong luk wanem stamba tingting we Jeova i gat long saed blong King ya wetem ol narafala king mo pris, mo wanem stamba tingting we hem i gat tu long saed blong olgeta samting long heven mo long wol.

Ol Poen Blong Tingtingbak

• ?Yumi stap kam klosap long wanem jenis we bambae i hapen long saed blong fasin blong rul?

• ?Olsem wanem God bambae i jajem ol rabis man mo ol stret man?

• ?Laef long niufala wol bambae i olsem wanem?

• ?Olsem wanem Jeova bambae i leftemap hae rul blong hem fulwan?

[Tok blong pija long pej 17]

“God bambae i mekem olgeta man we oli ded oli laef bakegen, ol man we oli stret, wetem ol man we oli no stret”

[Tok blong pija long pej 18]

Olgeta we oli stap tru long God bambae oli save frengud wetem Jeova bakegen