Step 6

Kasem Save Long Filing Blong Pikinini Blong Yu

?From wanem yu mas tekem step ya? Ol pikinini oli wantem we tufala we i moa impoten long laef blong olgeta—hemia papa mama—tufala i save filing blong olgeta. Sipos oltaem papa mama i tok agensem pikinini taem pikinini i talemaot filing blong hem, bambae pikinini i no moa wantem tokbaot filing blong hem long tufala, mo maet pikinini i stat tingting se i no stret we hem i gat ol prapa filing mo tingting blong hem.

?From wanem i hadwok?: Plante taem ol pikinini oli yusum ol tok we i bitim mak blong talemaot tingting mo filing blong olgeta. Sam tok we oli talem i save mekem tingting blong papa mama i trabol. Maet wan pikinini we i harem nogud i talem se: “Mi mi no laekem nating laef blong mi.”a Wantaem nomo, papa no mama i ansa se: “!Yu no tok olsem!” Maet papa mama i ting se sipos tufala i soem se tufala i kasem save long tingting blong pikinini, hemia i olsem we tufala i agri wetem nogud tingting mo filing we hem i gat.

?Wanem i save givhan long yu?: Yu mas folem advaes blong Baebol blong ‘rere oltaem blong lesin, no hareap blong toktok, mo no hareap blong kros.’ (Jemes 1:19) Makemgud se Jeova God i kasem save long nogud filing blong plante man blong hem, taswe hem i mekem se ol man oli raetemdaon ol filing blong olgeta long Baebol. (Jenesis 27:46; Ol Sam 73:12, 13) Olsem nao, taem Job i kasem bigfala traem, hem i talem se i wantem ded nomo.—Job 14:13.

I tru, sam long ol tingting mo filing blong Job oli rong mo hem i mas stretem olgeta. Be Jeova i no agensem Job from ol filing ya, mo hem i no blokem hem blong i no moa tokbaot olgeta. Jeova i soem respek long Job taem hem i letem hem i talemaot ol trabol we i stap long hat blong hem. Afta nomo, Jeova i stretem tingting blong hem long kaen fasin. Wan Kristin papa i talem se: “Jeova i stap letem mi mi prea long hem blong talemaot evri samting we i stap long hat blong mi. Taswe mi ting se i stret nomo we mi mi letem ol pikinini blong mi oli talemaot ol gudfala filing mo ol nogud filing blong olgeta.”

Nekis taem we pikinini blong yu i talemaot filing blong hem mo yu wantem talem se, “Yu yu stap giaman nomo,” no “Hemia tingting blong yu nomo,” traem tingbaot rul blong Jisas we ol man oli save long hem: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Luk 6:31) Tingbaot sipos masta blong yu i mekem i strong tumas long yu long wok no sipos yu harem nogud from wan narafala samting we i hapen long wok, maet from wan mastik blong yu nomo. Nao yu talemaot ol nogud filing blong yu long wan gudfala fren, mo yu talem se yu no moa save wok blong masta ya. ?Bambae yu wantem we fren blong yu i talem wanem? ?Bambae yu glad sipos hem i talem se yu yu sofsof tumas mo se problem ya i fol blong yu nomo? ?No bambae yu glad sipos fren blong yu i talem se: “I tru, hemia i nogud ya. Yu yu bin fesem wan hadtaem stret tede”?

Ol pikinini oli olsem ol bigman, oli glad blong lesin long advaes sipos oli harem se man we i givim advaes ya i rili kasem save long filing blong olgeta mo long ol trabol we oli gat. Tok blong God i talem se: “Man we i gat hed, hem i tingting gud fastaem, nao biaen i tok, mo ol samting we hem i talem i save pulum ol man oli folem tingting blong hem.”—Ol Proveb 16:23.

?Olsem wanem blong mekem se pikinini bambae i tinghevi long advaes we yu givim?

[Futnot]

[Tok blong makem poen long pej 8]

“Yu mas lesin long tok blong ol man fastaem, nao biaen bambae yu save givim ansa long olgeta. Sipos no, fasin ya i soemaot we yu yu no gat hed.”—Ol Proveb 18:13