Ol Yangfala Oli Askem . . .

?From Wanem Papa No Mama Blong Mi i No Lavem Mi?

“Bifo we papa blong mi i divosem mama blong mi, mifala i stap go long solwota, kakae long restoron, mo wokbaot long trak. Be, wantaem nomo, ol samting ya i finis. Papa blong mi i jenis bigwan. Ating hem i divosem mi tu.”—Karen.a

PLANTE tumas yangfala oli gat filing ya. Oli olsem Karen, we i harem se papa blong hem i no moa lavem hem—no maet i neva bin lavem hem. Yumi no stap tokbaot filing blong harem nogud blong smoltaem, we i save kamaot taem ol yangfala oli rao wetem papa mama blong olgeta. Mo yumi no stap tokbaot filing blong kros we i save kam antap taem papa no mama i stretem yangfala blong hem. Nogat. Yumi stap tokbaot ol papa mama we oli no kea nating long ol pikinini blong olgeta, mo oli no tektaem blong soem lav long olgeta no stretem olgeta. Sam papa mama oli mekem i strong tumas long pikinini, oli mekem raf fasin long olgeta, maet oli sakem ol nogud toktok long olgeta no oli faetem olgeta.

I no gat plante samting we i save spolem filing blong pikinini moa i bitim we papa no mama blong hem i no wantem hem. Karen i talem se: “Mi mi harem se i no gat man i wantem mi no i kea long mi.” Sipos yu bin harem olsemia samtaem, tingbaot sam advaes we i save givhan long yu blong winim filing ya. Maet papa no mama blong yu i no wantem givhan long yu, be nating, yu yu save karem gudfala frut long laef blong yu. !Yu mas bilif strong long samting ya!

Traem Savegud Papa No Mama Blong Yu

Fastaem, i stret nomo we yu yu wantem papa mo mama blong yu blong lavem yu. Lav blong wan papa mo mama long pikinini blong tufala i mas olsem san we i neva mestem blong girap evri moning. Lav ya i mas kamaot olsem nomo, mo i mas stap oltaem. God i talem long ol papa mama se oli mas gat lav olsem. (Kolosi 3:21; Taetas 2:4) ?Taswe, from wanem sam papa no mama oli no wantem lukaot long pikinini blong olgeta, oli lego olgeta no oli mekem raf fasin long olgeta?

Wan samting, hemia laef blong papa no mama ya bifo. Traem ansa long kwestin ya: ‘?Hu i tijim papa mama blong mi blong lukaot long pikinini?’ Plante papa mo mama oli folem nomo ol samting we papa mama blong olgeta i bin mekem long olgeta. Mo long wol blong yumi we laef i had mo plante moa man oli ‘no gat sore,’ tijing ya we ol papa mama oli bin kasem i no stret tumas. (2 Timoti 3:1-5) Frut we i save kamaot se, ol papa mama ya oli mekem nogud long pikinini blong olgeta, olsem we ol olfala blong olgeta oli bin mekem long olgeta. Mo ol pikinini ya oli mekem i sem mak bakegen long ol pikinini blong olgeta.

Mo tu, maet sam papa mo mama oli harem nogud tumas from sam samting. Blong traem fogetem nogud filing blong olgeta, maet oli wok olwe nomo, oli dring bitim mak, no oli tekem drag. Tingbaot William mo Joan, we tufala i gruap wetem wan papa we i alkolik. Joan i stori se: “Papa blong mi i faenem i had blong talem wan gudfala tok blong presem mifala. Be samting we i nogud olgeta, hemia kros blong hem taem hem i dring. Hem i singaot strong long mama blong fulnaet. Plante taem, mi mi fraet.” Maet plante papa mama oli no tok nogud no kilim pikinini blong olgeta, be fasin blong laef blong olgeta i save mekem se oli no gat plante paoa i stap blong lukaot long ol pikinini blong olgeta mo givim lav long olgeta.

William i ting se hem i kasem save long samting we i mekem fasin blong papa blong hem i olbaot. Hem i se: “Papa blong mi i gruap long Berlin, Jemani, taem Wol Wo Tu i stap gohed. Taem hem i wan yangfala boe, hem i pastru long wan taem we i nogud bitim mak, mo i luk plante raf fasin mo ded. Hem i traehad bigwan jes blong stap laef evri dei, mo jes blong kasem wan smol samting blong kakae. Mi ting se laef blong papa blong mi taem hem i smol, i mekem se hem i gat ol nogud fasin naoia.” Tru ya, Baebol tu i talem se taem narafala i mekem i strong tumas long wan man, fasin ya i save pusum man ya blong mekem ol krangke samting.—Prija 7:7, NW.

?Be olsem wanem? ?William mo Joan i harem se ol samting we i hapen long laef blong papa blong tufala bifo i givim raet long hem blong mekem i nogud long tufala? William i ansa se: “Nogat. Ol samting we i hapen long laef blong hem i no wan risen blong dring bitim mak mo mekem ol nogud fasin. Be, from we mi save ol samting we i bin hapen, naoia mi kasem save from wanem hem i olsem.”

Yes, sipos yu tingbaot se papa mama blong yu tufala i sinman, mo sipos yu traem save long laef blong tufala bifo, samting ya i save givhan bigwan long yu blong kasem save long fasin blong tufala. Ol Proveb 19:11 i talem se: “Sipos yu gat hed, bambae yu no save kros kwik.”

Traem Winim Ol Filing Blong Yu

I gat sam narafala nogud filing we yu save kasem from ol samting we i hapen long haos. Wan gel, Patricia, i harem se “hem i nogud nating mo i no gat man i save lavem hem.” Hemia from we papa mama blong hem i no soem se tufala i intres long hem. Wan narafala gel, LaNeisha, i faenem i had blong trastem ol man from we papa blong hem i bin ronwe long famle taem LaNeisha i gat eit yia blong hem. Mo gel ya Shayla i wantem tumas we eniman nomo i intres long hem, hemia blong tekem ples blong mama blong hem we “ol drag oli bos long laef blong hem.”

Mo tu, fasin kros mo jalus i save kamaot. Taem papa blong Karen i mared bakegen long wan narafala woman mo i soemaot lav long niufala famle blong hem, Karen i “jalus tumas,” from we hemia lav we Karen i nidim tumas. Gel ya Leilani, wanwan taem hem i harem se hem i no laekem nating papa mama blong hem. Hem i se: “Oltaem mi raorao wetem tufala.”

I no wan sapraes we ol filing ya oli kamaot taem wan papa no mama i no givim lav long pikinini blong hem. ?Be yu yu save mekem wanem blong winim ol nogud filing ya? Naoia bambae yumi tokbaot sam advaes we yu yu save folem.

• Kam klosap long Jeova God. (Jemes 4:8) Yu save mekem olsem sipos yu ridim Baebol yu wan mo yu joen oltaem wetem ol man blong God. Taem yu luk fasin we Jeova i mekem long ol narafala, bambae yu kasem save se hem i no save lego yu samtaem. Yu save trastem hem. Jeova i askem long ol man Isrel se: “?Olsem wanem? ?Woman i save fogetem pikinini blong hem? ?Yufala i ting se hem i save tanem baksaed long pikinini blong hem, we hem nomo i bonem?” Nao hem i promes se: “Maet i gat woman we i save mekem olsem, be mi bambae mi no save mekem olsem long yufala samtaem.” (Aesea 49:15) Taswe, yu mas prea long God oltaem. Yu no mas wari se yu no save faenem ol stret tok blong talem long God. Hem i kasem save long yu. (Rom 8:26) Yu mas save se Jeova i lavem yu nating we i luk olsem se ol narafala oli no kea long yu.—Ol Sam 27:10.

• Talemaot filing blong yu long wan olfala we yu trastem hem. Traem fren wetem olgeta we oli olfala long saed blong spirit. Yu no mas fraet blong talemaot olgeta filing mo wari blong yu long olgeta. Insaed long kongregesen blong ol Witnes Blong Jeova, yu save faenem ol papa mama long saed blong spirit. (Mak 10:29, 30) Be, maet yu nao yu mas tekem faswan step blong tokbaot ol filing blong yu. Ol narafala oli no save ol filing blong yu sipos yu no talem long olgeta. Taem yu talemaot ol trabol we i stap long hat blong yu, samting ya i save mekem yu yu haremgud bigwan.—1 Samuel 1:12-18.

• Stap bisi long ol gudfala wok we i givhan long ol narafala. I nogud yu stap sore long yu wan oltaem, taswe yu no mas tingting tumas long ol samting we i stap spolem filing blong yu. I moagud we yu lanem blong gat tangkiu from ol gudfala samting long laef blong yu. I gat plante gudfala janis i stap blong ‘yu givhan long narafala. I nogud yu stap lukaot long laef blong yu nomo.’ (Filipae 2:4) Tingbaot ol hae mak long saed blong spirit we yu save kasem, nao wok strong wetem glad tingting blong kasem ol hae mak ya. Taem yu givhan long ol narafala long Kristin wok blong prij, hemia nambawan rod blong putum tingting blong yu i stap long ol narafala, i no long yu wan.

• Gohed blong soemaot respek long papa mama blong yu. Yu no mas fogetem blong folem ol rul mo tingting blong Baebol oltaem. Hemia i min se yu mas ona long papa mama blong yu. (Efesas 6:1, 2) Sipos yu ona long tufala ya, bambae yu no save gat tingting blong givimbak no win. Tingbaot oltaem se, nomata se papa no mama blong yu i mekem i nogud long yu, be hemia i no wan risen blong yu yu mekem nogud long hem. Taswe, yu mas putum trabol ya i stap long han blong Jeova nomo. (Rom 12:17-21) Hem i “laekem ol fasin we i stret” mo i wantem tumas blong lukaotgud long ol pikinini. (Ol Sam 37:28; Eksodas 22:22-24) Taem yu gohed blong soemaot respek long papa mama blong yu, traem wokem ol fasin we oli olsem frut blong tabu spirit blong God—antap moa, fasin lav.—Galesia 5:22, 23.

Yu Save Win

I tru tumas se, taem papa no mama blong yu i no soemaot lav long yu, samting ya i save mekem yu yu harem nogud tumas. Be yu no nid blong letem fasin blong papa no mama blong yu i mekem yu yu kam nogud. Yu yu save gat wan hapi, gudfala laef sipos yu folem ol advaes blong Baebol we yumi jes tokbaot.

William we yumi tokbaot fastaem finis, i stap wok naoia olsem wan volontia long wan ofis blong ol Witnes Blong Jeova. Hem i se: “Jeova i givim plante samting long yumi, blong givhan long yumi blong winim ol nogud samting we i kamaot long laef blong yumi. !I rili wan spesel blesing blong gat wan Papa long heven we i lavem yumi mo i rili tingbaot yumi!” Sista blong hem, Joan, i wan fultaem paenia long wan ples we i nidim moa man blong talemaot gud nius. Joan i talem se: “Taem mitufala i stap gruap, mitufala i luksave klia olsem wanem ‘man we i mekem wok blong God i defren long man we i no mekem.’ (Malakae 3:18) Ol samting we i hapen long laef blong mitufala i mekem mitufala i strong blong holemtaet trutok mo obei gud long hem long laef blong mitufala.”

Semfala samting i save kamtru long yu. Baebol i talem se: “I gat ol man blong mifala we taem oli stap planem kakae long garen blong olgeta, oli stap harem nogud, oli stap krae. Be taem oli tekemaot kakae long garen ya, plis yu mekem olgeta oli glad.” (Ol Sam 126:5) ?Olsem wanem vas ya i stret long yu? Sipos yu wok strong blong folem ol stret rul taem yu fesem trabol, nating se yu stap harem nogud mo krae, be biaen Jeova bambae i blesem yu mo bambae yu haremgud tumas.

Ale, traehad blong kam klosap moa long Jeova God. (Hibrus 6:10; 11:6) Nating se yu bin harem nogud blong plante yia, from we yu wari, yu kros, mo yu harem se ol trabol long laef blong yu i fol blong yu nomo, be ol filing ya oli save finis sloslo, mo long ples blong olgeta, God i save putum “pis we hem i givim, we i bigfala moa, i bitim save blong yumi.”—Filipae 4:6, 7.

[Futnot]

[Bokis blong pija long pej 15]

?Yu Yu Harem Se . . .

• Yu gud blong nating nomo?

• I no waes blong trastem ol narafala from we oli save spolem yu?

• Oltaem yu nidim narafala blong talem se hem i lavem yu?

• Yu kros no yu jalus bitim mak?

Sipos yu ansa yes long ol kwestin ya, yu mas kwik blong tokbaot filing blong yu wetem wan man we yu trastem hem, maet mama no papa blong yu, wan elda, no wan fren we i olfala long saed blong spirit.

[Tok blong pija long pej 16]

Mekem sam samting blong winim ol nogud filing blong yu