Ol Yangfala Oli Askem . . .

?Bambae Mi Mekem Wanem Naoia We Papa i Ronwe Long Mifala?

“Taem mi stap gruap, mi mi harem nogud from we Papa i no stap wetem mifala. Mi bin wantem nomo se hem i stap blong toktok smol long mi.”—Henry.a

JOAN i gat 13 yia taem papa blong hem i ronwe long famle. Hem i man blong drong, taswe afta we hem i aot, hem i no moa toktok i kam long ol pikinini blong hem. Sore tumas, i no Joan nomo we i kasem trabol ya. Plante yangfala, papa blong olgeta i bin ronwe long olgeta.

Sipos samting ya i bin hapen long yu, maet yu faenem se trabol ya i strong tumas blong winim. Maet sam samtaem yu harem se hat blong yu i soa, yu kros, yu no glad, mo tingting blong yu i foldaon. Maet yu wantem mekem stronghed. Solomon, wan long ol man we oli raetem Baebol, i talem se: “Nating we man i waes tumas, be sipos yu yu stap mekem i strong tumas long hem, hemia, yu yu save pusum hem blong mekem krangke fasin.”—Prija 7:7, NW.

“Mekem Krangke Fasin”

James i “mekem krangke fasin” afta we papa blong hem i ronwe. Hem i talem se: “Mi no bin wantem we eni man i bos long mi, mi no wantem harem tok blong mama blong mi tu. Mi mi stap faet oltaem wetem ol narafala yangfala. Mi stap giaman mo mi goaot long naet long fasin haed, from we i no gat wan i stap blong stretem mi. Mama i bin traem blong blokem mi, be hem i no save mekem.” ?Stronghed fasin i mekem laef blong James i gud? No gat. Hem i talem se, i no longtaem, “mi mi kakae drag, mi stap mestem plante dei blong skul, mo mi no pas i go long nekis klas.” Fasin blong hem i kam moa nogud yet. Hem i se: “Mi mi stil long ol stoa, mo mi rabem sam man tu. Tu taem, polis i holem mi mo oli putum mi long kalabus, be hemia i no blokem mi.”

?Wanem i mekem James i kam stronghed olsem? Hem i ansa se: “Papa blong mifala i ronwe, mo i no moa gat man blong stretem mi. Mi mi no tingbaot olsem wanem mi stap spolem mama blong mi, smol brata mo sista blong mi, mo mi wan. Mi mi wantem nomo we papa i stap blong toktok long mi mo stretem mi.”

Sipos yu yu kam stronghed, bambae yu mekem ol samting i kam moa nogud. (Job 36:18, 21) James i pulum plante trabol i kam long hem wan, be antap moa, long mama blong hem mo ol brata sista blong hem. Oli wari mo harem nogud tumas. Samting we i moa nogud se, wan stronghed i save kam badfren blong God. Jeova i wantem se ol yangfala oli mas obei long mama blong olgeta.—Ol Proveb 1:8; 30:17.

Winim Kros

?Be, olsem wanem yu save winim filing ya we yu kros long papa blong yu? Fastaem, maet yu mas tingbaot se i no fol blong yu we papa blong yu i ronwe. Mo tu, from we hem i ronwe, samting ya i no min se hem i no moa laekem yu. I tru, yangfala i save harem nogud tumas taem papa blong hem i no moa kam luk hem no sanem toktok i kam. Be, wan Wekap!b bifo i bin tokbaot ol papa we oli no moa go luk ol pikinini blong olgeta, se i no from we oli no moa laekem olgeta, be from we oli sem mo oli harem se oli mekem wan nogud samting. Samfala bakegen, olsem papa blong Joan, oli kakae drag no oli dring tumas, mekem se fasin blong olgeta i no moa olsem fastaem.

Nomata se i olsem wanem, traem tingbaot se papa mama blong yu tufala i sinman. Baebol i talem se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.” (Rom 3:23; 5:12) Hemia i no minim se i oraet we oli spolem narafala mo mekem samting we i no stret. Be sipos yu luksave se yumi evriwan i sinman, maet i moa isi long yu blong lego kros ya we i stap spolem yu bakegen.

Prija 7:10 i save givhan long yu blong no moa kros long papa mama blong yu. Vas ya i givim woning se yumi no mas tingting tumas long ol samting we i pas finis, i se: “I nogud yu stap talem se, ‘?From wanem we bifo ol samting i gud we i gud, i winim tede?’ Hemia i no tok blong man we i gat hed ya.” Taswe, i moagud blong traem harem gud long laef blong yu naoia i bitim we yu stap tingbaot laef blong yu bifo.

Yu Nomo Yu Go Luk Hem

Wan samting we yu save mekem, yu nomo yu save go luk papa blong yu no sanem toktok i go long hem. I tru, hem nao i bin ronwe long yufala, mo maet yu harem se hem nao i mas toktok i kam fastaem. Be, sipos hem i no mekem olsemia, mo yu harem nogud from we yu no moa luk hem, ale i moagud we yu nao yu traem mekem wan samting. Tingbaot wanem we Jisas Kraes i mekem taem sam fren blong hem oli spolem hem. Long naet bifo we hem i ded, ol aposol oli ronwe long hem. Fastaem finis, Pita i bin tokflas se hem i no save lego Jisas samtaem. Be biaen, hem i giaman se hem i no save Jisas. Hem i mekem samting ya tri taem, i no wan taem nomo.—Matiu 26:31-35; Luk 22:54-62.

Nating se Pita i mestem, Jisas i laekem hem yet. Afta we Jisas i laef bakegen long ded, hem i mekem wan samting blong frengud bakegen wetem Pita. Yes, hem i kamtru long Pita, taem Pita i stap hem wan nomo. (1 Korin 15:5) Jisas i askem long hem se: “?Yu yu lavem mi?” Nao makemgud ansa blong Pita: “Yes Masta, yu save we mi mi lavem yu.” Nating se Pita i mekem samting we hem i mas sem from, be hem i lavem Jisas yet.—Jon 21:15.

Taswe, maet i gat rod blong yu yu save fren bakegen wetem papa blong yu, olsem we Pita mo Jisas i bin mekem. Ating bambae hem i glad sipos yu telefon i go long hem, raetem wan leta, no go luk hem. Henry we yumi tokbaot finis, i se: “Mi mi raetem wan leta i go long papa blong mi, nao hem i raet i kambak, i talem se hem i glad long mi mo i laekem mi tumas. Mi mi pinim leta ya long wol mo i stap long ples ya blong plante yia. Mi holem leta ya kam kasem tede.”

Joan wetem ol brata sista blong hem, olgeta tu oli girap oli go luk papa blong olgeta, nating se hem i stap dring tumas. Joan i talem se: “I tru, hem i drong, be nating, mifala i glad blong luk hem.” Ating yu tu bambae yu harem gud sipos yu go luk papa blong yu. Sipos hem i no glad fastaem, maet yu save letem smol taem i pas, nao yu traem bakegen.

Taem Hem i No Moa Wantem Yu

Solomon i mekem yumi tingbaot se, i gat “taem blong man i faenem samting, mo . . . taem blong man i lusum samting.” (Prija 3:6) Sam yangfala oli soa long hat blong olgeta, from we papa blong olgeta i no moa wantem olgeta. Maet papa blong yu i olsem. Be, wan dei, ating bambae hem i luksave se hem i lusum wan bigfala samting, from we hem i no traehad blong stap frengud wetem yu.

Be, from we hem i no wantem yu, yu no mas ting se yu yu nogud. Deved we i raetem plante Sam long Baebol i talem se: “Hae God. Papa mo mama blong mi, maet tufala i save lego mi, be yu, oltaem nomo bambae yu stap lukaot gud long mi.” (Ol Sam 27:10) Yes, long ae blong God, yu yu sas yet.—Luk 12:6, 7.

Taswe, sipos tingting blong yu i foldaon, kam klosap long God long prea. (Ol Sam 62:8) Talemaot olgeta filing blong yu long hem. Bambae hem i lesin long yu mo mekem yu yu harem gud bakegen. Wan narafala man we i raetem Sam, i talem se: “Taem we mi mi wari, mo mi stap tingting tumas, oltaem yu yu mekem tingting blong mi i kam gud bakegen, yu stap mekem mi mi glad.”—Ol Sam 94:19.

Wan narafala samting we i save givhan long yu blong harem gud bakegen, hemia kampani blong ol Kristin brata mo sista. Ol Proveb 17:17 i talem se: “Fren blong yu, oltaem hem i stap soemaot we hem i lavem yu, mo ol brata blong yumi oli stap, blong yumi save givgivhan long yumi long taem blong trabol.” Yu yu save faenem ol trufala fren olsem, insaed long kongregesenc blong ol Witnes blong Jeova. Maet i gud sipos yu traem save sam elda long kongregesen. Peter, we hem i stret brata blong Joan, i givim advaes ya: “Storian wetem ol olfala long kongregesen, bambae oli givhan bigwan. Sipos papa blong yu i bin ronwe, talemaot filing blong yu long olgeta.” Mo tu, maet ol elda oli save givim sam gudfala advaes, olsem wanem blong mekem ol wok we papa blong yu i bin mekem bifo, olsem fiksimap sam samting long haos.

Ating mama blong yu tu i save givhan gud long yu. I tru, ating hem i harem nogud tumas. Be sipos yu talemaot ol filing blong yu wetem respek, bambae hem i mekem bes blong hem blong givhan long yu.

!Givhan Long Famle!

Taem papa blong yufala i ronwe, ating samting ya i jenisim famle bigwan. Maet mama blong yu i mas wok, no maet hem i mas gat tu wok blong winim naf vatu blong pem ol samting blong yufala. Ating yu mo ol brata sista blong yu, yufala i mas mekem moa wok long haos. Blong harem gud long ol jenis ya, yu mas gat lav we ol Kristin oli gat, we i pulum man blong oli no tingbaot olgeta nomo. (Kolosi 3:14) Lav ya i save givhan long yu blong holem wan gudfala tingting mo sakemaot kros. (1 Korin 13:4-7) Peter i talem se: “I stret we mi mi givhan long famle blong mi. Mo tu, mi harem gud blong save se mi stap mekem i moa isi long mama blong mi mo ol sista blong mi.”

Tru ya, taem papa i ronwe, hemia i nogud tumas mo i mekem hat blong famle blong hem i soa. Be yu yu save bilif strong se, sipos God mo ol Kristin fren mo famle oli givhan long yu mo famle blong yu, bambae yufala i naf blong winim trabol ya.d

[Futnot]

[Tok blong pija long pej 26]

Sam yangfala oli sanem toktok i go long papa blong olgeta