Stori Blong Sam Gudfala Famle—Faswan Haf
Spesel Wekap! ya i tokbaot finis olsem wanem ol gudfala famle tu oli kasem problem. Yumi no sapraes long samting ya, from we yumi stap long taem ya we Baebol i talem se laef “i kam strong tumas.” (2 Timoti 3:1) I sua se evri famle bambae oli kasem sam problem.
Samtaem laef i no rongud olsem we yumi wantem, be nating, yumi save gat wan gudfala famle yet. Yumi no mas fogetem samting ya. Jisas i talem se: “Olgeta we oli stap lukaot God from we oli no gat paoa blong hem long laef blong olgeta, oli save harem gud.” (Matiu 5:3) Ol famle oli lukaot God taem oli folem ol rul blong Baebol. Hemia nao rod blong gat wan gudfala famle nating se famle i kasem hadtaem. Tingbaot sam eksampol.
Taem pikinini blong yu i handikap. Baebol i pulum ol papa mama blong tinghevi long wok blong olgeta blong lukaot long famle, hemia i minim olgeta tu we oli gat ol spesel nid. Baebol i talem se: “Man we i no wantem lukaot long olgeta famle blong hem, mo antap long hem, hem i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.”—1 Timoti 5:8.
Long pej 15, wan papa long Saot Afrika, nem blong hem Victor, i tokbaot olsem wanem hem mo waef blong hem tufala i lukaot long pikinini blong tufala we i handikap, blong bitim 40 yia.
Taem wan narafala papa mama i adoptem yu. Ol tok blong Baebol oli save givhan long man blong gat gudfala tingting long hem wan—nating se stret papa mama blong hem tufala i lego hem. Yes, Baebol i talem se Jeova God i stap “givhan” long olgeta we oli no gat papa.—Ol Sam 10:14.
Long pej 16, wan yangfala woman long Yunaeted Stet, nem blong hem Kenyatta, hem i tokbaot olsem wanem hem i faenem rod blong winim ol nogud filing we hem i gat from we hem i neva luk stret papa mama blong hem.
Taem papa no mama blong yu i ded. Taem papa no mama blong yu i ded, yu save harem nogud blong longtaem. Baebol i save givhan long yu blong harem gud bakegen. Baebol i kamaot long Jeova God, we hem i “stamba blong fasin blong givhan.”—2 Korin 1:3.
Long pej 17, wan yangfala woman Ostrelia, nem blong hem Angela, i eksplenem olsem wanem fasin fren blong hem wetem God i halpem hem blong harem gud bakegen afta we papa blong hem i ded.
Olgeta famle oli kasem sam problem we oli mekem se laef blong olgeta i no isi. Ol stori we oli kam biaen, bambae oli soemaot se samting we i halpem ol famle blong winim ol hadtaem, hemia blong folem ol tok blong Baebol long laef blong olgeta.
[Bokis/Foto blong pija long pej 15]
Taem Pikinini Blong Yu i Handikap
Victor Maynes blong Saot Afrika i talem stori ya
“Stat long taem we Andrew i bon kam kasem naoia, hem i mas dipen long mitufala blong jenisim hem, wasem hem, mo samtaem mitufala i mas fidim hem tu. Naoia Andrew i gat 44 yia blong hem.”
TAEM Andrew i gat wan yia finis, mitufala i ting se wan samting i rong from we hem i no wokbaot yet. Nao wan dei, hem i stat seksek nogud mo i saksakem bodi blong hem olbaot long graon. Kwiktaem nomo mitufala i karem hem i go long hospital, ale ol dokta oli talem long mitufala se hem i gat sik blong faol. Be i no hemia nomo. Ol dokta oli mekem sam moa tes mo oli faenemaot se wan haf blong bren blong Andrew i no wokgud.
Oli givim plante defren kaen meresin long hem blong traem faenem wan we i stret long hem. Biaen oli faenem wan we i givhan long hem blong hem i no seksek tumas. Blong smoltaem, hem i stap tekem fo defren kaen meresin tri taem evri dei. Nating se i olsem, i no gat meresin we i save mekem bren blong hem i wokgud bakegen. Naoia Andrew i gat 44 yia blong hem, be tingting blong hem i olsem wan pikinini we i gat faef no sikis yia nomo.
Ol dokta oli talem long mitufala blong putum Andrew long wan spesel hospital, be mitufala i no wantem mekem olsem. Mitufala i naf blong lukaot long Andrew, taswe mitufala i tekem desisen se bambae mitufala i lukaot long hem long haos, nating se mitufala i save se bambae i no isi.
Olsem nao, ful famle i givhan blong lukaot long hem. Ol narafala pikinini blong mitufala oli givhan bigwan long saed ya. !Mi mi talem tangkiu long tufala gel mo boe blong mitufala we trifala i stap yet long haos! Mo tu, mifala i Witnes blong Jeova, mekem se olgeta long kongregesen blong mifala oli givhan bigwan long mifala. Samtaem oli kukum kakae mo givim long mifala, mo wanwan taem oli lukaot long Andrew, blong mifala i save joen long wok blong prij no mekem sam narafala samting.
Oltaem mifala i tingbaot toktok blong Aesea 33:24, we God i promes se wan dei bambae ‘i no moa gat man we i save talem se hem i sik.’ Mifala i bilif strong se bambae God i mekem stamba tingting blong hem i kamtru, blong mekem wan niufala wol mo blong finisim olgeta sik. (2 Pita 3:13) Mifala i putum tingting blong mifala i stap strong long taem ya we Andrew bambae i kamgud. Go kasem taem ya, mifala i bilif long tok we Jisas i talem se, sipos mifala i putum ol wok blong Kingdom blong God long fasples long laef blong mifala, bambae God i givim ol samting we mifala i nidim. (Matiu 6:33, NW) Mifala i luk we Jeova i mekem samting ya oltaem. Neva mifala i sot long wan samting.
I tru se i no olgeta man we oli naf blong lukaot long wan famle we i sik, long haos blong olgeta. Be sipos yu yu stap mekem samting ya, faswan advaes we mi wantem givim long yu, hemia blong prea oltaem wetem fulhat blong yu. (1 Pita 5:6, 7) Seken advaes se, yu mas lukaot gud long pikinini blong yu mo soem long hem se yu lavem hem, mo yu neva mas ting se pikinini blong yu i no naf blong save Jeova God mo lavem hem. (Efesas 6:4) Namba tri advaes se, yu mas letem ol narafala long famle tu oli givhan blong lukaot long pikinini ya. Namba fo advaes se, yu mas tingbaot we pikinini blong yu bambae i kasem moa lav sipos hem i stap wetem famle blong hem long haos blong yu nomo. I tru se ol wanwan famle oli no sem mak. Long saed blong mifala, mifala i no sore nating we mifala i lukaot long Andrew long haos. Ol fasin blong hem i pulum mi blong lavem hem tumas. Mi save se hem i no moa wan pikinini, hem i wan bigman finis, be mi lavem hem yet.
[Bokis/Foto blong pija long pej 16]
Taem Wan Narafala Papa Mama i Adoptem Yu
Kenyatta Young blong Yunaeted Stet i talem stori ya
“Maet stret papa blong yu no mama blong yu i mared namba tu taem long wan defren woman no man. Nating se i olsem, yu save glad yet from we wan long tufala i stret papa no mama blong yu. Be from we papa mama blong mi tufala i adoptem mi, i no gat wan long tufala we i stret papa no mama blong mi. Mo mi no save tu sipos mi mi olsem stret mama blong mi no stret papa blong mi.”
MI NO save nating hu ya stret papa blong mi, mo mi neva luk stret mama blong mi. Taem mama blong mi i gat bel long mi, hem i dring bitim mak mo i tekem drag. Afta we hem i bonem mi, mi go stap long wan spesel haos blong ol pikinini we papa mama blong olgeta oli lego olgeta. Mi stap long ol defdefren haos olsem, ale jes bifo we mi gat tu yia, wan man mo woman tufala i adoptem mi.
Papa blong mi we i adoptem mi i talem se taem woman we i wok long saed blong ol pikinini we oli adoptem, i soem foto blong mi long hem, wantaem nomo hem i wantem adoptem mi. Mo kwiktaem nomo mi laekem niufala mama blong mi. Mi talem long hem se hem i rili mama blong mi mo mi wantem gohom wetem hem.
Nating se mi laekem tufala, mi tingbaot se taem mi pikinini, mi mi fraet se sipos mi mekem wan samting we i no stret, bambae tufala i sanem mi mi gobak long spesel haos ya. From samting ya, mi harem se mi no save kam kros mo harem nogud, mo mi no save sik olsem ol narafala pikinini. !Kof tu, mi bin ting se mi mas traehad blong mi no kasem! Be papa mama blong mi tufala i talem long mi oltaem se tufala i lavem mi mo bambae tufala i no lego mi.
Taem mi kam bigwan, mi gohed blong harem nogud, from we mi ting se mi mi nogud mo mi no olsem ol narafala we oli gruap wetem stret papa mo mama blong olgeta. Taem mi stat blong harem gud, wan man bambae i talem long mi se, “!Yu mas glad tumas se yu gat wan nambawan papa mo mama blong yu we tufala i wantem adoptem yu!” I tru, mi glad tumas from tufala, be toktok olsem i mekem mi mi harem se wan samting i rong long mi, mo se i hadwok long narafala blong lavem mi.
Ating bambae mi neva save hu ya i stret papa blong mi, mo samting ya i had long mi. Samtaem mi harem nogud from we stret mama blong mi i no bin traehad blong stretem laef blong hem blong hem i save lukaot long mi, i olsem se hem i ting nating long mi. Be samtaem mi sore long hem tu. Plante taem mi tingbaot se sipos wan dei mi luk hem, bambae mi talem long hem se mi gat wan gudfala laef, mo se hem i no mas harem nogud from we hem i lego mi.
Papa mama blong mi we tufala i adoptem mi, tufala i Witnes blong Jeova. Beswan presen we tufala i givim long mi, hemia se tufala i tijim mi long ol save blong Baebol. Ol tok blong Ol Sam 27:10 i leftemap tingting blong mi oltaem, i se: “Hae God. Papa mo mama blong mi, maet tufala i save lego mi, be yu, oltaem nomo bambae yu stap lukaot gud long mi.” Samting ya i tru tumas long saed blong mi. Mo i gat sam gudfala samting i save kamaot long laef blong wan boe no gel we narafala i adoptem hem. Long saed blong mi, ating from we mi no save se mi mi kamaot long wanem famle mo mi no save wanem i hapen long laef blong olgeta, mi mi wantem tumas blong save long ol narafala, se oli kam wea mo samting we i hapen long laef blong olgeta. Mi laekem tumas blong joen wetem ol narafala man, mo samting ya i impoten tumas long wok we ol Kristin oli mekem blong prij long ol narafala. Mi tu mi wan Witnes blong Jeova mo mi laekem blong tokbaot Baebol. Samting ya i mekem se mi gat gudfala tingting long mi wan mo mi save se laef blong mi i no blong nating nomo. Taem tingting blong mi i foldaon, mi go givhan long ol narafala. Mi luk se taem mi tijim ol narafala long Baebol, mi kasem save gud long olgeta. Yumi evriwan i gat sam stori blong talem long saed blong samting we i hapen long laef blong yumi.
[Bokis/Foto blong pija long pej 17]
Taem Papa No Mama Blong Yu i Ded
“Taem papa blong mi i ded, mi harem se mi fraet. Man ya we i save evri samting mo i save givhan long mi blong winim eni problem long laef blong mi, hem i no moa stap.”
Angela Rutgers blong Ostrelia i talem stori ya
TEN yia i pas finis, papa blong mi i ded. Long taem ya, mi mi wan yangfala nomo. Sikis manis bifo we hem i ded, ol dokta oli katem hem. Jes afta we oli katem hem, dokta i talem long mifala se oli no moa save mekem wan samting blong givhan long hem. Mama blong mi i wantem se dokta i givim moa save long hem, brata blong mi, ae blong hem i dak, mo ol filing blong mi oli olbaot we mi harem se i no gat rod blong harem gud. Sikis manis biaen papa blong mi i ded.
Long taem ya mi harem se mi mi konfius bigwan, ol filing blong mi oli olbaot. Mi wantem se ol fren blong mi oli save filing blong mi, be mi no wantem we oli sore long mi. Taswe mi traehad blong no soemaot ol filing blong mi long olgeta. Nating se mi mekem olsem, mi no wantem harem gud long kampani blong olgeta, from se maet oli ting se mi harem gud finis, be samting ya i no tru. !Taem mi tingting bak long fasin blong mi long taem ya, mi luksave se ol fren blong mi oli rili gat longfala tingting!
Samtaem mi mi sore, from we i gat sam samting we mi mi no mekem bifo we papa blong mi i ded. Mi sore we mi no talem long hem moa se, “!Mi lavem yu!” Mi sore we mi no putum han blong mi i goraon long hem moa, mo we mi no spenem moa taem wetem hem. Mi save se bambae hem i no wantem we mi mi tingting olsem, be mi harem nogud yet.
Mi mi wan Witnes blong Jeova, mo mi bilif long promes blong Baebol se ol dedman bambae oli laef bakegen. Promes ya i givhan long mi blong harem gud long tingting blong mi. (Jon 5:28, 29) Mi traem tingbaot se i olsem we papa blong mi i go spel long wan narafala kantri, mo wan dei bambae hem i kamhom. Be stret dei ya we bambae hem i kamhom, mi mi no save. Ol man oli talem long mi se, “Papa blong yu bambae i laef bakegen.” Be samting we i narakaen se, fastaem, mi no harem gud long tok ya. Mi mi harem se, ‘!Mi wantem we papa blong mi i kambak naoia nomo!’ Be pijatok ya se hem i go spel long wan narafala kantri i givhan long mi. Pijatok ya i pulum mi blong tingbaot se bambae hem i laef bakegen, mo tu i halpem mi blong stanap strong jes afta we papa blong mi i lus.
Ol narafala Kristin oli halpem mi bigwan. Mi tingbaot wan Kristin we i talem long mi se i had tumas long hem blong tokbaot ded blong papa blong mi, be hem i stap tingbaot mi mo famle blong mi oltaem. Tok ya i stap gud long tingting blong mi. Tok ya i givhan long mi long ol dei we i no gat man i talem wan samting long mi long saed blong ded blong papa blong mi, i mekem mi mi save se nating we ol narafala oli no toktok long mi, be oli stap tingbaot mi mo famle blong mi. !Samting ya i tajem hat blong mi!
Fo manis afta we Papa i ded, Mama i stat blong joen moa long wok blong prij, mo mi luk we hem i kasem bigfala glad from. Taswe mi joenem hem long wok ya. Mi sapraes olsem wanem mi harem gud taem mi givhan long ol narafala. Wok ya i mekem bilif blong mi i kam strong moa long Tok blong Jeova mo long ol promes blong hem, mo tu i givhan long mi blong mi no tingbaot tumas ol trabol blong mi.