Wan Spesel Fasin We Mi Kasem Long Papa Mama

OLSEM BLOSSOM BRANDT I TALEM

Sno i foldaon long San Antonio, Teksas, long Janewari 17, 1923, dei we mi bon long hem. Ples afsaed i kolkol, be mi stap womgud long han blong gudfala Kristin papa mama blong mi, Judge mo Helen Norris. Stat long taem we mi stap kasem save long ol samting, olgeta samting we papa mama blong mi tufala i mekem oli soem se wosip blong tufala long Jeova God i impoten long laef blong tufala.

LONG 1910 taem Mama i gat eit yia, papa mama blong hem oli muvaot long wan ples kolosap long Pitasbeg, Pensylvania, oli go long wan plantesin afsaed long Alvin, Teksas. Long ples ya oli glad blong lanem ol trutok blong Baebol long wan man we i stap kolosap long olgeta. Stat long taem ya, Mama i spenem ful laef blong hem blong mekem ol man oli intres long hop blong Kingdom. Hem i baptaes long 1912 afta we famle i bin muf i go long Haoston, Teksas.

Faswan taem blong Mama mo papa mama blong hem oli mitim Charles T. Russell, faswan presiden blong Watch Tower Bible and Tract Society, taem hem i visitim kongregesen blong olgeta long Haoston. Plante taem famle ya i askem ol man we Sosaeti i stap sanem blong oli kam long haos blong olgeta, we long taem ya oli stap kolem olgeta se ol pilgrim.a Sam yia biaen, Mama mo papa mama blong hem oli muf i go long Jikago, Ilinois, mo Brata Russell i bin go visitim kongregesen long ples ya tu.

Long 1918, Bubu woman i kasem sik ya Spanis flu, mo from we sik ya i mekem se bodi blong hem i no moa strong, dokta i talem se i moa gud blong hem i stap long ples we i hot lelebet. From we Bubu man i stap wok long wan kampani blong tren, long 1919, oli sanem hem i gobak blong mekem wok ya long Teksas. Long ples ya, long San Antonio, Mama i mitim wan yangfala man, wan memba blong kongregesen we i wok strong long wok blong God, nem blong hem Judge Norris. Wantaem nomo tufala i laeklaekem tufala, mo biaen tufala i mared, ale Judge i kam papa blong mi.

Papa i Lanem Trutok Blong Baebol

Taem Papa i bon, oli putum nem blong hem se Judge (Jaj). Taem papa blong hem i luk hem fastaem, hem i talem se: “Fes blong pikinini ya i strong olsem wan jaj,” mo oli putum nem blong hem olsem. Long 1917, taem Papa i gat 16 yia, oli givim tufala traket long hem, hemia, Where Are the Dead? mo What Is the Soul? we Watch Tower Bible and Tract Society i prentem. Papa blong Judge i ded tu yia bifo, mo tufala traket ya i ansarem ol kwestin long saed blong ded we Papa i bin wantem blong save. Smoltaem biaen hem i stat blong joen long ol miting blong ol Baebol Studen, nem blong ol Wetnes blong Jeova long taem ya.

Wantaem nomo papa i wantem joen long ol wok long kongregesen. Oli givim wan teritori long hem blong hem i save prij long hem, mo afta skul, hem i save ron long baskel i go long ples ya blong givimaot ol traket. Hem i joen fulwan blong serem hop blong Kingdom, mo long Maj 24, 1918, hem i soemaot se hem i givim laef blong hem long Jeova taem hem i baptaes long wora.

Long yia we i kam biaen taem Mama i muf i go long San Antonio, wantaem nomo wan samting i pulum ae blong papa we hem i talem se “wan smael we i swit tumas mo ol blu ae” we neva hem i luk. I no longtaem tufala i soemaot se tufala i wantem mared, be tufala i fesem hadtaem blong mekem papa mama blong Mama oli agri. Be, long Epril 15, 1921, tufala i mared. Tufala tugeta i putum Kristin minista wok olsem nambawan mak blong tufala.

Kwik Stat Long Minista Wok

Taem Mama mo Papa tufala i stap bisi blong mekem plan blong go long asembli long Seda Poen, Ohaio, long 1922, tufala i faenemaot se Mama i gat bel long mi. Smoltaem afta we mi bon, taem Papa i gat 22 yia nomo, oli putumap hem long kongregesen olsem man we i lukaot long wok blong prij. Samting ya i min se hem i mas mekem olgeta plan long saed blong wok blong prij. Long sam wik nomo afta we mi bon, Mama i tekem mi wetem hem long wok blong prij long ol haos wanwan. Biaen, tufala bubu blong mi tu i wantem tekem mi wetem tufala long wok blong prij.

Taem mi gat tu yia nomo, mi wetem papa mama blong mi mifala i muf i go long Dalas, Teksas, mo tri yia biaen tufala i stat blong mekem wok blong fultaem paenia. Long naet, tufala i slip long saed blong rod long wan bed we i isi blong karem mo tufala i putum mi long jea biaen long trak. Yes, mi ting se samting ya i gud, be i no longtaem i kam klia se tufala i no rere yet blong mekem wok blong paenia. Taswe Papa i statem wan bisnes. Biaen, hem i bildim wan smol kat blong rere blong statem wok blong paenia bakegen.

Taem mi stat blong go long skul, Mama i tijim mi blong rid mo raet, mo mi save talem taemstebol baehat stat long wan kasem fo. Oltaem hem i wantem mi blong lanem samting. Hem i wasem ol dis mo putum mi mi stanap long wan jea kolosap long hem blong draemap ol dis ya, mo hem i tijim mi blong tingbaot ol vas blong Baebol mo blong sing long ol singsing blong Kingdom, no ol him, olsem nem we mifala i yusum blong kolem ol singsing long taem ya.

Mekem Wok Blong God Wetem Papa Mama Blong Mi

Long 1931, mifala evriwan i go long nambawan asembli ya long Kolambas, Ohaio, ples we mifala i tekem nem ya ol Wetnes blong Jeova. Nating se mi gat eit yia nomo, mi ting se hemia i wan nem we i naes tumas we neva mi bin harem bifo. Smoltaem afta we mifala i kamhom, faea i flatemgud bisnes blong Papa, mo Papa mo Mama tufala i tingbaot se hemia “wil blong Masta” blong tufala i mas statem wok blong paenia bakegen. Ale, stat long hot taem blong 1932, mifala i harem gud long plante yia long fultaem Kristin minista wok.

Papa mama blong mi tufala i mekem wok blong paenia long sentrol Teksas blong stap kolosap long papa mo mama blong Mama, we tufala i stap yet long San Antonio. Fasin ya we oli stap sanem mifala i go wok long ol defren ples i minim se mi jenisim skul plante taem lelebet. Plante taem ol fren we oli no tingtinggud oli talem se, “From wanem yufala i no wantem stap kwaet long wan ples blong gat wan haos blong pikinini ya,” i olsem we papa mama tufala i no lukaot gud long mi. Be mi ting se laef blong mifala i nambawan tumas mo mi givhan long Papa mo Mama long wok we tufala i stap mekem. Biaen, mi lanem mo mi rere long samting we i save kam prapa stael blong laef blong mi wan.

Long fo manis mi gohed blong talem long Papa Mama se mi wantem baptaes, mo plante taem tufala i tokbaot samting ya long mi. Tufala i wantem se mi mas save long strong disisen we mi tekem. Long Desemba 31, 1934, dei i kam blong mekem samting ya long laef blong mi. Be, long naet bifo, Papa i mekem sua se mi bin prea long Jeova. Ale hem i mekem wan naesfala samting. Hem i mekem mifala i stanap long ni blong mifala, mo hem i mekem wan prea. Hem i talem long Jeova se hem i glad tumas long disisen we smol gel blong hem i mekem blong givim laef blong hem long Hem. !Yes, mi no save fogetem naet ya long ol yia we i kam!

Kasem Trening Long Tufala Bubu Blong Mi

Bitwin 1928 mo 1938, mi spenem plante taem blong visitim tufala bubu blong mi long San Antonio. Fasin blong tufala i kolosap sem mak long fasin blong papa mama blong mi. Bubu woman i bin wok olsem man we i go fastaem blong prij, nem we oli stap yusum blong kolem ol paenia, mo biaen hem i kam wan haftaem paenia. Bubu man i kam wan paenia long Desemba 1929, taswe wok blong prij i wan wok we oli mekem evridei.

Long naet bubu man i holem mi long han blong hem mo i tijim mi long nem blong ol sta. Hem i save talem bakegen ol naesfala tok long mi long tingting blong hem. Mi mekem plante trep wetem hem long tren taem hem i wok yet long kampani blong tren. Hem i wan man we mi stap kam luk hem oltaem taem mi kasem trabol; hem i leftemap tingting blong mi mo i mekem mi haremgud bakegen. Be, taem oli stretem mi from rong fasin we mi mekem mo mi go luk hem blong lukaot help, bambae hem i talem nomo (ol wod we mi no kasem save long taem ya, be jun blong olgeta i klia gud) se: “Gudfala gel, taem wan man i mekem wan rong samting, hem i harem nogud from.”

Ol Yia We Ol Man Oli Ronem Mo Mekem Nogud Long Mifala

Long 1939, Seken Wol Wo i stat, ol man blong Jeova oli harem nogud from ol man mo ol grup blong ol man blong faet oli ronem mo mekem nogud long olgeta. Long en blong 1939, Mama i sik tumas mo from we oli mas katem hem from sik blong hem, ale mifala i muf i gobak long San Antonio.

Ol man oli mekem grup blong faet taem mifala i stap seremaot magasin long ol rod blong San Antonio. Be evri wik, olsem wan famle, mifala i stap long ples ya, mifala i stanap wanwan long kona. Plante taem mi wajem Papa taem oli pulum hem i go long polis stesen.

Papa i traem blong gohed blong mekem wok blong paenia nating se Mama i stop finis. Be, hem i no kasem inaf mane long haftaem wok, taswe hem tu i stop long wok blong paenia. Mi finis skul long 1939, mo mi tu mi kasem wan wok.

Nem blong Papa, (Jaj), i givhan long ol yia ya. Eksampel, wan grup blong ol brata sista oli go blong prij long wan taon long not blong San Antonio, mo wan polis long ples ya i stat blong putum olgeta evriwan long kalabus. Hem i holemtaet samwe long 35 long olgeta, tufala bubu blong mi tu i stap wetem olgeta. Oli sanem toktok i go kasem Papa, mo hem i draev i kam long ples ya. Hem i wokbaot i go insaed long ofis blong polis ya mo i talem se: “Mi mi Judge Norris blong San Antonio.”

Polis ya i askem se, “?Yes Masta, Jaj, wanem samting nao yu yu wantem blong mi mekem?”

Papa i ansa se, “Mi mi kam blong luk yu blong tekemaot ol man ya long kalabus.” !Ale polis ya i letem oli go we hem i no holemtaet ol ting blong olgeta​—mo hem i no moa askem narafala kwestin!

Papa i laekem tumas blong prij long ol ofis long taon, antap moa hem i laekem blong go visitim ol jaj mo ol loea. Hem i talem long man we i wok long ofis se: “Mi mi Judge Norris, mo mi kam blong luk Jaj long ples ya.”

Ale, taem hem i mitim wan jaj, oltaem hem i talem fastaem se: “Naioa, bifo we mi tokbaot plan blong visit blong mi, mi wantem eksplenem se mi bin stap olsem wan jaj longtaem moa bitim yu. Mi mi stap olsem wan jaj long ful laef blong mi.” Mo biaen hem i save eksplenem olsem wanem hem i kasem nem blong hem. Fastok ya i mekem se oli frengud wetem hem, mo hem i mekem fren wetem plante jaj long taem ya.

Mi Talem Tangkyu From Tijing Blong Famle

Long ol raf yia blong yangtaem blong mi bitwin 13 mo 20 yia, mo mi save se Papa mama tufala i tingting tumas taem tufala i stap wajem mo wari long samting we mi save mekem biaen. Olsem fasin blong ol pikinini, plante taem mi traem Papa mo Mama, mi askem tufala blong mekem wan samting no blong go samples we mi save finis se from taem olsem, bambae tufala i ansa se, no gat. Samtaem tufala i krae. Rili, mi mi save harem nogud tumas sipos tufala i bin talem se: “Gohed, mekem wanem samting we yu wantem. Mitufala i no kea.”

Mi kasem filing se mi stap sefgud taem mi save se mi no save fosem tufala blong jenisim ol rul blong tufala. Be, samting ya i mekem i isi long mi taem ol narafala yangfala oli askem mi blong go long sam pleplei we oli no stret, mi save talem se: “No, Papa blong mi i no save letem mi blong go.” Taem mi gat 16 yia, Papa i mekem sua se mi mi save draev mo blong tekem laesens blong mi blong draev. Mo tu, long taem ya hem i givim ki blong haos long mi. Mi mi glad tumas se hem i trastem mi. Mi harem se mi kam bigman finis, mo samting ya i mekem se mi kasem tingting blong holem responsabiliti mo mi no wantem mekem se tufala i no moa trastem mi.

Long taem ya mifala i no kasem tumas advaes long saed blong mared, be Papa i save Baebol mo samting we Baebol i talem long saed blong mared long “man we i mas wan man blong Masta blong yumi.” (1 Korin 7:39) Hem i talem klia long mi se sipos mi karem wan boe we i no stap long trutok i kam long haos, no mi stap laekem wan we i no stap long trutok, bambae hem i harem nogud tumas. Mi save se tok blong hem i stret, from mi bin luk fasin glad mo fasin joen long mared blong tufala from tufala i mared long wan we hem i “blong Masta blong yumi.”

Long 1941, taem mi gat 18 yia, mi ting se mi laekem wan yangfala man long kongregesen. Hem i wan paenia mo i stap stadi blong kam wan loea. Mi harem gud tumas. Taem mitufala i talem long papa mama blong mi se mitufala i wantem mared, tufala i no soem se tufala i no agri no tufala i harem nogud from, be tufala i talem sloslou se: “Blossom, mitufala i wantem askem wan samting long yu. Mitufala i ting se yu yu yang tumas, mo mitufala i wantem askem yu blong wet wan yia. Sipos yutufala i rili laeklaekem yutufala, blong wet wan yia i nating nomo.”

Mi harem gud tumas we mi bin lesin long advaes ya. I no wan yia yet, mi gruap lelebet long tingting mo mi stat blong luksave se yangfala man ya i no gat ol fasin we bambae i mekem hem i wan gudfala hasban. Biaen yangfala man ya i livim ogenaesesen, mo mi ronwe long samting we i save mekem trabol long laef blong mi. !I gud tumas blong gat ol waes papa mama we yumi save dipen long fasin luksave blong olgeta!

Mared Mo Wok Blong Goraon

Long koltaem blong 1946, afta we mi bin spenem sikis yia long wok blong paenia mo long haftaem wok blong winim mane, wan nambawan yangfala man we neva mi bin mitim hem bifo i kam long Haos Kingdom blong mifala. Gene Brandt i wok olsem wan fren blong brata we i goraon blong visitim ol kongregesen, hemia nem we oli yusum blong kolem ol seket elda long taem ya. Gudfala fasin blong hem i pulum mi, mo long Ogis 5, 1947, mitufala i mared.

I no longtaem, Papa mo Gene tufala i openem wan bisnes blong lukaot ol mane mo ol kaon. Be Papa i talem long Gene se: “Sipos bisnes ya i blokem yumi blong go long miting no blong go folem wan tiokratik oda, bambae mi klosem bisnes ya.” Jeova i blesem tingting ya long saed blong speret, mo wok ya i givim inaf mane blong givhan long ol nid long saed blong bodi mo i givim taem long tufala blong mekem wok blong paenia. Papa mo Gene oli gudfala bisnesman, mo i isi nomo blong mifala i kam rij, be neva tingting ya i kam wan mak blong tufala.

Long 1954, oli askem Gene blong wok olsem wan seket elda, we i minim se mitufala i mas jenisim plante samting long laef blong mitufala. ?Papa mama blong mi tufala i mekem wanem nao? Wantaem bakegen, tufala i no tingbaot tufala nomo tufala i tingbaot intres blong Kingdom blong God mo ol gudfala samting long saed blong speret blong ol pikinini blong tufala. Neva tufala i talem long mitufala se: “?From wanem yutufala i no wantem gat sam pikinini blong mitufala i save gat sam smol bubu?” Be, oltaem tufala i talem se: “?Mitufala i save mekem wanem blong givhan long yutufala long fultaem wok ya?”

Ale taem stret taem i kam blong mitufala i go, i gat ol toktok nomo blong leftemap tingting blong mitufala mo glad from bigfala wok we mitufala i kasem. Neva tufala i harem se mitufala i stap lego tufala be tufala i sapotem mitufala fulwan. Afta we mitufala i aot, tufala i stap bisi long wok blong paenia long ten yia bakegen. Oli putumap Papa olsem elda blong visitim ol kongregesen long taon blong San Antonio, we hem i bin holem wok ya blong 30 yia. Hem i glad blong luk we wan kongregesen long taon ya biaen long 1920 i go antap kasem 71 kongregesen bifo we hem i ded long 1991.

Long saed blong mi mo Gene, mitufala i glad oltaem. Mitufala i glad tumas blong givhan long ol gudfala brata mo sista long bitim 31 teritori mo, maet samting we i mekem mitufala i glad moa hemia jans we mitufala i gat blong go joen long 29 klas blong ‘Watchtower Bible School of Gilead’ long 1957. Afta mitufala i gobak long wok blong visitim ol kongregesen. Long 1984, afta long 30 yia long wok blong distrik mo seket, Sosaeti i askem Gene blong mekem wok blong visitim ol kongregesen long San Antonio, from we papa mama tufala i gat bitim 80 yia mo tufala i no moa strong.

Lukaot Long Papa mama

Mama i kasem sik wan yia haf nomo afta we mitufala i kambak long San Antonio mo hem i ded. Samting ya i hapen kwiktaem tumas mekem se mi no gat taem blong talem ol samting we mi mi wantem talem long hem. Samting ya i tijim mi blong toktok plante wetem Papa. Afta long 65 yia long mared blong tufala, naoia hem i mestem bigwan mama, be mitufala i stap blong givim lav mo sapot long papa.

Eksampel blong longfala laef blong Papa long saed blong go long Kristin miting, stadi, mo wok blong prij i go kasem we hem i ded. Hem i laekem rid. Taem mitufala i goaot long wok blong prij mo hem wan i stap, mi kam bak mo mi askem se, “?Yu yu harem se yu no gat fren, yu stap yu wan?” Hem i bin stap bisi tumas blong rid mo stadi, hem i no tingbaot se hem i stap hem wan.

I gat wan narafala fasin we mitufala i holemtaet. Oltaem Papa i talem long famle blong kakae wanples, antap moa long moning blong mekem vas blong dei. Taem mi smol, neva mi livim haos we mi no joen blong mekem vas blong dei. Samtaem mi talem se: “Be Papa, bambae mi mi let long skul (no long wok) ya.”

Be Papa i save talem se, “I no vas blong dei we i mekem yu let, hemia from we yu slip let.” Mo mi mas stap mo lesin long vas blong dei. Hem i mekem sua se eksampel ya i mas stap kasem we hem i ded. Hemia wan narafala fasin we hem i livim long mi.

Tingting blong Papa i klia gud kasem taem we hem i ded. Samting we i mekem i moa isi blong lukaot long hem, i from we hem i neva gat fasin blong kros no toktok kros. Yes, samtaem hem i talemaot ol sik blong hem we ol joen oli stap soa (arthritis), be bambae mi talem se rili sik ya hem i “Adamitis” we i kamaot from sin blong Adam mo samting ya i mekem se hem i laf. Taem mi mo Gene i stap sidaon kolosap long hem, long kwaet fasin nomo, Papa i ded long moning blong Novemba 30, 1991.

Naoia mi gat 70 yia mo mi stap karem frut yet long gudfala eksampel blong nambawan Kristin papa mama blong mi. Mo mi mi prea se oltaem bambae mi yusumgud laef blong mi long ol yia we i kam blong pruvum fulwan fasin tangkyu long fasin blong laef we tufala i livim long mi.​—Ol Sam 71:​17, 18.

[Futnot]

[Tok Blong Pija Long Pej 5]

Mama wetem mi

[Tok Blong Pija Long Pej 7]

1. Faswan asembli we mi go long hem: San Makos, Teksas, Septemba 1923

2. Laswan asembli we Papa i go long hem: Fot Woth, Teksas, Jun 1991 (Papa i sidaon)

[Tok Blong Pija Long Pej 9]

Gene mo Blossom Brandt