Tingting i Foldaon, Bilif i Lus

“OL DEDBODI oli stap olbaot long evri ples. Mifala i no luksave se haos blong mifala i bin stap wea bifo.” Hemia toktok blong wan man Sri Lanka, afta we taetel wef i spolemgud vilej blong hem long Disemba 2004. Wan man blong raetem ol stori long saed blong jos long niuspepa, i raetem wan stori long saed blong disasta ya. Hem i talem se taem hem i prea, samtaem hem i kros tumas, i “kakae tut blong hem from.”

Plante man oli ting se God i mekem ol disasta oli kamaot olsem ol panis. Wan man blong raetem niuspepa i tokbaot wan bigfala hariken we i spolem plante ples, se hemia “han blong God.” Long Yunaeted Stet, sam lida blong skul oli talem se ol disasta olsem hariken Katrina oli kamaot from we “God i kros” long “ol taon ya we oli fulap long sin.” Long Sri Lanka, ol Budis we oli yusum ol tul blong faet, oli talem se taetel wef ya i fol blong ol Kristin. Samting ya i mekem se ol skul ya oli kam badfren moa. Wan haeman long haos prea blong ol Hindu i ting se god ya Shiva i kros from we ol man oli no stap folem ol gudfala fasin long laef blong olgeta. Wan lida blong Budis long Yunaeted Stet i tokbaot ol disasta, i se: “Yumi no save from wanem ol samting ya i hapen. Yumi no save tu from wanem yumi stap long wol ya.”

?Wanem tingting blong yu taem yu luk ol pija blong ol haos we oli brobrok, ol dedbodi, ol man we tingting blong olgeta i foldaon? Ating yu askem kwestin ya: ‘?From wanem God i letem ol trabol ya i kam blong mekem ol man oli safa olsem?’ No ating yu talem se: ‘God i mas gat wan risen blong letem ol samting ya i hapen, be hem i no talemaot risen ya long yumi.’ Nekis haf blong magasin ya i tokbaot ol tingting ya. Mo tu, magasin ya i tokbaot sam samting we ol man oli save mekem sipos wan disasta i stap kam no i kam finis. Sipos oli folem advaes ya, maet bambae oli no ded no oli no kasem kil we i bigwan tumas.