?From Wanem Yumi Save Trastem Baebol?

2. Tok Stret Mo Tru

Taem man i tok tru, ol narafala oli trastem hem. Yes, bambae yu trastem wan man we i tok tru. Be sipos man ya i giaman long yu, nating se wan taem nomo, be maet yu no moa trastem hem.

OL MAN we oli raetem Baebol oli man blong tok tru, mo oli talemaot stret wanem i stap long hat blong olgeta. Samting ya i mekem se yumi trastem ol tok blong olgeta.

Ol mastik mo slak fasin. Ol man we oli raetem Baebol oli talemaot klia ol mastik mo slak fasin blong olgeta. Moses i tokbaot wan mastik blong hem we i mekem se hem i lusum wan bigfala janis. (Namba 20:7-13) Asaf i tokbaot wan rong tingting we hem i gat blong smoltaem. Hem i stap jalus long ol rabis man we oli gat plante samting. (Ol Sam 73:1-14) Jona i talem se hem i no bin obei long wan oda we God i givim long hem, mo i tokbaot nogud tingting we hem i gat taem God i sore long ol man we oli tanem tingting blong olgeta from sin blong olgeta. (Jona 1:1-3; 3:10; 4:1-3) Matiu i no fraet blong talemaot klia se hem i bin lego Jisas long naet we ol enemi oli holem hem.—Matiu 26:56.

Ol man we oli raetem Hibru haf blong Baebol, oli talem klia se ol manples blong olgeta oli komplen oltaem mo mekem stronghed. (2 Kronikel 36:15, 16) Ol man we oli raetem Baebol oli no haedem wan samting, oli tokbaot ol mastik blong ol rula blong olgeta tu. (Esikel 34:1-10) Long sem fasin, ol leta we ol aposol oli raetem, oli talem stret ol bigfala problem we ol wanwan Kristin oli fesem, wetem ol problem blong ol man we oli lukaot long kongregesen, mo ol problem we sam kongregesen long faswan handred yia oli kasem.—1 Korin 1:10-13; 2 Timoti 2:16-18; 4:10.

Ol trutok we oli save mekem samfala oli sem. Ol man we oli raetem Baebol oli no traem kavremap sam trutok we maet oli save mekem sam man oli sem. Olsem nao, ol Kristin long faswan handred yia oli talem stret se ol man blong wol oli no laekem olgeta, mo se oli luk olgeta olsem ol krangke man mo ol man nating nomo. (1 Korin 1:26-29) Long wan haf blong Baebol, oli raetem se ol man oli tingbaot ol aposol blong Jisas olsem ol man we ‘oli no gat nem mo oli no skulgud.’—Ol Wok 4:13.

Ol man we oli raetem ol Gospel, oli no jenisim sam save blong mekem i luk olsem we Jisas i kamaot long wan rij famle mo ol man oli tinghae long hem, nogat. Oli talem stret se hem i bon long ples we i no flas, famle blong hem i no gat mane, hem i no stadi long ol haeskul, mo bighaf blong ol man oli no wantem bilif long hem.—Matiu 27:25; Luk 2:4-7; Jon 7:15.

I klia we Baebol i givim naf save blong soemaot se ol man we oli raetem buk ya oli tok tru. ?Olsem wanem? ?Samting ya i mekem se yu yu trastem Baebol?

[Tok blong pija long pej 6]

Ol man blong raetem Baebol, olsem Jona, oli talemaot ol mastik blong olgeta