Baebol Wan Buk We i Defren Long Ol Narafala Buk

Oli talem se oli salem moa Baebol i bitim ol narafala buk long wol. Mo oli talem i tru nomo. Ol man oli ridim mo laekem Baebol moa i bitim olgeta narafala buk. Long ol yia we oli pas finis, oli bin salem samwe long fo bilyan Baebol (fulwan Baebol no haf nomo) long bitim 2,000 lanwis.

Be, samting we i pulum intres blong ol man moa, i bitim namba blong ol Baebol we oli salem, hemia se Baebol hem wan i talem se hem i kamaot long God. Kristin aposol Pol i raetem se: “Olgeta tok ya blong Baebol oli kamaot long God fastaem.” (2 Timote 3:​16) ?Samting ya i minim wanem? Tok ya “kamaot long God” (Grik, the·oʹpneu·stos) i rili minim se “God i pulum win.” Wan tok we i kolosap sem mak, hemia pneuʹma, we i minim “speret.” Taswe, vas ya i minim se tabu speret blong God i pusum ol man blong raetem Baebol. I olsem we, God i pusum win i go long olgeta. Ale, samting we i kamaot from, yumi save talem se hem i rili Tok blong God, i no tok blong man. Yes, plante man we oli bin stadi long Baebol, oli sapraes we olgeta haf blong hem oli laenapgud, hem i stretgud long saed blong sayens, mo se ol man we oli raetem buk ya, oli tok tru oltaem, oli no traem haedem wan samting. Impoten moa, olgeta profet tok blong buk ya oli kamtru. Olgeta samting ya oli mekem se plante milyan man we oli ridim buk ya mo oli tingtinggud long hem, oli bilif se buk ya i kamaot long wan man we i hae moa i bitim ol man long wol ya.a

Be, ?olsem wanem God i lidim wok ya blong raetem Baebol? Sam man oli talem se hem i talemaot olgeta wanwan tok we ol man oli raetemdaon long Baebol. Sam narafala oli talem se hem i givim ol tingting blong Baebol long ol man, i no olgeta tok wanwan. Be, blong givim stret ansa long kwestin ya, yumi no save talem se God i yusum wan rod nomo blong givim ol tok blong Baebol long ol man. God i “yusum ol profet blong toktok long ol olfala blong yumi plante taem, long plante narnarafala fasin.” (Hibrus 1:1; skelem wetem 1 Korin 12:6.) Long haf we i kam biaen, bambae yumi lukluk sam rod we God i yusum blong toktok long samwe 40 man we oli bin raetem Baebol.

[Futnot]