Haf 4
God i Talem Ol Plan Blong Hem Long Yumi
1, 2. ?Olsem wanem yumi save se God i givim ol ansa long ol kwestin we ol gudfala man oli askem?
WAN God we i fulap long lav i soemaot tru ol plan blong hem long ol gudfala man we oli stap lukaotem hem. Hem i stap givim ansa long olgeta man we oli putum ol kwestin, olsem hemia se from wanem hem i letem trabol i stap yet.
2 Baebol i talem se: “Sipos yu lukaotem hem [God], bambae hem i letem yu yu faenem hem.” “I gat wan God i stap long heven, we i Man blong soemaot ol samting we i haed.” “Taem Hae Masta Jeova i gat plan blong mekem wan samting, hem i soemaot samting haed ya fastaem long ol man blong hem.”—1 Kronikel 28:9; Daniel 2:28; Emos 3:7.
?Weples Yumi Save Faenem Ol Ansa?
3. ?Weples yumi save faenemaot from wanem God i letem trabol i stap?
3 Ol ansa blong ol kwestin olsemia se from wanem God i letem fasin nogud i stap yet mo bambae hem i mekem wanem blong stretem samting ya, oli stap insaed long wan buk we God i givim blong givhan long yumi. Buk ya i Tok blong hem, Baebol. “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long ol stret fasin. Ol tok ya, God i givim blong bambae ol man blong hem oli save kam waes long olgeta samting, bambae oli gat evri samting blong mekem ol gudfala wok we i stap.”—2 Timote 3:16, 17.
4, 5. ?Wanem ol samting ya we oli soemaot we Baebol i defren long ol narafala buk?
4 I tru we i no gat wan buk olsem Baebol. Ol store blong hem long saed blong histri blong man oli stret moa bitim ol narafala buk. Hem i tokbaot taem bifo we God i wokem man. Hem i tokbaot ol samting blong naoia tu, from we ol profet tok blong hem oli stret long taem blong yumi mo long fyuja tu i no longtaem.
5 I no gat wan narafala buk we i talem tru histri olsem Baebol. Eksampel, i gat smol haf nomo i stap blong ol hanraet blong ol man bifo Kristin taem. Be yumi gat plante olfala hanraet blong Baebol, samfala i haf, ol narafala i fulwan: i gat kolosap 6,000 olfala hanraet blong Hibru haf blong Baebol (ol 39 buk blong “Oltesteman”) mo kolosap 13,000 olfala hanraet blong Grik haf blong Baebol (ol 27 buk blong “Nyutesteman”).
6. ?From wanem yumi save sua se Baebol long taem blong yumi i sem mak nomo olsem faswan we God i givim?
6 God ya we i gat olgeta paoa, we i givim Baebol, hem i lukaotgud blong olgeta tok blong hem i stapgud long ol hanraet ya. Taswe ol Baebol blong yumi naoia oli stret nomo long olgeta we oli raetem fastaem. Wan narafala samting we i givhan long yumi blong luksave samting ya, hemia we sam kopi blong olfala hanraet blong Grik haf blong Baebol oli bin raetem wan handred yia afta we oli raetemdaon Baebol fastaem. Defren nao, sam olfala kopi blong sam narafala buk we oli no long saed blong Baebol, oli raetem olgeta plante handred yia afta faswan hanraet blong olgeta.
Wan Presen Blong God
7. ?Hamas kopi blong Baebol oli prentem?
7 Baebol i wan buk we i go long plante ples long wol, i bitim ol narafala buk. Oli prentem samwe long tri bilyan kopi. I no gat narafala buk we oli prentem plante blong hem olsem. Mo Baebol oli transletem fulwan no haf blong hem long kolosap 2,000 lanwis. Taswe, samting olsem 98% blong ol man blong wol oli save ridim Baebol.
8-10. ?Wanem sam risen we i pulum yumi blong ridim Baebol?
8 Wan buk we oli talem se hem i kam long God mo i gat plante pruf insaed mo afsaed long hem blong soem se hem i tru, i stret we yumi ridimgud hem.a Baebol i talemaot mining blong laef, mining blong ol trabol long wol mo fyuja blong yumi tu. I no gat wan narafala buk we i talem ol samting ya.
9 Yes, Baebol hem i tok we God i givim i go long famle blong man. Hem i lidim wok blong raetem Baebol long paoa blong hem, no tabu speret. Samwe 40 man oli raetem. Taswe God i toktok long yumi tru long Tok blong hem, Baebol. Aposol Pol i talem se: “Taem mifala i tekem tok ya blong God i kam long yufala, yufala i kasem, i no olsem we tok ya i tok blong man nomo. Yufala i kasemgud, olsem we i tok blong God stret.”—1 Tesalonaeka 2:13.
10 Abraham Lincoln, namba 16 presiden blong Amerika, i tokbaot Baebol olsem “presen we i gudfala moa, i bitim ol narafala presen we God i givim long man. Sipos i no gat Baebol, yumi no save wanem i stret mo wanem i no stret.” Oraet nao, ?nambawan presen ya i talem wanem blong eksplenem olsem wanem trabol i kamaot fastaem, from wanem God i letem hem i stap yet, mo olsem wanem bambae hem i finisim ol trabol?
[Futnot]
a Bambae yufala i kasem moa save long ol pruf blong soemaot se Baebol i tru long buk ya The Bible—God’s Word or Man’s?, we Watchtower Bible and Tract Society of New York, Inc. i prentem long 1989.
[Tok blong pija long pej 10]
Baebol, we i kamaot long God, hem i toktok we God i givim long famle blong man