Ol Trufala Tijing We Oli Mekem God i Glad

BLONG ol man long wol oli save faenemaot wanem nao ol trufala tijing we God i glad long olgeta, fastaem God i mas talemaot ol tingting blong hem long olgeta. God i mas mekem se olgeta man oli save ol tingting blong hem. ?Olsem wanem ol man oli save kasem save ol tijing, fasin blong wosip mo ol fasin blong laef we God i agri long olgeta? ?God i givim save long saed ya long yumi? ?Sipos yes, be Hem i givim save ya long yumi olsem wanem?

?Yu ting se man we laef blong hem i sot nomo, i save toktok wetem evri man long wol mo mekem wok olsem man we God i yusum blong toktok long ol man? Nogat. Wan buk we ol toktok blong hem oli stap olwe, yes, i save mekem olsem. Taswe God i mas yusum wan buk nomo olsem rod blong talemaot tingting blong hem long olgeta man. Long ol olfala buk bifo, i gat wan we i kamaot long God. Buk ya hemia Baebol. Wan long ol man we oli raetem Baebol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.” (2 Timoti 3:16) Bambae yumi lukluk moa insaed long Baebol blong faenemaot sipos i tru se Baebol nao hem i stamba blong ol trufala tijing.

?Baebol i Olfala Olsem Wanem?

Long olgeta buk we oli tokbaot skul, Baebol nao i moa olfala. Oli raetem ol faswan haf blong Baebol samwe 3,500 yia bifo finis. Oli finisim blong raetem fulwan Baebol long yia 98 K.T.a I gat 40 man we oli raetem Baebol mo oli tekem 1,600 yia blong mekem wok ya. Nating se i olsem, ful Baebol i joengud. Hemia from we God i stamba blong Baebol.

Baebol i buk we oli seremaot moa i winim ol narafala buk long wol mo we oli transletem moa i bitim ol narafala buk. Evri yia, oli givimaot samwe long 60 milian kopi blong ful Baebol no sam haf blong hem nomo. Oli tanem fulwan Baebol no haf blong hem i go long 2,300 lanwis. Bitim 90 pesen blong olgeta man long wol oli gat fulwan Baebol no haf blong hem long prapa lanwis blong olgeta. Baebol i defren long ol narafala buk, from we hem i kasem ol man, nating se oli blong wanem kantri, kala, no laen.

?Olsem Wanem Baebol i Gat Oda Long Hem?

Traem openem Baebol blong yu mo luk olsem wanem hem i stap long oda.b Fastaem, openem Baebol blong yu long lis blong ol buk blong Baebol. Long faswan pej blong plante Baebol i gat wan lis blong nem blong ol buk blong Baebol mo ol pej we man i save faenem ol buk ya long hem. Bambae yu faenem se i gat fulap buk we oli mekemap Baebol mo ol buk ya oli gat prapa nem blong olgeta. Faswan buk blong Baebol hem i Jenesis mo laswan hem i Revelesen no Apokalips. Baebol i seraot long tu haf. Faswan haf hemia Hibru haf we i gat 39 buk long hem. Haf ya oli raetem fastaem long Hibru lanwis. Seken haf hemia Grik haf we i gat 27 buk long hem. Haf ya oli raetem fastaem long Grik lanwis. Samfala man oli kolem tufala haf ya se Oltesteman mo Niutesteman.

Ol buk blong Baebol oli gat ol japta mo ol vas we i save givhan long yu blong faenem ol toktok insaed long Baebol. Long ol Wajtaoa olsem hemia we yu ridim, bambae yu luk se taem oli raetem ol vas, oli raetem nem blong buk blong Baebol fastaem, nao biaen oli raetem wan namba. Faswan namba ya i blong soemaot japta blong buk mo nekiswan namba i blong soemaot vas. Eksampol, “2 Timoti 3:16” i minim buk blong Seken Timoti, japta 3, mo vas 16. Traem luk sipos yu save faenem vas ya long Baebol.

Ating bambae yu yu agri se sipos yumi wantem savegud Baebol, yumi mas ridim Baebol oltaem. Samfala oli faenem se i moa isi blong ridim Grik haf blong Baebol fastaem, hemia haf blong Baebol we i stat wetem buk blong Matiu. Sipos yu ridim tri kasem faef japta long wan dei, ale, long wan yia nomo yu save ridim fulwan Baebol. ?Be olsem wanem yu save sua se wanem we yu stap ridim insaed long Baebol i kamaot long God?

?Yumi Save Trastem Baebol?

Sipos wan buk i kamaot long God, i sua we ol advaes blong buk ya oli stretgud mo oli mas givhan long evri man nomata se oli laef bifo no tede. Ol save we oli stap insaed long Baebol oli soemaot ol prapa fasin blong man nomata se oli laef bifo no tede. Mo ol rul we oli stap long Baebol oli stretgud blong givhan long laef blong ol man tede sem mak olsem we oli bin givhan long ol man longtaem bifo. Yumi luksave klia samting ya long bigfala toktok blong Jisas ya, we hem i stanemap Kristin skul. Yumi save ridim ol tok ya blong hem long Matiu japta 5 kasem japta 7. Long Bigfala Toktok blong hem antap long Hil, Jisas i no soemaot nomo olsem wanem blong faenem trufala glad be hem i soemaot long yumi olsem wanem blong stretem ol rao, olsem wanem blong prea, olsem wanem yumi mas tingbaot ol samting long saed blong bodi mo plante nara samting bakegen. Long toktok ya blong Jisas mo long ol narafala japta blong Baebol, Baebol i talem klia long yumi wanem we yumi save mekem mo wanem we yumi no mas mekem blong God i glad long yumi mo blong blokem ol trabol we oli save spolem yumi.

Wan narafala risen from wanem yu mas trastem Baebol hemia se taem Baebol i talem wan samting long saed blong saens, be save blong hem i tru nomo. Eksampol, long taem bifo, bighaf blong ol man oli bilif se wol i flat, be long semtaem ya, Baebol i tokbaot “raon wol ya.”c (Aesea 40:​22, NW ) Mo bitim 3,000 yia bifo, Baebol i talem se “wol ya i hang long open ples nomo.” Biaen nomo Sir Isaac Newton i eksplenem se ol planet oli stap hang long emti ples nomo from paoa ya graviti.d (Job 26:7) Tingbaot rod ya we wota i stap folem oltaem long wol, we Baebol i tokbaot samwe 3,000 yia finis : “Oltaem ol reva oli stap ron i godaon long solwota, be solwota i stap sem mak nomo, i no kam fulap we i bitim mak. Oltaem nomo, wota i stap gobak long ples we i kamaot long hem fastaem, nao i folem rod blong hem, i stap ron i godaon bakegen.” (Prija 1:7) Yes, Jeova God we i wokem heven mo wol, Hem i stamba blong Baebol tu.

Ol stori blong Baebol oli soemaot klia se Baebol i kamaot long God. Ol samting we Baebol i tokbaot se oli hapen bifo, oli no ol kastom stori. Ol stori ya oli talem stret nem blong ol man mo stret taem, olsem yia no dei, we ol stori ya oli hapen. Eksampol, Luk 3:1 i tokbaot ‘feftin yia blong rul blong Taebirias Sisa, long taem ya we Ponjes Paelet i rul long Juda mo Herod i rul long Galili.’

Ol man we oli stap raetem ol buk long taem bifo, klosap oltaem oli tokbaot nomo ol gudfala fasin blong ol lida blong olgeta. Be ol man blong raetem Baebol oli no mekem olsem. Olgeta ya oli talem stret ol gudfala fasin blong wan man mo ol slak fasin blong hem tu. Mo tu, oli talemaot prapa mastik blong olgeta wan. Tingbaot eksampol blong King Deved we i se: “Fasin ya we mi mi mekem i krangke ya. Mi mekem wan sin we i nogud tumas.” Hemia wan tok we oli raetem i klia nomo, mo we Baebol i no haedem. (2 Samuel 24:10) Wan long olgeta we oli raetem Baebol hemia Moses. Moses i talemaot slak fasin blong hem wan we i soemaot se hem i no trastem trufala God.​—Namba 20:12

Baebol i gat wan pruf yet blong soemaot se hem i kamaot long God. Pruf ya hemia ol profet tok blong Baebol we oli stap kamtru. Profet tok hem i samting we oli raetem longtaem bifo we hem i kamtru. Sam long ol profet tok ya i tokbaot Jisas Kraes. Eksampol, bitim 700 yia bifo we Jisas i bon, Hibru haf blong Baebol i talem klia finis se Jisas bambae i bon ‘long Judia, long taon ya Betlehem.’​—Matiu 2:​1-6; Maeka 5:2.

Tingbaot wan narafala eksampol. Long 2 Timoti 3:​1-5, Baebol i talem se long taem blong ol las dei “laef long wol ya bambae i kam strong tumas. Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkiu, mo oli no save tingbaot God. Bambae oli no man blong gat sore long man, mo oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud, oli agens long hem. Bambae oli man blong spolem ol fren blong olgeta, mo oli man we oli no kea, Mo oli praod tumas. Bambae oli man we oli wantem tumas ol samting we oli stap harem gud long hem, i winim we oli stap lavem God. Long fes blong ol man, bambae olgeta oli stap folem fasin blong Kristin man, be oli no wantem paoa blong God nating long laef blong olgeta.” Vas ya i talemaot klia fasin blong bighaf blong ol man tede. !Oli raetem ol tok ya long yia 65 K.T., hemia bitim 1,900 yia bifo finis!

?Baebol i Tijim Wanem Long Yumi?

Taem yu ridim Baebol, bambae yu luk se Baebol i fulap long waes. Hem i givim ol trufala ansa long ol kwestin olsem: ?God hem i hu? ?Setan i rili stap? ?Hu ya Jisas Kraes? ?From wanem i gat trabol long wol? ?Wanem i hapen long yumi taem yumi ded? Ansa we ol man oli givim long ol kwestin ya oli defdefren evriwan, sem mak olsem we bilif mo kastom blong olgeta evriwan i defdefren. Be, Baebol i talemaot trutok long ol kwestin ya mo plante moa narafala kwestin. Antap long samting ya, Baebol i givim beswan advaes long ol man long saed blong fasin we man i mas gat no soem long ol narafala man mo long olgeta tu we oli hae moa long hem.e

?Baebol i soemaot se God bambae i mekem wanem long wol ya mo long ol man? Hem i promes se: “Bambae i no longtaem, ol man nogud oli lus . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:​10, 11) “God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:​3, 4) “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”​—Ol Sam 37:29.

Baebol i talemaot tu se faet, fasin blong brekem loa, raf fasin mo ol rabis fasin bambae i no longtaem oli finis. Sik, fasin blong kam olfala, mo ded bambae oli finis. Bambae ol man oli laef olwe long wol ya we bambae i kam wan paradaes. !Hemia i rili wan nambawan blesing mo ol samting ya oli rili soemaot lav we God i gat long ol man!

?Bambae Yu Yu Mekem Wanem?

Baebol i wan nambawan presen we God i givim. ?Yu mas gat wanem tingting long saed blong Baebol? Wan man Hindu i tingting se sipos i rili gat wan buk we ol tok blong hem i kamaot long God mo we i save givhan long man, buk ya i mas olfala sem mak olsem namba blong yia we man i laef long wol. Taem man ya i luksave se sam haf blong Baebol oli olfala moa i bitim ol olfala buk blong ol man Hindu​—hemia buk ya we oli kolem ol Veda​—hem i tekem desisen blong ridim Baebol mo luklukgud ol vas we oli stap insaed long Baebol.f Wan tija blong yunivesiti long Yunaeted Stet, hem tu i luksave se hem i mas ridim Baebol, bifo we hem i talemaot tingting blong hem long saed blong buk ya we oli seremaot moa i bitim eni narafala buk long wol.

Taem yu ridim Baebol mo mekem wanem we Baebol i talem i wok long laef blong yu, bambae yu save kasem plante blesing. Baebol i talem se ol man we oli hapi hemia olgeta we “oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet. Olgeta ya oli olsem ol tri we oli gru long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.”g (Ol Sam 1:​1-3) Taem yu stadi long Baebol mo yu tingting dip long wanem we Baebol i talem, samting ya i save mekem yu yu hapi from we yu kasem samting we yu nidim long saed blong spirit. (Matiu 5:3) Baebol bambae i soem long yu olsem wanem yu save karem gudfala frut long laef blong yu mo olsem wanem blong dil wetem ol problem. Yes, “God i stap givim pei long yumi, from we yumi stap obei long [ol loa blong Hem we oli stap long Baebol].” (Ol Sam 19:​11, NW ) Antap long samting ya, taem yumi trastem ol promes blong God, yumi save kasem blesing naoia mo samting ya i mekem se yumi gat wan klia tingting long saed blong fiuja.

Baebol i talem long yumi se: “Yufala i mas kam we yufala i wantem tumas tok blong God we i klin gud, olsem pikinini we i jes bon i wantem titi tumas.” (1 Pita 2:2) Wan pikinini i nidim melek blong mama blong hem mo hem i no wantem mestem samting ya. Sem mak, yumi nidim save blong God. Taswe yumi ‘mas kam we yumi wantem tumas’ Tok blong God. Baebol i wan buk we i tijim ol trufala tijing blong God. Yumi mas putum wan mak blong stadi Baebol oltaem. Ol Witnes blong Jeova long ples blong yu bambae oli glad tumas blong givhan long yu blong kasem moa save long stadi blong yu. Plis yu no fraet blong askem samting ya long olgeta, no yu save raet i go long ples we oli wokem magasin ya.

[Ol Futnot]

[Tok blong pija long pej 7]

Yufala i “mas kam we yufala i wantem tumas” Tok blong God. Stadi Baebol oltaem

[Foto Credit Line blong pija long pej 5]

NASA photo