Baebol i Talem Wanem

?Baebol i Kamaot Long Hu?

BAEBOL i talemaot klia nem blong ol man we oli raetem ol haf blong hem. Sam buk oli stat wetem ol tok olsem: “Buk ya i stori blong Nehemaea,” ‘Long buk ya, i gat ol tok we Hae God i givim long Profet Aesea,’ “Ol tok blong buk ya, Hae God i givim long Profet Joel.” (Nehemaea 1:1; Aesea 1:1; Joel 1:1) Sam stori blong histri, Baebol i talem se trifala man ya Gad, Natan, mo Samuel oli raetemdaon. (1 Kronikel 29:29) Long stat blong plante Sam, i gat smol toktok i stap blong talemaot hu i bin wokem ol Sam ya.—Ol Sam 79, 88, 89, 90, 103, mo 127.

From we ol man nomo oli raetemdaon ol tok blong Baebol, plante man we oli no bilif long Baebol oli talem se Baebol i kamaot long man nomo, olsem ol narafala buk. ?Be tingting ya i stret?

Foti Man Oli Raetem Baebol, Be i Rili Kamaot Long Wan Man Nomo

Bighaf blong ol man we oli raetem Baebol oli talem se Jeova, we hem nomo i trufala God, i givim tok long olgeta, i lidim tingting blong olgeta, no i yusum wan enjel blong givim tok long olgeta. (Sekaraea 1:7, 9) Ol profet we oli raetem Hibru haf blong Baebol, oli talem bitim 300 taem se: “Hae God i talem se.” (Amos 1:3; Maeka 2:3; Neham 1:12) Plante man we oli raetem Baebol oli statem buk blong olgeta wetem tok olsem: “Ol tok blong buk ya, Hae God i stap givim long Profet Hosea.” (Hosea 1:1; Jona 1:1) Long saed blong ol profet we God i yusum, aposol Pita i talem se: ‘Tabu spirit i givim tok long olgeta, nao oli talemaot tok we i kamaot long God.’—2 Pita 1:21.

Taswe, Baebol i wan buk we i gat plante defdefren haf blong hem, be olgeta haf ya oli laenap gud. Mo nating se plante man oli raetem Baebol be olgeta evriwan oli talem se God nao i givim tok long olgeta. I olsem we God i yusum ol sekretari blong raetemdaon ol tingting blong hem. ?Hem i mekem samting ya olsem wanem?

“Kamaot Long God”

Aposol Pol i talem se: “Olgeta tok blong Baebol oli kamaot long God fastaem.” (2 Timoti 3:16) Grik tok ya we long Baebol Long Bislama oli tanem se “kamaot long God,” i rili minim se “God i blu win i go.” Hemia i min se, God i yusum wan paoa we man i no save luk, blong lidim tingting blong ol man we oli raetem Baebol, nao oli raetem ol tingting blong hem nomo. Be long saed blong Tenkomanmen, Jeova hem wan i raetem olgeta long tufala ston. (Eksodas 31:18) Samtaem God i toktok blong talem stret long ol man wanem we oli mas raetemdaon. Eksodas 34:27 i talem se: “Hae God i talem long Moses se, ‘. . . yu mas raetemdaon ol tok ya . . . ’”

Sam man, God i mekem se oli luk wan vison, nao oli raetemdaon samting we oli luk. Taswe, Esikel i talem se: “Mi Esikel, . . . mi luk wan vison . . . we Hae God i soemaot long mi.” (Esikel 1:1) Daniel tu, hem “i luk wan vison. Nao biaen, hem i raetemdaon ol samting we God i soemaot long hem long vison ya.” (Daniel 7:1) Sem mak long laswan buk blong Baebol, Revelesen, we aposol Jon i raetem. Jon i talem se: “[“Tabu spirit i kam long mi, nao i olsem we mi stap finis long dei blong Masta blong yumi,” NW]. Nao mi harem wan man i stap singaot biaen long mi, we voes blong hem i bigwan, i olsem wan pupu. Hem i talem se, ‘Olgeta samting ya we yu yu luk, yu mas raetemdaon long wan buk.’”—Revelesen 1:10, 11.

Oli Raetem Long Prapa Toktok Blong Olgeta

Taem God i givim toktok long ol man, hemia i no blokem olgeta blong oli no save raetemdaon long prapa toktok blong olgeta. Wanwan man we oli raetemdaon tok blong God oli mas traehad bigwan. Tingbaot man we i raetem buk blong Prija long Baebol, hem i talem se hem “i stap traehad blong faenem ol toktok blong givhan, mo ol tok we hem i raetem long buk ya oli stret gud nomo.” (Prija 12:10) Taem Esra i raetemdaon ol stori blong histri, hem i faenem save ya long 14 ples, olsem “long buk blong ol ripot blong king [Deved],” mo “long buk ya we nem blong hem Ol Stori blong ol King blong Juda mo blong ol King blong Isrel.” (1 Kronikel 27:24; 2 Kronikel 16:11) Taem Luk i raetem Gospel blong hem, hem i ‘stap luklukgud longtaem finis long olgeta samting ya, i stat long stat blong hem, hem i ting se i gud hem i raetem stori blong hem we evri tok blong hem oli stret.’—Luk 1:3.

Sam buk blong Baebol oli soemaot sam samting long saed blong fasin blong man we i raetem. Olsem nao, Matiu Livae, we hem i man blong tekem mane blong takis bifo we hem i kam wan disaepol blong Jisas, hem i neva mestem blong raetemdaon ol namba long buk blong hem. Long olgeta Gospel, Matiu nomo i raetemdaon stret praes we ol enemi blong Jisas oli pem long Judas blong i putum Jisas long han blong olgeta, hemia “toti sekel silva.” (Matiu 27:3; Mak 2:14) Luk we i wan dokta, i raetemdaon stret save long saed blong ol sik. Olsem nao, taem hem i tokbaot ol man we Jisas i tekemaot sik blong olgeta, hem i yusum ol tok olsem, “i fiva we i strong tumas,” mo “bodi blong hem i fulap long leprosi.” (Luk 4:38; 5:12, Nyutestamen Long Bislama; Kolosi 4:14) Plante taem Jeova i letem ol man oli yusum prapa fasin mo toktok blong olgeta blong eksplenem wan samting. Be hem i lidim tingting blong olgeta, blong mekem se ol tok we oli raetem oli stret mo oli givim stret tingting we hem i wantem.—Ol Proveb 16:9.

Frut Blong Ol Hadwok Blong Olgeta

?Yu yu sapraes se 40 man we oli stap long plante defren kantri mo oli tekem 1,600 yia blong finisim Baebol, oli wokem wan buk we olgeta tok blong hem oli laenap gud, mo we i gat semfala nambawan stamba tok i gotru long evri haf blong hem? (Ridim “?Baebol i Tokbaot Wanem?” long pej 19.) Samting ya i save kamaot nomo sipos ol tok we oli raetemdaon oli kamaot long semfala Man.

?Olsem wanem? ?Jeova i nidim blong yusum ol man blong raetemdaon ol Tok blong hem? Nogat. Be fasin blong hem blong yusum ol man i soemaot bigfala waes blong hem. Wan risen from wanem plante man long olgeta ples blong wol oli laekem Baebol, hemia from we ol man we oli raetem oli soemaot ol filing mo fasin blong yumi ol man. Stori blong King Deved i soemaot filing blong sem we man i gat taem hem i tanem tingting blong hem from wan bigfala sin, nao i plis long God blong i sore long hem.—Ol Sam 51:2, 4, 13, 17, smol tok long stat blong Sam ya.

Nating se Jeova i yusum ol man nomo blong raetem Baebol, yumi save trastem wok blong olgeta olsem ol faswan Kristin oli bin mekem. Ol faswan Kristin ‘oli no tekem Baebol olsem we i tok blong man nomo, oli tekem olsem we i tok blong God stret.’—1 Tesalonaeka 2:13.

?YU YU BIN TINGBAOT?

◼ ?“Olgeta tok blong Baebol” oli kamaot long Hu?—2 Timoti 3:16.

◼ ?Wanem ol rod we Jeova God i bin yusum blong givim ol tingting blong hem long ol man?—Eksodas 31:18; 34:27; Esikel 1:1; Daniel 7:1.

◼ ?Olsem wanem ol tok blong Baebol oli soemaot prapa fasin blong ol man we oli raetem mo samting we oli intres long hem?—Matiu 27:3; Luk 4:38.