?Trutok No Giaman Tingting?

Timoti, wan Kristin elda long kongregesen long taem bifo, i halpem olgeta we oli intres blong mekem wosip long trufala God, blong oli no lesin long ol “narakaen bilif,” mo long “ol giaman tingting.” (1 Timoti 1:3, 4, Byington) ?Olsem wanem? ?Woning ya i stret long taem blong yumi tede? Yes, from we ol giaman tingting long saed blong Baebol mo ol tijing blong hem, oli save pulum ol man oli gowe long trufala wosip.Yumi save faenem sam long ol giaman tingting ya we plante man oli holem long saed blong Baebol, long ol haf we oli kam biaen. I gud yumi lukluk stret long wanem we Baebol i talem long saed ya. Ol tok blong Baebol oli save halpem yumi blong karemaot ol giaman tingting ya we oli save spolem trutok.

◼ Giaman Tingting: Ol merikel we Baebol i tokbaot, oli no save hapen.

Trutok: I gat plante moa samting we ol man oli mas lanem long saed blong ol samting we God i wokem. I no gat wan saentis nating we i save eksplenem fulwan long saed blong graviti, mo eksplenem olgeta samting wanwan we oli mekemap wan atom, mo eksplenem wei we yumi makem taem. “?Olsem wanem? ?Yu yu naf blong faenemaot ol dip samting long saed blong God we oli haed? ?Yu yu naf blong faenemaot mak we God ya we i gat olgeta paoa, i save kasem?” (Job 11:7, NW) From we yumi no naf nating blong kasem save long olgeta samting we God i wokem, naoia ol saentis we oli gat bigfala save, oli stap lukaot gud moa, blong no talemaot se wan samting olsem merikel i no save hapen.

◼ Giaman Tingting: Olgeta skul oli lidim yumi i go long God.

Trutok: Jisas i talem se: “Sipos yufala i obei long ol tok ya blong mi, yufala i prapa man blong mi. Nao bambae yufala i save trutok, mo trutok ya bambae i mekem yufala i fri man.” (Jon 8:31, 32) ?Sipos i tru se olgeta skul oli lidim yumi i go long God, yu ting se bambae i gat nid blong halpem ol memba blong ol skul ya blong oli kam fri man? I tru, Jisas i talemaot se, smol man nomo oli stap folem ‘rod we i go kasem laef.’—Matiu 7:13, 14.

◼ Giaman Tingting: Taem ol gudfala man oli ded, oli go long heven.

Trutok: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting. Ol stret man ya bambae oli tekem graon ya i blong olgeta, mo bambae oli stap long hem gogo i no save finis. Yu mas putum tingting blong yu i stap strong long Hae God, mo yu mas obei long ol tok blong hem, nao bambae hem i ona long yu, i givim graon ya long yu. Bambae yu luk we hem i ronemaot ol man nogud.” (Ol Sam 37:11, 29, 34) Long ol man we oli stap tru long God, i gat 144,000 nomo we oli go long heven. God i givim wok long olgeta ya, blong oli “king, oli rul long olgeta man long wol.”—Revelesen 5:9, 10; 14:1, 4.

◼ Giaman Tingting: “Oltesteman” i no moa impoten long ol Kristin.

Trutok: “Olgeta tok blong Baebol oli kamaot long God fastaem. . . . Ol tok ya i stret gud blong tijim yumi long ol trutok.” (2 Timoti 3:16, 17) “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Hibru haf blong Baebol no “Oltesteman,” i stamba blong ol impoten save long saed blong God mo ol plan blong hem, mo i save givim gudfala risen long yumi, blong yumi bilif long Grik haf blong Baebol, no “Niutesteman.”

◼ Giaman Tingting: Klosap olgeta haf blong buk blong Jenesis, wetem ol stori long saed blong Adam mo Iv, oli no tru stori, oli pija tok nomo.

Trutok: Long buk blong Luk, we Luk hem wan i raetem, hem i raetemdaon nem blong ol man long laen we Jisas i kamaot long hem, stat long Adam i kam kasem Jisas. (Luk 3:23-38) ?Sipos i tru se buk blong Jenesis i no wan tru stori, ale, lis blong ol trufala nem long laen ya, bambae i finis long wanem nem? ?Mo lis blong ol giaman nem ya, bambae i stat wetem wanem nem? Jisas i laef long heven bifo we hem i kamdaon long wol, mo hem i bilif long ol tok blong Jenesis, mo long stori blong Adam mo Iv. (Matiu19:4-6) Taswe, sipos yumi stap askem kwestin long saed blong buk blong Jenesis, yumi soemaot we yumi daonem Jisas hem wan, mo plante narafala man we oli bin raetem Baebol bifo.—1 Kronikel 1:1; 1 Korin 15:22; Jud 14.