Namba Tri Giaman Tingting: Olgeta Gudfala Man Oli Go Long Heven
?Giaman tingting ya i kamaot long weples? Afta long yia 100 K.T., taem ol aposol blong Jisas oli ded finis, ol faswan Papa blong Jos oli stat blong kasem haenem. Wan buk (New Catholic Encyclopedia (2003), Buk namba 6, pej 687) i tokbaot tijing blong olgeta i se: “Bigfala tingting we oli givim long ol man, hemia se afta we man i ded mo sol blong hem i pastru long sam samting blong i kam klin, kwiktaem nomo man ya i go antap long heven blong kasem gudfala laef.”
?Baebol i talem wanem? “Olgeta we oli kwaet man oli save harem gud, from we God bambae i givim wol ya long olgeta.”—Matiu 5:5, futnot.
Jisas i mekem promes long ol disaepol blong hem se bambae hem i “mekemrere ples” blong olgeta long heven. Nating se i olsem, hem i no soemaot se olgeta stret man evriwan bambae oli go long heven. (Jon 3:13; 14:2, 3) Mo tu, hem i askem long God long prea, blong “olgeta man long wol oli mekem ol samting we Hem i wantem, olsem we olgeta long heven oli stap mekem.” (Matiu 6:9, 10) Blong talem stret, ol stret man oli save kasem wan long tufala laef ya long fiuja: smol haf blong olgeta bambae oli rul wetem Kraes long heven, be bighaf blong olgeta bambae oli laef blong olwe long wol.—Revelesen 5:10.
Taem ol yia oli stap pas, jos we i jes stat i jenisim tingting blong hem long wok we hem i mas mekem long wol ya. ?Wanem samting i kamaot from? Buk ya, The New Encyclopædia Britannica, i talem se: “Sloslo, jos ya i tekem ples blong Kingdom blong God we ol man oli stap wet long hem.” Jos i mekem se paoa blong hem i kam strong moa taem hem i stat blong joen long politik. Hem i no wantem folem ol tok blong Jisas we oli klia nomo, se ol man blong hem oli no mas joen long “wol ya.” (Jon 15:19; 17:14-16; 18:36) Aninit long rul blong Constantine we i Hedgavman blong Rom, jos ya i jenisim sam long ol bilif blong hem. Wan long ol bilif ya hemia long saed blong God.
Skelem ol vas ya blong Baebol: Ol Sam 37:10, 11, 29; Jon 17:3; 2 Timoti 2:11, 12
SAMTING WE I TRU:
Bighaf blong ol gudfala man bambae oli laef blong olwe long wol, be i no long heven
[Credit Line long pej 6]
Art Resource, NY