?I Gat Wan Man We i Wokem Samting Ya?

Bataflae i Savegud Rod Blong Hem

◼ Bataflae ya we oli kolem monarch, i gat wan bren we i smol olsem en blong pensel we yumi raet wetem. Nating se i olsem, evri yia, taem hem i aot long Kanada, hem i save rod blong hem blong flae 3,000 kilometa, i go kasem wan smol ples long dakbus blong Meksiko. ?Olsem wanem bataflae ya i save rod blong hem?

Tingbaot: Bataflae ya monarch i gat samting olsem wan kampas i stap insaed long hem, mo kampas ya i poen i go oltaem long san. Be i no hemia nomo. Bataflae ya i gat wan samting olsem klok tu long bodi blong hem, we i makemaot ol dei blong 24 aoa, nao taem san i muf i gokros long skae, klok ya i jenis folem san. Dokta Steven Reppert, we hem i stadi long ol nev long bodi blong ol laef samting, i talem se bataflae ya i “gat wan spesel fasin blong kaontem taem, i defren olgeta long ol narafala bebet mo anamol we man i stadi finis long olgeta.”

Sipos ol saentis oli lanem moa long saed blong klok we i haed insaed long bodi blong bataflae ya, maet oli kasem save moa long klok we i haed insaed long bodi blong man mo ol anamol. Mo tu, samting ya i save givhan long ol dokta blong oli faenem ol niufala tritmen blong ol sik blong nev. Dokta Reppert i talem se: “Mi mi wantem save olsem wanem bren i stap kasem save mo i yusum ol save long saed blong taem mo spes. Bataflae ya monarch i wan spesel eksampol blong samting ya.”

?Wanem tingting blong yu? ?Yu ting se spesel fasin ya blong bataflae ya monarch blong savegud rod blong hem, i kamaot olsem nomo? ?No yu ting se samting ya i pruvum se wan Man we i gat bigfala waes i wokem bataflae ya?

[Tok/Map blong pija long pej 17]

(Lukluk niuspepa)

Evri yia, bataflae ya monarch i aot long Kanada, i flae 3,000 kilometa, go kasem wan smol ples long dakbus blong Meksiko

[Map]

KANADA

YUNAETED STET BLONG AMERIKA

MEKSIKO

MEKSIKO SITI

[Foto Credit Line blong pija long pej 17]

Background: © Fritz Poelking/age fotostock