Baebol i Talem Wanem

?Ol Trabol Blong Yu Oli Wan Panis We i Kam Long God?

Wan woman we i gat bitim 50 yia, i talem se: “Mi harem olsem se mi stap kasem panis.” Hem i talem tok ya afta we hem i faenemaot se hem i gat sik ya kansa. Woman ya i stap tingtingbak long wan nogud samting we hem i bin mekem plante yia bifo, nao hem i stap talem se: “Hemia i mas rod we God i yusum blong talem long mi se mi mekem sin.”

TAEM ol man oli kasem trabol, plante oli ting se God i stap panisim olgeta from wan nogud samting we oli bin mekem bifo. Taem oli stap kasem plante trabol olsem, oli talem se: “?From wanem mi nao mi kasem ol trabol ya? ?Mi mi mekem wanem blong pulum ol trabol ya i kam long mi?” ?I stret blong ting se ol trabol we yumi kasem oli soemaot se God i no glad long yumi? ?Ol trabol we man i kasem, oli rili wan panis we i kam long God?

Ol Man Blong God Oli Kasem Trabol

Tingbaot stori blong man ya Job long Baebol. Wantaem nomo, hem i lusum ol mane mo olting blong hem. Biaen, wan bigfala win i kilim ol ten pikinini blong hem i ded. Smoltaem biaen, hem i kasem wan rabis sik. (Job 1:13-19; 2:7, 8) Ol trabol ya oli mekem Job i krae, i talem se: “God nomo i kilim mi, i mekem mi mi foldaon.” (Job 19:21) Plante man tede, oli gat sem filing olsem Job. Job i ting se God i stap panisim hem.

Be Baebol i soemaot se bifo we ol trabol ya oli kasem Job, God hem wan i tokbaot Job se: “Hem i no gat rong long hem mo hem i stret nomo. Hem i fraetgud long God mo hem i tanem baksaed long ol rabis fasin.” (Job 1:8, NW) From we long vas ya, God i soemaot we hem i glad long Job, i klia se ol trabol blong Job oli no olsem wan panis we i kam long God.

Tru ya, Baebol i fulap long ol stori blong ol stret man we oli kasem ol trabol long laef blong olgeta. Josef i stap tru long God mo i no mekem wan samting nogud, be oli putum hem long kalabus blong plante yia. (Jenesis 39:

10-20; 40:15) Timoti, wan kristin we i gat strong bilif, i harem nogud from we hem i “stap sik oltaem.” (1 Timoti 5:23) Jisas kraes tu, we neva i mekem wan samting nogud, oli kilim hem i ded long wan fasin we i nogud olgeta. (1 Pita 2:21-24) From samting ya, i krangke nomo blong ting se ol trabol we yumi kasem oli soemaot se God i no glad long yumi. ?Be sipos i no God we i mekem trabol, hu i mekem?

Stamba Blong Ol Trabol Blong Yumi

Baebol i soemaot se Devel Setan i stamba blong ol trabol we i kasem Job. (Job 1:7-12; 2:3-8) Mo Baebol i talem tu se Setan i stamba man we i stap mekem yumi kasem trabol tede. Hem i se: “Be sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.” (Revelesen 12:12) From we Setan “i stap rulum wol ya,” hem i pulum plante man blong oli mekem ol rabis samting we i karem trabol i kam long olgeta mo i mekem plante man oli harem nogud.—Jon 12:31; Ol Sam 37:12, 14.a

Be yumi no mas kwik blong talem se i fol blong Devel Setan we yumi kasem trabol. From we yumi sinman mo yumi no stretgud olgeta, i isi nomo blong yumi mekem ol desisen we oli no waes we i save mekem trabol long yumi. (Ol Sam 51:5; Rom 5:12) Tingbaot sipos wan man i jusum blong no kakaegud mo no spel inaf, bambae hem i gat wan bigfala problem long helt blong hem. ?Yu ting se i stret blong talem se i fol blong Setan? !Nogat! Man ya i kasem trabol from we hem nomo i jusum blong no kakaegud mo no spel inaf. (Galesia 6:7) Hemia i olsem we Baebol i talem se: “Sam man oli stap spolem laef blong olgeta long ol rabis fasin blong olgeta.”—Ol Proveb 19:3.

Mo yumi mas luksave se ol nogud samting oli kamaot long laef blong yumi from we, “samting we yumi no tingbaot, i save kamaot long yumi enitaem nomo.” (Prija 9:11, NW) Tingbaot wan bigfala ren i wasem wan man wantaem nomo. Maet hem i wetwet smol no maet i wetwet fulwan. Samting ya i dipen long weples man ya i stap long hem taem ren i foldaon. Long sem fasin, naoia “laef i strong tumas mo i had blong winim ol trabol,” ol nogud samting we oli hapen long laef oli save kam wan bigfala trabol wantaem nomo. (2 Timoti 3:1-5, NW) Yumi no save blokem trabol blong i no kasem yumi, mo blong talem se ol trabol we yumi kasem bambae oli mekem yumi harem nogud go kasem wanem mak, from hemia i dipen long wanem taem mo ples we yumi stap long hem. ?Olsem wanem? ?Hemia i min se bambae yumi stap kasem trabol oltaem nomo?

I No Longtaem Ol Trabol Bambae Oli Finis

Yumi glad se i no longtaem, Jeova bambae i finisim ol trabol. (Aesea 25:8; Revelesen 1:3; 21:3, 4) Go kasem taem ya, Jeova i soemaot se hem i rili kea long yumi taem hem i givim ol tok blong Baebol blong “tijim” yumi mo blong “leftemap tingting” blong yumi. Long rod ya, yumi naf blong stanap strong agensem ol traem we yumi stap kasem naoia, mo long semtaem yumi lukluk i go long wan nambawan fiuja we bambae i kamtru i no longtaem. (Rom 15:4; 1 Pita 5:7) Long taem ya, olgeta we oli stret man long fes blong God bambae oli harem gud blong laef olwe long niufala wol we bambae i no moa gat trabol long hem.—Ol Sam 37:29, 37.

[Futnot]

?YU YU BIN TINGBAOT?

◼ ?I tru se ol rabis man nomo oli stap kasem trabol?—Job 1:8.

◼ ?I stret blong talem se i fol blong Devel Setan, taem yumi kasem trabol?—Galesia 6:7.

◼ ?Ol trabol bambae oli gohed blong olwe?—Revelesen 21:3, 4.

[Tok blong makem poen long pej 19]

“Samting we yumi no tingbaot, i save kamaot long yumi enitaem nomo.”—Prija 9:11, NW