Kwestin Blong Olgeta We Oli Ridim Magasin Ya
?Ol Hadtaem Long Laef, Oli Olsem Panis We i Kamaot Long God?
?Wan nogud samting i hapen finis long laef blong yu, we i pulum yu blong askem sipos God i wantem mekem yu yu safa? Ating wan strong sik i kasem yu kwiktaem nomo, no wan aksiden i mekem yu yu handikap, no ded blong wan memba blong famle i mekem yu yu sek. Samting ya i save mekem yu yu harem se God i jusumaot yu long ol narafala man, blong panisim yu.
Yu no mas harem olsemia, be yu mas haremgud blong save se God i wantem we olgeta man oli hapi mo oli no moa kasem trabol. Yumi luksave se God i wantem samting ya, from we taem God i wokem faswan man mo woman, hem i putum tufala long wan naesfala paradaes, hemia “garen blong Iden.” Long ples ya i no gat trabol nating.—Jenesis 2:15, NW.
Sore tumas, faswan man mo woman ya, tufala i jusum blong tanem baksaed long nambawan plan ya blong God, mo tufala i jusum blong no obei long hem. Frut we i kamaot i nogud, mo i no kasem tufala nomo. Nogud frut ya i kasem olgeta tu we oli kamaot biaen long tufala, mo i gohed kam kasem yumi tede. ?From wanem? Samting we i hapen long tufala i sem mak long nogud frut we i kamaot taem hed blong famle i no moa holemtaet promes blong hem blong pem ren blong wan haos. Ale evriwan long famle oli mas aot long haos ya. Naoia oli no gat haos blong stap long hem mo oli fesem hadtaem stret. Long sem fasin, stat long taem ya we trifala ya, Adam, Iv, mo Setan, oli rebel agensem God, plante trabol i stap kasem olgeta man. (Rom 5:12) Plante yia biaen long fasin stronghed ya long Iden, gudfala man ya Job i talemaot filing blong hem, we i harem nogud tumas long bodi mo tingting blong hem, mo se sipos oli “skelem olgeta [trabol ya] long skel, bambae oli hevi moa i winim hevi blong sanbij.”—Job 6:2, 3.
Wan narafala samting we i save givim trabol long yumi, hemia se yumi no naf blong luksave evri samting we i save hapen long rod ya we yumi jusum. Tingbaot se i gat wan kampani i bildim plante haos nao biaen oli salem. Be ol haos ya oli stap long wan ples we plante taem, faea i kamaot long hem, mo i spolem plante samting wantaem. Yu we yu no save long samting ya, yu pem wan long ol haos ya, mo yu laef long hem. ?Olsem wanem? ?Sipos yu mekem olsem, yu yu stap putum yu wan mo famle blong yu long denja we yufala i save kasem bigfala trabol? Yes. Taswe, i no stret blong talem se trabol ya we i save kasem yu i wan panis we i kamaot long God. Baebol i talem stret nomo i se: “Man we i no gat hed, hem i save bilif long evri samting, be man we i gat hed, hem i stap lukluk gud long rod we bambae i folem.”—Ol Proveb 14:15.
Yumi glad blong save se, nomata wanem trabol we yumi evriwan i fesem, be God i gat wan stamba tingting blong hem, hemia se, i no longtaem bambae hem i karemaot olgeta trabol we i stap spolem ol man. Long taem ya, bambae yumi neva fesem, neva luk no harem wan trabol bakegen. Fasin blong krae from we yumi sore, fasin blong harem nogud long bodi, mo fasin blong krae from wan we yumi laekem hem tumas i ded, bambae “oli lus olgeta.” (Revelesen 21:4) Yumi harem gud tumas long narafala promes ya tu, we i talem se, neva bambae faet mo disasta i save spolem bakegen ol haos we ol man oli wokem, mo ol garen we ol man oli planem. Yes, ol samting we olgeta oli hadwok long hem, “bambae oli save harem gud long hem longtaem.”—Aesea 65:21-25.
?Naoia we yu stap wet blong God i karemaot olgeta trabol ya fulwan, yu save mekem wanem blong yu no harem nogud tumas long ol trabol ya? Faswan samting we i impoten se, “i nogud yu ting se save ya blong yu naoia, hem i naf blong givhan long yu.” Baebol i talem stret long yumi blong ‘trastem Jeova long olgeta tingting blong yumi.’ (Ol Proveb 3:5) Lukluk i go long hem blong i lidim yu mo i mekem yu yu harem gud. Yu mas obei gud long ol waes advaes blong God we yu faenem long Baebol. Hemia bambae i halpem yu blong mekem ol gudfala desisen, mo bambae i mekem we yu kam naf blong blokem plante trabol we i save kamaot.—Ol Proveb 22:3.