Baebol i Talem Wanem
?God i Makemaot Finis Fiuja Blong Yu?
Plante man oli ting se wan paoa we i hae moa long olgeta i makemaot finis ol samting we bambae i hapen long laef blong olgeta, wetem fiuja blong olgeta tu. Oli ting se taem yumi stat long bel blong mama blong yumi go kasem taem we yumi ded, yumi evriwan i folem wan plan we i stap finis long tingting blong God. Oli talem se, ‘God i gat olgeta paoa mo i save evri samting. Taswe, hem i save evri smosmol samting we oli hapen long ol yia we oli pas finis, mo long taem blong yumi naoia, mo ol samting we bambae oli hapen long fiuja.’
?WANEM tingting blong yu? ?God i makemaot finis ol samting we bambae i hapen long laef blong yumi, mo fiuja blong yumi tu? Blong talem long narafala tok: ?Yumi fri blong jusum rod blong yumi, no yumi jes ting se yumi fri olsem? ?Baebol i talem wanem?
?God i Jusum Blong Save Evri Samting We Bambae i Hapen?
Baebol i talem klia se God i naf blong save samting bifo we i hapen. Aesea 46:10 i talem se, ‘long stat blong wan samting, hem i talemaot samting we biaen i kamtru.’ Hem i bin yusum sam man olsem ol sekretari blong raetemdaon plante profet tok. (2 Pita 1:21) Oltaem ol profet tok ya oli kamtru, from we God i gat waes mo paoa, ale hem i save mekem evri haf blong olgeta oli kamtru. Taswe, God i naf blong save samting we bambae i kamtru, mo hem i naf tu blong makemaot wanem we bambae i kamtru, sipos hem i wantem mekem olsem. ?Be God i stap makemaot fiuja blong ol man wanwan? ?Hem i makemaot finis hamas man stret we bambae hem i sevem olgeta? Baebol i talem se nogat.
Baebol i tijim yumi se God i jusum wanem samting we hem i wantem makemaot long saed blong fiuja. Olsem nao, God i talemaot se, taem hem i spolem ol rabis fasin blong wol ya, bambae hem i sevem “wan bigfala kampani” blong ol stret man. (Revelesen 7:9, 14, NW) Be i gud blong makem se God i no talem hamas man stret bambae i stap long bigfala kampani ya. ?From wanem? From we hem i no stap makemaot fiuja blong ol wanwan man. God i olsem wan papa blong plante pikinini, we hem i lavem olgeta tumas. Hem i save finis se sam long ol pikinini blong hem bambae oli lavem hem, be hem i no traem talem hamas long ol pikinini ya we bambae oli mekem olsem.
Traem skelem fasin blong God blong makemaot wan samting we bambae i hapen, wetem fasin blong hem blong yusum paoa blong hem. Hae God Jeova i gat olgeta paoa. (Ol Sam 91:1; Aesea 40:26, 28) ?Be hem i yusum olgeta paoa blong hem oltaem? Nogat. Sam samtaem, hem i jusum blong no yusum paoa blong hem. Olsem nao, hem i no bin yusum paoa blong hem agensem Babilon we i wan enemi blong ol man Isrel bifo, gogo stret taem i kamtru blong spolem Babilon. Hem i talem se: “Mi stap bos long tingting blong mi.” (Aesea 42:14, NW) Sem mak long saed blong fasin blong God blong save fastaem samting we bambae i hapen, mo fasin blong hem blong makemaot samting we bambae i hapen. Jeova i bos long tingting blong hem, mo long fasin ya, hem i respektem raet we hem i givim long yumi blong jusum rod blong yumi.
Yes, God i bos long paoa blong hem, be hemia i no min se paoa blong hem i gat mak blong hem mo se hem i no stretgud olgeta. Nogat. Fasin ya we hem i save bos long paoa blong hem i rili soemaot se hem i gat olgeta paoa, mo i pulum yumi blong lavem hem, mo i soem se hem i no rul nomo wetem olgeta save mo paoa, be wetem lav mo respek tu long raet we ol man oli gat blong jusum rod blong olgeta.
Mo tu, sipos God i makemaot evri samting fastaem, wetem ol rabis aksiden mo ol nogud samting we oli hapen, yumi save talem se hem nao i stap mekem ol man long wol oli safa mo harem nogud. Taswe, taem yumi tingting gud, tijing ya se God i stap makemaot evri samting long laef blong wanwan man, i no givim ona long God, be i daonem God. Tijing ya i mekem God i luk olsem wan man we i nogud, i mekem i no stret, mo i no gat lav. Be hemia i defren olgeta long wanem we Baebol i talem long saed blong God.—Dutronome 32:4.
Yu Wan Yu Mas Jusum Rod Blong Yu
God i givim tok long man blong hem, Moses, blong i talemaot long ol man Isrel, se: “?Yufala i wantem laef, no yufala i wantem ded? . . . !Mi mi wantem tumas blong yufala i jusumaot laef! Hae God i God blong yumi, mo yufala i mas lavem hem, yufala i mas obei long hem, mo oltaem, tingting blong yufala i mas strong long hem. Sipos yufala i mekem olsem, . . . bambae yufala evriwan i laef, mo bambae yufala i save stap longtaem.” (Dutronome 30:19, 20) ?Olsem wanem? ?God i makemaot laef blong wanwan man Isrel se samfala bambae oli lavem hem mo kasem laef, mo samfala bambae oli tanem baksaed long hem mo oli ded? Sipos God i mekem olsem, ol tok ya blong hem i blong nating nomo, mo i giaman tu. ?Yu yu ting se God ya we “i laekem ol fasin we i stret” mo we i stamba blong lav, i save mekem i nogud olsem long ol man?—Ol Sam 37:28; 1 Jon 4:8.
Tok we God i talem long ol man blong hem bifo, se oli mas jusum laef, i stret moa long yumi tede. ?From wanem? From we ol profet tok blong Baebol oli soemaot se en blong ol rabis fasin blong wol ya i stap kam hareap. (Matiu 24:3-9; 2 Timoti 3:1-5) ?Yumi mas mekem wanem blong jusum laef? Yumi mas mekem sem mak olsem ol man Isrel bifo.
?Yu Mas Mekem Wanem Blong “Jusumaot Laef”?
Blong jusum laef, yumi mas ‘lavem Jeova,’ “obei long hem,” mo ‘tingting blong yumi i mas strong long hem oltaem.’ Blong mekem ol samting ya, yumi mas save ol fasin mo tingting blong God, mo kasem save long ol samting we hem i wantem yumi blong mekem. Jisas Kraes i prea long God, i se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.”—Mifala nomo i jenisim raeting ya; Jon 17:3, Nyutesteman wetem Ol Sam Long Bislama.
Nambawan save ya, yumi faenem long tabu Tok blong God, Baebol. (Jon 17:17; 2 Timoti 3:16) Yes, presen ya we God i givim i pruvum klia se God i no makemaot fiuja blong yumi. Be hem i wantem we yumi kasem save long Baebol, mo biaen yumi save tekem prapa desisen blong yumi we i stanap long ol samting we yumi lanem.—Aesea 48:17, 18.
Taem God i givim Baebol long yumi, i olsem we hem i stap talem se: ‘Hemia nao tingting we mi mi gat long saed blong ol man mo wol ya, mo mi stap talem long yu wanem we yu mas mekem blong kasem laef we i no save finis. I stap long yu nao blong jusum sipos yu wantem lesin long mi, no yu wantem tanem baksaed long mi.’ Yes, God i gat paoa blong makemaot fiuja, be hem i respektem raet blong ol man blong jusum rod blong olgeta. ?Olsem wanem long yu? ?Bambae yu ‘obei long God, mo putum tingting blong yu i stap strong long hem oltaem’?
?YU YU BIN TINGBAOT?
◼ ?God i yusum paoa blong hem blong save fiuja go kasem wanem mak? —Dutronome 30:19, 20; Aesea 46:10.
◼ ?From wanem God i no save makemaot evri samting, wetem ol nogud samting we oli hapen long ol man tu?—Dutronome 32:4.
◼ ?Wanem samting we bambae i mekem se yumi kasem wan gudfala fiuja, no nogat?—Jon 17:3.
[Tok blong makem poen long pej 25]
Baebol i tijim yumi se God i jusum wanem samting we hem i wantem makemaot long saed blong fiuja