?Fyuja Blong Yu Bambae i Olsem Wanem?

SIPOS God we i gat Olgeta Paoa hem i save olgeta samting we oli hapen finis, we oli stap hapen naoia, mo we bambae oli hapen long fyuja, ating i sua se evri samting we oli hapen long laef oli kamaot olsem we hem nomo i wantem. Sipos God i luk mo i makemaot finis olgeta rod we man i mas folem mo wanem we i mas hapen long laef blong olgeta man wanwan, ?yu ting se i stret blong talem se yumi fri blong jusum samting we yumi wantem mekem long laef blong yumi, mo long fyuja blong yumi?

Blong plante handred yia finis, ol man oli rao from ol kwestin ya. Ol rao long saed ya oli gohed yet blong mekem plante bigbigfala skul oli seraot. ?Yumi save talem se fasin ya we God i naf blong save evri samting we bambae oli hapen long fyuja i laenap wetem fasin we man i fri blong jusum samting we hem i wantem? ?Weples bambae yumi faenem ansa blong kwestin ya?

Plante milyan man raonabaot long wol oli agri se God i toktok wetem ol man tru long Tok blong hem we ol man blong hem, ol profet, oli bin raetemdaon bifo. Wan eksampel, buk ya Koran i tokbaot sam samting we God i talem no soemaot long ol man: Taurāh (Tora, Loa, no faefala buk blong Moses), Zabūr (ol Sam), mo Injīl (ol Gospel, hemia Kristin Grik haf blong Baebol, no “Nyutesteman”), wetem ol tok ya tu we hem i bin givim long ol profet blong Isrel.

Long Kristin Grik haf blong Baebol, yumi ridim tok ya se: “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long ol stret fasin.” (2 Timote 3:​16) I klia se, eni tok we yumi kasem blong lidim yumi no blong eksplenem samting long yumi, i mas kamaot long God nomo. Taswe, ?yu no ting se i waes blong lukluk moa long hanraet blong ol profet blong God bifo? ?Ol tok ya oli soemaot wanem long saed blong fyuja blong yumi?

Fyuja We Oli Raetem Finis

Eniman we i ridim Tabu Baebol i savegud se i gat plante handred profet tok insaed long hem. Sam bigfala samting we oli hapen long histri, olsem taem we Babilon i foldaon, taem we oli bildim bakegen Jerusalem (yia sikis kasem faef handred B.K.T.a), wetem stat mo en blong rul blong ol king blong Midia, Pesia mo Gris, olgeta evriwan, Baebol i talemaot klia nomo bifo we oli hapen. (Aesea 13:17-​19; 44:⁠24 kasem 45:1; Daniel 8:​1-7, 20-​22) Ol profet tok ya we oli kamtru, oli strongfala pruf se Tabu Baebol i rili Tok blong God. Yes, God nomo i gat paoa blong lukluk i go long fyuja mo blong save wanem we bambae i hapen. Long fasin ya, i tru tumas we Tabu Baebol i talemaot fyuja finis bifo we i kamtru.

God hem wan i talemaot se: “Mi mi God mo i no gat narafala God, no wan we i olsem mi. Mi ya mi stap talemaot en blong wan bisnes long stat blong hem, mo mi talemaot longtaem finis ol samting we oli no kamaot yet. Mi ya mi stap talem se, ‘Advaes blong mi bambae i stanap, mo evri samting we mi glad long hem bambae mi mas mekem’ . . . Mi mi talemaot finis, bambae mi mekem i kamtru. Mi mi mekemrere finis, bambae mi wokem tu.” (Aesea 46:​9-​11; 55:10, 11) God i talem long ol profet bifo se nem blong hem i Jeova, we stret mining blong nem ya se “Hem i Mekem i Kamaot.”b (Jenesis 12:​7, 8; Eksodas 3:​13-​15; Ol Sam 83:18) God i soemaot se hem i Man ya we i mekem olgeta tok blong hem oli kamtru, Man ya we oltaem i mekem ol stampa tingting blong hem oli kamtru.

God i gat paoa blong save fastaem finis wanem samting we bambae i hapen, mo hem i yusum paoa ya blong mekem ol stampa tingting blong hem oli kamtru. Plante taem, hem i yusum paoa ya blong givim woning long ol rabis man se bambae hem i jajem olgeta, mo blong givim hop long ol man blong wok blong hem tu, se bambae oli save stap sef. Be, ?God i save blokem hem wan blong i no yusum paoa ya oltaem? ?I gat pruf long Tabu Baebol blong soemaot se God i no jusum blong save long sam samting bifo we oli hapen, nating se hem i gat paoa blong save?

?God i Save Finis Evri Samting We Oli Hapen?

Olgeta tingting we oli sapotem tijing ya se God i makemaot fyuja blong man finis, oli stanap long tok ya se, sipos God i gat paoa blong save mo talemaot fastaem ol samting we oli hapen long fyuja, ale, hem i mas save evri samting, wetem olgeta samting we ol wanwan man bambae oli mekem tu. Be, ?i waes blong tingting olsemia? Ol tok we God i putum insaed long Tabu Baebol i soemaot samting we i defren.

Wan eksampel. Baebol i talem se “God i traem fasin blong bilif blong Ebraham,” taem hem i givim oda long hem blong kilim pikinini boe blong hem Aesak olsem wan sakrifaes. Taem Ebraham i rere blong kilim Aesak i ded, God i blokem hem mo i talem se: “Naoia mi mi save we yu yu stap ona long God tru, from we pikinini ya blong yu i wan nomo we yu yu gat, be yu no holemtaet hem, yu rere nomo blong letem hem i ded.” (Jenesis 22:​1-​12) ?Yu ting se God i save talem tok ya sipos hem i save finis se bambae Ebraham i obei long oda blong hem? Sipos hem i save finis, ?yumi save talem se God i rili traem bilif blong Ebraham?

Antap long samting ya, ol profet blong bifo oli talem plante taem se God i ‘harem i sore’ we hem i bin mekem wan samting no we hem i stap tingting blong mekem. Eksampel, God i talem se hem i “sore [we i kamaot long Hibru tok ya na·chamʹ] we hem i bin putumap Sol olsem king long Isrel.” (1 Samuel 15:11, 35; skelem wetem Jeremaea 18:​7-​10; Jona 3:​10.) From we God i stretgud olgeta, ol vas ya oli no save minim se God i bin mekem wan mastik taem hem i jusum Sol blong kam faswan king blong Isrel. No gat. Be, ol vas ya oli soemaot se God i sore blong luk we Sol i lego fasin blong bilif mo i no moa obei long hem. I krangke nomo sipos God i talem tok ya, be hem i save finis wanem we Sol bambae i mekem.

Semfala tok ya i kamaot tu long haf blong Baebol we i olfala olgeta. Baebol i tokbaot taem blong Noa, i se: “Nao Jeova i sore we hem i bin mekem ol man, mo i bin putum olgeta long wol ya. Hem i stap harem nogud long hat blong hem. Nao i talem se: ‘Bambae mi mi spolem ol man ya we mi mekem. Bambae mi tekemaot olgeta bakegen, oli go lus. . . . Mi mi sore we mi bin mekem olgeta.’ ” (Jenesis 6:​6, 7) Bakegen, vas ya i soemaot se ol samting we ol man oli mekem oli no kamaot from we God i makemaot se i mas olsem. Hem i sore we i bin mekem ol man, i harem nogud, mo tingting blong hem i trabol tu, i no from we hem i bin mekem wan mastik taem hem i wokem man, be from we rabis fasin blong ol man i kam bigwan tumas. Man ya we i Wokem Olgeta samting, hem i sore we hem i mas spolem olgeta man, Noa nomo wetem famle blong hem oli save laef i stap. God i talem klia se: ‘Mi mi no haremgud taem wan rabis man i mas ded.’​—Esikel 33:11; skelem wetem Dutronome 32:​4, 5.

Taswe, ?God i save finis mo hem i makemaot finis se bambae Adam i foldaon long sin, mo se olgeta pikinini we oli kam biaen long Adam bambae oli kasem hadtaem from? Wanem we yumi jes tokbaot i soemaot klia se samting ya i no tru. Wan narafala samting we yumi save tingbaot tu, hemia se sipos God i save finis olgeta samting ya we bambae oli hapen, i minim se hem nao i stampa blong sin taem hem i wokem man, mo se hem nao i gat fol from ol rabis fasin blong man mo olgeta trabol we man i kasem. I klia se, samting ya i no laenap nating wetem wanem we God i talem long Baebol long saed blong hem wan. Hem i wan God we i gat lav mo stret fasin, hem i no laekem nating ol rabis fasin.​—Ol Sam 33:5; Proveb 15:9; 1 Jon 4:8.

Tu Kaen Fyuja We God i Makemaot Finis Blong Man

Tabu Baebol i no soemaot se God i makemaot finis fyuja blong yumi wanwan. No gat. Be, hem i soemaot se God i tokbaot tu kaen fyuja we man i save kasem. God i givim raet long olgeta man wanwan blong jusum weswan fyuja oli wantem. Profet Moses long taem bifo i talem long ol man Isrel se: “Mi putum laef mo ded long fes blong yufala, . . . mo yufala i mas jusum laef blong bambae yufala i save gohed blong stap laef, yu mo ol pikinini we bambae oli kam biaen long yu. Yufala i mas laekem Jeova, God blong yufala, yufala i mas lesin long voes blong hem mo fasgud long ol rod blong hem, from we hem i laef blong yufala mo hem nao i save mekem ol dei blong yufala long wol ya oli longfala.” (Dutronome 30:19, 20) Jisas, we hem i profet blong God, i givim woning ya se: “Yufala i mas pas long get ya we i smol nomo blong go insaed. From we get ya we i bigfala, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef. Mo smol man nomo oli faenem.” (Matyu 7:​13, 14) Tu rod, tu fyuja. Fyuja blong yumi i dipen long wanem we yumi nomo i mekem. Sipos yumi obei long God bambae yumi kasem laef, sipos yumi no obei, bambae yumi ded.​—Rom 6:​23.

God ‘i stap talem long ol man long evri ples, se oli mas tanem tingting blong olgeta from ol sin blong olgeta. From we hem i putum dei finis, we bambae hem i save jajem olgeta man long wol, mo bambae hem i mekem long fasin we i stret nomo.’ (Ol Wok 17:30, 31) Tede, bighaf blong ol man oli no obei long ol loa blong God, i sem mak nomo long taem blong Noa we bighaf blong ol man oli jusum blong no obei, nao God i spolem olgeta. Nating se i olsem, God i no makemaot finis se hu bambae i lus mo hu bambae i kasem laef. No gat. Tok blong God i talem se ‘hem i no wantem blong ol man oli lus, be i wantem blong olgeta man bambae oli tanem tingting blong olgeta from ol sin blong olgeta.’ (2 Pita 3:9) Man we i rabis olgeta, hem tu i save tanem tingting blong hem, i save folem fasin blong obei, mo jenisim olgeta samting we hem i nidim blong jenisim blong mekem se God i agri long hem.​—Aesea 1:​18-​20; 55:​6, 7; Esikel 33:14-​16; Rom 2:​4-8.

God i promes long olgeta we oli obei long hem se bambae oli kasem laef we i no save finis long wan paradaes we pis i stap long hem. Bambae oli save stap long wol ya we i no moa gat rabis fasin, raf fasin, mo faet long hem, oli no moa sot long kakae, mo i no moa gat fasin blong safa, sik mo ded. (Ol Sam 37:​9-​11; 46:9; Aesea 2:4; 11:​6-9; 25:​6-8; 35:​5, 6; Revelesen 21:4) Ol dedman tu bambae oli laef bakegen mo kasem jans blong mekem wok blong God.​—Daniel 12:2; Jon 5:​28, 29.

Man blong raetem Ol Sam i talem se: ‘Yu luklukgud long gudfala man, we laef blong hem i stret, mo we hem i wantem pis, yu traem makem fasin blong hem. Fyuja blong man ya bambae i fulap long pis. Be ol man nogud, Hae God bambae i spolemgud olgeta. Fyuja blong ol rabis man ya bambae i finis olgeta.’ (Ol Sam 37:37, 38) ?Fyuja blong yu bambae i olsem wanem? Samting ya i dipen long yu nomo. Ol man we oli wokem buk ya bambae oli glad blong givim moa save long yu blong givhan long yu blong kasem wan fyuja we i hapi mo i gat pis.

[Ol futnot]

[Tok Makem Poen Long Pej 6]

God i gat paoa blong save fastaem wanem samting we bambae i hapen, mo hem i yusum paoa ya blong mekem ol stampa tingting blong hem oli kamtru

[Tok Makem Poen Long Pej 8]

God ‘i no wantem we ol man oli lus, hem i wantem blong olgeta man bambae oli tanem tingting blong olgeta from ol sin blong olgeta.’ 2 Pita 3:9

[Tok Blong Pija Long Pej 7]

Sipos God i save fastaem se Ebraham i rere blong obei mo kilim pikinini blong hem olsem wan sakrifaes, ?yu ting se hem i rili traem Ebraham?