Baebol i Talem Wanem

?Yu Yu Mas Agensem Fasin Ya Blong Bonem Bodi Blong Dedman?

Sam man oli ting se fasin ya blong bonem bodi blong dedman blong i kam asis, i no soem ona long bodi mo memori blong man ya we i ded. Oli talem se ‘tingting ya i kamaot long ol hiten man, mo olgeta we oli wosipim God oli no mas folem kastom ya.’ Ol narafala man oli bilif se fasin ya blong bonem bodi blong dedman i stret nomo mo i soem ona, mo plante man oli agri long fasin ya. ?Wanem tingting blong yu long saed ya?

LONG taem blong Baebol, ol man oli folem kastom ya blong berem bodi blong dedman. Olsem Ebram bifo, taem woman blong hem Sera i ded, hem i berem bodi blong hem long wan hol blong ston. Oli putum bodi blong Jisas long wan hol we oli katem long ston. (Jenesis 23:9; Matiu 27:60) ?Olsem wanem? ?Baebol i talem wan rod nomo blong mekem long bodi blong dedman, hemia blong berem? ?Baebol i soemaot se ol man blong God bifo, oli no agri long fasin ya blong bonem bodi blong dedman?

?Fasin Ya i Soemaot Se God i No Glad Long Man Ya We i Ded?

Sipos yumi ridim Baebol kwiktaem nomo, maet yumi luk se sam haf i soem se ol man oli bonem dedbodi blong ol man ya we God i no glad long olgeta. Olsem nao, Loa blong Moses i talem se sipos wan pikinini gel blong wan long ol pris i kam woman blong rod, oli mas kilim hem i ded mo “bonem bodi blong hem long faea.” (Levitikas 20:10; 21:9, NW) Long sem fasin, taem ol man Isrel oli lusum faet long Eae from we Akan mo famle blong hem oli no obei, ol man Isrel oli stonem olgeta gogo oli ded, mo biaen “oli bonem olgeta” long faea. (Josua 7:25) Sam man blong stadi long Baebol oli talem se hemia nao fasin we ol man oli mekem long olgeta we oli ded from we God i no glad long olgeta. Mo oli talem se, ol man oli bonem bodi blong olgeta we oli ded from rabis fasin blong olgeta, blong berem olgeta long fasin we i no soem respek.

Mo tu, taem King Josaea i traem blong tekemaot wosip blong ol aedol long Juda, hem i brekem ol bokis ya we oli putum bodi blong ol pris long hem. Mo hem i bonem bodi blong ol pris ya long ol olta we ol pris ya oli bin yusum blong mekem sakrefaes i go long Bal. (2 Kronikel 34:4, 5) ?Olsem wanem? ?Ol stori ya oli soemaot se God i kros long ol man ya we dedbodi blong olgeta oli bonem long faea? Nogat. Wan narafala stori blong Baebol i soemaot samting ya.

Taem ol man Filistia oli kilim King Sol i ded long faet, oli soem se oli no gat respek long hem, taem oli fasem dedbodi blong hem mo trifala pikinini blong hem long stonwol blong taon ya Betsan. Taem ol man Isrel we oli stap long Jabes long Gilead, oli harem nius blong nogud fasin we ol man ya oli mekem, oli kam tekemaot ol dedbodi ya mo bonem olgeta, mo biaen oli berem ol bun blong olgeta. (1 Samuel 31:2, 8-13) Maet fastaem, ol man oli save ting se stori ya i pruvum we fasin blong bonem dedbodi blong man, i nogud. Maet oli tingbaot se Sol i wan rabis man, hem i faet agens long Deved, man ya we Jeova i makemaot hem, mo God i no glad long Sol taem hem i ded.

Be traem tingbaot se hu i ded klosap long Sol. Hemia Jonatan, wan long ol pikinini blong Sol. Ol man oli mekem i nogud long bodi blong hem long sem fasin we oli mekem long bodi blong Sol. Jonatan i no wan man nogud. Defren olgeta, hem i wan gudfala fren blong Deved mo i sapotem Deved. Ol man Isrel oli luksave se: ‘God nao i givhan long Jonatan.’ (1 Samuel 14:45) Taem Deved i harem samting we ol man Jabes long Gilead oli mekem, hem i presem olgeta mo i talem tangkiu long olgeta. Hem i talem se: “Prea blong mi we Hae God bambae i blesem yufala, from we yufala i go berem King Sol.” I klia we Deved i no harem nogud taem ol man oli bonem bodi blong Sol mo Jonatan.—2 Samuel 2:4-6.

Fasin Ya i No Blokem Man Blong Laef Bakegen

Baebol i tijim se Jeova God bambae i mekem plante man we oli slip naoia long beregraon, oli laef bakegen. (Prija 9:5, 10; Jon 5:28, 29) Ol profet tok blong Revelesen, no Apokalips, oli tokbaot taem ya we ol dedman bambae oli laef bakegen, i se: “Olgeta man we oli ded long solwota, oli aot long solwota oli kam. Mo olgeta narafala dedman tu oli kam. Ded wetem [“Hades,” NW] tufala i no moa save holem olgeta, olgeta evriwan oli aot long tufala, oli kam.” (Revelesen 20:13) Nating sipos ol man oli berem bodi blong dedman, oli bonem, no bodi blong man i lus long solwota no ol wael anamol oli kakae, no maet wan bom i smasem bodi ya nao i lus. Olgeta samting ya oli no save blokem God ya we i gat olgeta paoa, blong mekem man i laef bakegen.

Baebol i no givim wan spesel rul long samting we yumi mas mekem long bodi blong dedman. Jeova i no agensem fasin ya blong bonem bodi blong dedman. Be i klia se enikaen fasin we oli mekem blong berem dedman, oli mas mekem wetem ona mo respek.

Samting we maet i save gat paoa long desisen blong wan man, hemia tingting blong ol manples long saed blong ol kastom blong berem dedman. Ol man we oli folem ol stamba rul blong Baebol, oli no wantem mekem samting we i save spolem filing blong narafala. Be i no stret tu blong joen long ol kastom we oli soemaot ol giaman tijing blong skul, olsem sol we i no save ded samtaem. Desisen we wan man i mekem long saed blong bodi blong hem wan, no bodi blong narafala, hem i bisnes blong man ya nomo mo famle blong hem.

?YU YU BIN TINGBAOT?

◼ ?Hu ya man blong trufala God we Baebol i tokbaot se oli bonem dedbodi blong hem?—1 Samuel 31:2, 12.

◼ ?Deved i mekem wanem long ol man ya we oli bonem dedbodi blong Sol?—2 Samuel 2:4-6.

◼ ?Wanem samting i soem se fasin blong bonem bodi blong wan dedman i no blokem dedman ya blong laef bakegen?—Revelesen 20:13.

[Tok blong makem poen long pej 11]

Baebol i no givim wan spesel rul long samting we yumi mas mekem long bodi blong dedman