Wan Tija i Jenisim Tingting Blong Hem

◼ Sam yia bifo, wan tija long taon ya Batumi long kantri ya Georgia, i askem ol studen blong hem blong talemaot ol Tenkomanmen. Hem i sapraes taem wan studen blong hem, Anna, i talemaot ol Tenkomanmen we i no mestem wan nating. Mo tu, hem i ansa gud long ol kwestin blong Baebol we tija i askem long hem. Tija i wantem save moa, ale hem i askem olsem wanem Anna i savegud Baebol. Taem Anna i talem se hem i stap stadi Baebol wetem ol Witnes blong Jeova, tija i katem toktok blong hem, i talem se ol Witnes blong Jeova oli bitim mak long bilif blong olgeta.

Long wan narafala taem, tija i askem ol studen blong raetem wan stori long saed blong laef long Georgia mo ol problem we kantri ya i stap fesem. Long en blong stori blong hem, Anna i raetem se: “Eni traehad we ol man oli mekem blong jenisim fasin blong laef blong man bambae i no save wok gud, from we, olsem Jeremaea 10:23 i talem: ‘I no gat man i save wanem samting bambae i kamtru long laef blong hem, mo i no gat man i save kam bos long laef blong hem.’ Kingdom blong God nomo bambae i save winim ol problem blong wol ya.”

Long nekis dei, tija i presem stori blong Anna long klasrum mo i talem se: “Mi laekem stori blong Anna, we hem i raetem long prapa toktok blong hem. Hem i talem olsem wanem ol problem we i stap kamaot long wol tede i save jenis.” Mo tu, tija i laekem fasin blong Anna, mo long fored blong ol narafala studen hem i leftemap Anna from ol gudfala fasin blong hem mo fasin ya blong hem blong werem ol klos we i stret.

Taem ol Witnes blong Jeova oli kam luk hem long haos blong hem, tija ya i talem long olgeta se fastaem, hem i luk olgeta olsem ol man we oli bitim mak long bilif blong olgeta. Be naoia hem i jenisim tingting blong hem from studen blong hem Anna. Long 2007, tija ya i kam long Memoriol blong tingbaot ded blong Jisas wetem ol Witnes blong Jeova, mo hem i lesin gud long toktok we i kamaot.

Afta long Memoriol, tija blong Anna i talem se hem i laekem olsem wanem ol Witnes blong Jeova oli savegud Baebol. Naoia ol Witnes blong Jeova oli stap gohed blong stadi Baebol wetem hem. Maet yu yu olsem tija ya, yu gat wan tingting we i rere blong save moa long saed blong ol bilif mo fasin blong narafala. Ale, yu tu yu save askem wan Witnes blong Jeova blong i kam stadi Baebol fri nomo long haos blong yu.

[Tok blong pija long pej 21]

Anna i stap raetem stori blong hem