Woman Ya i No Olfala Tumas Blong Mekem Wok Blong Jeova
PLANTE man we oli olfala oli filim se ol yia blong olgeta we oli stap yet oli holem smol hop nomo blong fasin glad. Wan woman we i stap pleplei long sinema we ol man oli savegud hem, i stap kam olfala nao i talem se: “Mi bin spolem laef blong mi, mo i let finis blong jenisim . . . Taem mi stap wokbaot mi wan, mi tingtingbak long laef blong mi, mo mi no glad long rod ya we mi bin folem . . . Nomata weples mi stap, tingting blong mi i olbaot, mo mi no save stap kwaet.”
Wan olfala woman we i laef kolosap 2,000 yia bifo i no gat problem olsem. Hem i wan wido we i gat 84 yia, be hem i stap wok strong, i glad, mo God i blesem hem bigwan. Nem blong hem Ana, mo hem i gat wan spesel risen blong glad. ?Wanem risen ya?
“Oltaem Nomo, Hem i Stap Long Haos Blong God”
Man we i raetem Gospel blong Luk i mekem yumi save long saed blong Ana. Hem i talem se, “Mo i gat wan woman i stap we nem blong hem Ana, we hem tu i wan profet. Hem i dota blong Fanuel, wan man we i kamaot long laen blong Asere bifo” long Isrel. Olsem wan woman profet, God i givim tabu speret no strong paoa long hem, long wan spesel fasin. Mo Ana i gat bigfala jans blong talemaot profet tok long wan impoten taem.
Luk i storeyan se: “Taem we Ana i yang gel nomo hem i mared, mo tufala i stap seven yia, nao man blong hem i ded, hem i wido. Nao hem i stap olsem nomo, kam kasem taem ya, mo long taem ya, hem i olfala, i gat eitefo yia blong hem.” (Luk 2:36, 37) I luk olsem we, Ana i kam wido taem hem i no olfala nating. Ol Kristin woman we oli wido, nating se oli yang no olfala, oli save olsem wanem i spolem hat blong olgeta taem ol hasban blong olgeta we oli laekem tumas oli ded. Be olsem plante woman we oli mekem wosip long God long taem blong yumi, Ana i no letem nogud samting ya i stopem hem blong no moa mekem wok blong God.
Luk i talem long yumi se Ana ‘i stap oltaem long haos blong God’ long Jerusalem. (Luk 2:37) Hem i gat bigfala tangkyu long blesing we hem i kasem blong mekem wok long haos blong God. Olsem king blong Isrel, Deved, we hem i raetem sam long Ol Sam, wok blong hem i soemaot se, hem i gat wan samting nomo blong askem long Jeova. ?Mo wanem samting ya? Deved i singsing i se: “Mi mi askem wan samting long God, wan samting nomo we mi mi wantem. Mi wantem tumas blong mi save stap long haos blong Hae God oltaem long laef blong mi, blong mi stap lukluk ol gudgudfala fasin blong Hae God, mi stap tingtinggud long olgeta.” (Ol Sam 27:4) Long saed ya, tu, Ana i olsem ol Kristin woman tede we oli glad tumas blong stap oltaem long ples blong wosip long Jeova.
Ana i stap mekem tabu wosip long Jeova long naet mo long dei. Hem i mekem samting ya “we i stap prea, mo i stap livim kakae blong hem from,” samting ya i soemaot se hem i stap sore mo i wantem wan samting tumas. (Luk 2:37) Maet i gat tu samting we i mekem se Ana i livim kakae blong hem mo i mekem prea long Jeova God, faswan se plante handred yia finis, ol man Jyu oli stap aninit long paoa blong ol hiten man, mo seken samting se, fasin blong wosip i stap kam nogud mo samting ya i kasem haos blong God mo ol pris blong hem tu. Be hem i gat spesel risen tu blong stap glad, from wan bigfala samting we i kamaot long wan impoten dei long yia 2 B.K.T.
Wan Blesing We Hem i No Tingbaot
Long dei ya we i impoten tumas, Meri mama blong bebi ya Jisas mo papa we i adoptem hem, Josef, tufala i karem hem i go long haos blong God long Jerusalem. Olfala Simeon i luk bebi ya mo i talem ol profet tok long taem ya. (Luk 2:25-35) Ana i stap long haos blong God olsem oltaem. Luk i talem se, “Nao hem i pas long ples ya, stret long taem ya we Simeon i stap tok.” (Luk 2:38) !Ana i mas glad tumas taem ae blong hem we i no moa save lukluk gud, oli luk hemia we bambae hem i Mesaea long fyuja!
Fote dei bifo, enjel blong God i mekem ol man blong lukaotem sipsip kolosap long Betlehem oli sek from ol tok ya: “Mi mi gat wan gud nyus blong talem long yufala, we i save mekem olgeta man oli harem gud tumas. Long naet ya nomo, long velej ya blong King Deved bifo, i gat wan pikinini i jes bon, we hem bambae i sevem yufala. . . . Hem i Mesaea ya we i Masta blong yumi.” Nao fulap enjel blong heven oli presem Jeova mo oli ademap se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.” (Luk 2:8-14) !Long sem fasin, hat blong Ana tu i pusum hem nao, blong talemaot Hemia we bambae i kam Mesaea!
Taem Ana i luk bebi ya Jisas, hem i “talem tangkyu long God from, mo i stap tokbaot pikinini ya long olgeta we oli stap wet blong Mesaea bambae i mekem Jerusalem i fri bakegen.” (Luk 2:38) Olsem olfala Simeon, we hem tu i kasem blesing ya blong luk bebi Jisas long haos blong God, Ana i bin wantem tumas blong luk, i stap prea from, mo i stap wet long Man ya we promes ya i talem se bambae hem i sevem ol man. Gud nyus ya se Jisas nao i Man ya, i gud tumas long hem, we hem i wantem tumas blong talemaot long ol narafala.
Nating se Ana i no ting se bambae hem i save stap laef taem Jisas i kam bigwan, ?hem i mekem wanem? Hem i glad blong talemaot long ol narafala long saed blong fasin fri ya we bambae i kamaot tru long Hemia we bambae i kam Mesaea.[5]
Nambawan Eksampel Blong Ana
?Hamas long ol man blong ol skul long wol bambae oli save givim wan wetnes olsem no oli stap gohed blong wosip long naet mo long dei taem oli gat 84 yia olsem? Ating, bambae oli askem blong ritae blong kasem smol vatu blong olgeta taem we oli no olfala tumas yet. Ana mo Simeon tufala i defren long ol man olsem. Oli givim nambawan eksampel long olgeta olfala man blong Jeova. I tru, oli laekem tumas haos blong wosip blong Jeova mo oli presem hem wetem ful hat blong olgeta.
Ana i givim nambawan eksampel long yumi blong wan wido we i obei long God. Yes ol tok blong Luk long saed blong olfala woman ya we i gat tingting daon, oli joengud wetem ol fasin blong wan wido we i stret blong givim ona long hem, olsem 1 Timote 5:3-16 i talem. Long ples ya aposol Pol i talem se wan wido olsem, ‘hem i stap prea long God long dei mo naet,’ hem i “woman blong wan man nomo,” mo “we i putum tingting blong hem finis blong mekem ol narafala gudfala wok.” Ana i wan kaen woman olsem.
Tede, yumi faenem ol olfala wido wetem strong bilif we oli stap mekem tabu wok blong God long naet mo long dei long plante taosen kongregesen blong ol Wetnes blong Jeova raon long wol. !Yumi glad tumas blong gat ol “Ana” ya blong tede long medel blong yumi!
Nating se oli gat plante yia olsem, ol man mo ol woman oli save givim laef blong olgeta i go long God mo baptaes long wora blong soemaot samting ya. Ol olfala oli neva olfala tumas blong mekem wok blong Jeova no blong wetnes long saed blong Kingdom blong Mesaea we i stap rul long heven naoia mo we i no longtaem bambae i givim ol gudfala blesing long olgeta man we oli obei long hem. Ol olfala we oli stap mekem tabu wok blong God oli save talemaot ol pruf we i soem blesing blong Jeova long olgeta, olsem we Ana i bin kasem spesel blesing plante handred yia bifo. Ana i no olfala tumas blong mekem wok blong Jeova mo presem tabu nem blong hem—mo i sem mak long ol olfala tede.