Baebol i Talem Wanem
?I Rong Blong Jenisim Skul Blong Yu?
Taem Avtar i stat blong stadi Baebol, ol famle blong hem we oli blong skul ya Sikh, oli harem nogud. Hem i talem se: “Long kantri blong mi, sipos yu jenisim skul blong yu, ol man long vilej bambae oli no moa joen wetem yu. Mifala i gat wan spesel nem tu we i joen long skul we mifala i folem. Sipos yu jenisim skul blong yu, ol man oli ting se yu yu sakemaot nem ya we i makemaot yu, mo se yu no moa respektem famle blong yu.”
I NO longtaem biaen, Avtar i kam wan Witnes blong Jeova. ?Olsem wanem? ?I rong we hem i jenisim skul blong hem? ?Ating yu tu, yu gat tingting olsem famle blong hem? Maet yu yu harem se skul blong yu i wan haf blong histri mo kalja blong famle blong yu we yu no mas jenisim.
Fasin blong ona long famle i impoten. Baebol i talem se: “Pikinini blong mi. Mi mi papa blong yu. Yu mas lesin long mi, from we mi mi bonem yu.” (Ol Proveb 23:22) Be i impoten moa blong traehad blong faenem trutok long saed blong Man ya we i wokem yumi, mo ol stamba tingting blong hem. (Aesea 55:6) ?I gat rod blong faenem trutok ya? ?Sipos yes, yu yu ting se i impoten blong faenem?
Lukaot Trutok Blong Baebol
Olgeta skul blong wol oli tijim ol defdefren tingting. Ol defren tijing olsem oli no save tru evriwan. From samting ya, Baebol i talem se i gat plante man we oli strong blong mekem ‘wosip long God, be wosip blong olgeta i no stanap long stret save.’ (Rom 10:2, NW) Nating se i olsem, aposol Pol i talem long 1 Timoti 2:4, se God i wantem sevem olgeta man, mo i wantem we “olgeta man . . . oli save trutok blong hem.” ?Olsem wanem blong faenem trutok ya?
Tingbaot sam risen from wanem i gud we yumi stadi long Baebol. Tabu spirit i pulum Pol blong raetem long Baebol se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok.” (2 Timoti 3:16) Wok blong faenem trutok, hemia blong jekem ol pruf we oli soem se wanem samting we Baebol i talem, oli tru. Yu yu save faenem we waes blong Baebol i bitim waes blong olgeta narafala man, ol stori blong bifo oli tru, mo ol profet tok oli kamtru.
Baebol i no tijim se olgeta skul evriwan oli lidim man i go long God, mo hem i givim woning long ol man se oli no mas bilif long evri samting we oli harem. Hem i talem se: “Yufala i mas traem olgeta fastaem, blong faenemaot se spirit we i stap long olgeta i kamaot long God, no nogat.” (1 Jon 4:1) Tingbaot, eni tijing we i kamaot long God, i mas laenap gud wetem ol fasin blong God mo wetem faswan bigfala fasin blong hem, hemia lav.—1 Jon 4:8.
Baebol i talem se God i wantem we yumi mas “lukaot hem.” (Ol Wok 17:26, 27) From we Man ya we i wokem yumi i wantem se yumi faenem trutok, i no rong blong tekem aksen folem save we yumi kasem, mo maet hemia i min se yumi mas jenisim skul blong yumi. ?Be olsem wanem long ol trabol we maet oli save kamaot from?
Stap Tru Long Famle, Be No Bitim Mak
Taem ol man oli jenisim bilif blong olgeta, maet oli mekem desisen se bambae oli no moa joen long sam lafet mo holide blong skul. I tru, samting ya i save mekem fasin agens i kamaot long famle. Jisas i talemaot samting ya finis. Hem i talem long ol man we oli folem hem se: “Mi kam blong mekem yang boe i agens long papa blong hem mo yang gel i agens long mama blong hem, mo yang woman i agens long mama blong man blong hem.” (Matiu 10:35) ?Olsem wanem? ?Jisas i wantem talem se ol tijing blong Baebol oli blong mekem trabol i kamaot nomo? Nogat. Hem i stap talem wanem samting i save kamaot taem ol memba blong famle oli gat nogud tingting long hemia we i holemstrong long bilif we i defren long bilif blong olgeta.
?Olsem wanem? ?Wan man i mas mekem enikaen samting we famle i wantem blong blokem ol raorao long famle? Baebol i talem se ol pikinini oli mas obei long papa mama blong olgeta mo ol waef oli mas stap aninit long hasban blong olgeta. (Efesas 5:22; 6:1) Be Baebol i tijim olgeta we oli lavem God se fastaem oli ‘mas obei long God, oli no save obei long man.’ (Ol Wok 5:29) Taswe, fasin blong stap tru long God, maet i pusum yu blong mekem wan desisen we i save pulum sam memba blong famle blong oli no moa glad long yu.
Nating we Baebol i makem klia ol tru mo ol giaman tijing, God i letem ol man wanwan oli jusum samting we bambae oli mekem. (Dutronome 30:19, 20) I nogud blong fosem wan man blong joen long wosip we hem i no glad long hem, mo i nogud blong fosem hem blong tanem baksaed long famle blong hem blong folem wan bilif. ?Olsem wanem? ?Sipos wan memba blong famle i stadi Baebol, samting ya bambae i seraotem famle? Nogat. Baebol i talem long waef mo hasban we tufala i folem defdefren bilif, se tufala i mas stap tugeta olsem wan famle.—1 Korin 7:12, 13.
Winim Fasin Fraet
Maet yu fraet se ol man long vilej bambae oli agensem yu sipos yu yu stadi Baebol wetem ol Witnes blong Jeova. Mariamma i talem se: “Famle blong mi i wari se bambae mi no moa save faenem wan gudfala hasban we i save lukaot gud long mi. Ale, oli agensem mi from we mi mi stadi Baebol.” Mariamma i trastem Jeova God mo hem i gohed blong stadi Baebol. (Ol Sam 37:3, 4) Yu yu save mekem sem mak. I moagud we yu tingbaot ol blesing we yu save kasem, i bitim we yu fraet from ol trabol we oli save kamaot. Ol tok blong Baebol oli save jenisim laef mo ol fasin blong yumi, oli kam moa gud. Yumi lanem blong soem trufala lav long famle blong yumi. Yumi save winim ol nogud fasin olsem fasin blong tok nogud long man mo blong kilim man, mo dring tumas alkol mo yusum drag. (2 Korin 7:1) Baebol i leftemap ol gudfala fasin olsem fasin blong stap tru, mo fasin blong no giaman, mo blong wok strong. (Proveb 31:10-31; Efesas 4:24, 28) I gud blong stadi Baebol mo luk ol blesing we yu kasem sipos yu folem ol tijing blong hem long laef blong yu.
?YU YU BIN TINGBAOT?
◼ ?From wanem i gud we yu jekemap skul blong yu?—Ol Proveb 23:23; 1 Timoti 2:3, 4.
◼ ?Olsem wanem blong luksave ol trufala tijing?—2 Timoti 3:16; 1 Jon 4:1.
◼ ?Olsem wanem? ?I stret we yu letem fasin agens blong famle i blokem yu blong stadi Baebol?—Ol Wok 5:29.
[Tok blong makem poen long pej 21]
Ol tok blong Baebol oli save jenisim laef mo ol fasin blong yumi, oli kam moa gud
[Tok blong pija long pej 21]
Mariamma mo hasban blong hem