Baebol i Talem Wanem

?Yumi Save Lavem Ol Enemi Blong Yumi?

Jisas i talem se: “Mi mi talem long yufala, se yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala. Long fasin ya, bambae yufala i soemaot we yufala i pikinini blong Papa blong yufala long heven, from we hem i stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.”​—Matiu 5:44, 45.

?YU YU luk we ol skul i pulum man blong soem lav mo gat pis, no i pulum man blong i no laekem narafala man mo mekem ol raf fasin? Tede plante man oli luk se lashaf blong kwestin ya i stap kamaot moa, speseli taem ol skul i joen long politik, leftemap wan kantri laen mo kala, se i moa gud bitim narafala. Be olsem tok blong Jisas i soemaot, olgeta we oli trufala ‘pikinini blong God’ oli folem fasin blong God blong soem lav long ol man wetem ol enemi blong olgeta tu.

Wan narafala man blong God i talem se: “Sipos wan enemi blong yu i hanggri, yu mas givim kakae long hem. Sipos hem i tosta, yu mas givim wota long hem . . . Bambae yufala i no letem ol rabis fasin i winim yufala. Yufala i mas holemstrong ol stret fasin blong yufala, blong winim ol rabis fasin.” (Rom 12:20, 21) ?Be ol man oli save soemaot lav olsem, long wol ya we ol man oli seseraot? !Ol Witnes blong Jeova oli ansa strong mo klia se yes! Tingbaot eksampol blong Jisas mo ol faswan disaepol blong hem.

Oli Lavem Ol Enemi Blong Olgeta

Jisas i tijim ol samting we i tru long saed blong God, mo plante man oli harem gud blong lesin long hem. Be ol narafala man, oli agensem Jisas, maet oli mekem olsem from we oli no rili lesin gud long hem, mo maet from we oli bilivim ol giaman toktok we ol enemi blong Jisas oli talem agensem hem. (Jon 7:12, 13; Ol Wok 2:36-38; 3:15, 17) Nating se i olsem, Jisas i gohed nomo blong talemaot tok we i save sevem laef blong plante man, wetem ol man we oli agensem hem tu. (Mak 12:13-34) ?From wanem? Hem i save se samfala maet oli jenisim fasin blong olgeta, oli luksave we hem i Mesaea, mo mekem ol samting we i laenap wetem ol trutok we i stap long Tok blong God.​—Jon 7:1, 37-46; 17:17.

Mo long naet we ol man blong agens oli raonem Jisas, hem i soem se hem i lavem ol enemi ya. Yes, Jisas i hilim wan man we i kam blong holemtaet hem, we aposol Pita i katemaot sora blong hem wetem wan naef blong faet. Long taem ya, Jisas i talem wan stamba rul we i impoten tumas we ol man blong hem oli stap folem kam kasem tede. Hem i talem se: “Man we i stap tekem naef blong faet, hem bambae i ded long naef blong faet.” (Matiu 26:48-52; Jon 18:10, 11) Samwe 30 yia biaen, Pita i raetem se: “Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem . . . Taem oli mekem hem i harem nogud tumas long bodi blong hem, hem i no talem se bambae i givimbak fasin ya long olgeta. Hem i putum tingting blong hem i stap strong long God.” (1 Pita 2:21, 23) I klia we Pita i lanem se lav, be i no fasin blong givimbak, we i fasin blong ol trufala man blong Kraes.​—Matiu 5:9.

Ol man we oli ‘biaen long Jisas’ oli mas gat fasin blong Jisas blong lavem mo mekem i gud long enemi blong olgeta. Long 2 Timoti 2:24 (NW) yumi ridim se : “Wan slef blong Masta i no mas faet. Hem i mas kaen gud long evriwan . . . Mo taem i gat trabol i kamaot, hem i mas bos long tingting blong hem.” Hemia nao ol fasin we oli kamaot klia nomo long fasin blong laef blong wan Kristin we hem i man blong mekem pis, mo i wantem oltaem blong fren gud wetem ol man.

Ol Man Blong “Karem Tok Blong Kraes” Oli Man Blong Mekem Pis

Aposol Pol i raet i go long ol Kristin brata sista se: “Mifala i man blong karem tok [“ambasada,” NW] blong Kraes . . . Long nem blong Kraes, mifala i talem long yufala se, ‘Plis, . . . yufala i no moa enemi blong [God], yufala i kam fren blong hem.” (2 Korin 5:20) Long wol tede, ol man blong karem tok no ol ambasada, oli no joen long politik mo ol wok blong ami long kantri we oli stap wok long hem. Oli no joen long ol raorao blong kantri ya. Wok blong olgeta i blong talemaot mo toktok long bihaf blong gavman blong olgeta.

Samting ya i tru tu long ol man we oli karem tok blong Kraes mo oli ambasada blong Kraes. Oli luk Jisas se hem i King blong olgeta mo oli sapotem Kingdom blong hem long heven taem oli go talemaot gud nius wetem kwaet fasin. (Matiu 24:14; Jon 18:36) Taswe, Pol i raet i go long ol Kristin long taem blong hem se: “Ol samting ya we mifala i stap yusum blong faet, oli no samting blong faet blong wol ya. Mifala i stap yusum ol samting blong faet blong God, we oli naf blong brekemdaon . . . ol giaman toktok we ol man oli stap talem blong blokem ol trutok. Mo . . . olgeta samting we ol man oli stap stanemap long flas blong olgeta, we oli blong blokem ol man blong oli no save God.”​—2 Korin 10:3-5; Efesas 6:13-20.

Taem Pol i raetem ol tok ya, ol man oli stap agensem ol Kristin long plante ples. I tru se, sipos oli wantem, oli save givimbak long ol man ya we oli stap agensem olgeta. Be oli no mekem olsem. Oli gohed blong lavem ol enemi blong olgeta mo oli talemaot tok blong kam fren gud bakegen wetem olgeta man we oli save lesin. Buk ya Encyclopedia of Religion and War i talem se: “Ol faswan disaepol blong Jisas oli no joen long faet mo wok blong ami,” oli luksave se ol fasin ya “i no laenap wetem rul blong lav we Jisas i talem mo i no laenap tu wetem oda ya blong lavem ol enemi.”a

Ol Witnes blong Jeova tede oli mekem olsem ol faswan Kristin ya. Olgeta tu oli luk Jisas se hem i King blong olgeta. Oli luksave se hem i King long Kingdom blong God​—wan gavman long heven we bambae i no longtaem i karem trufala pis mo seftaem i kam long wol. (Daniel 2:44; Matiu 6:9, 10) Yes, olsem ol man blong karem ol tok mo ol ambasada, ol Witnes oli talemaot ol gudgudfala wok blong Kingdom ya. Long semtaem, oli traehad blong stap olsem wan gudfala sitisen blong kantri we oli stap long hem, oli pem takis blong olgeta, mo obei long loa taem loa ya i no go agensem loa blong God.​—Ol Wok 5:29; Rom 13:1, 7.

Sore tumas, be olsem long taem blong ol faswan Kristin, ol man oli gat rong tingting long ol Witnes, oli talem ol giaman tok long saed blong olgeta, mo oli mekem i nogud long olgeta. Be ol Witnes oli neva givimbak nogud fasin ya. Defren olgeta, oli traehad blong gat “pis wetem olgeta man.” Oli mekem olsem from we oli gat tingting ya se samfala we oli agens maet oli save “fren gud wetem God bakegen” mo gat janis blong kasem laef ya we i no save finis.b​—Rom 12:18; Jon 17:3.

[Ol futnot]

?YU YU BIN TINGBAOT?

◼ ?Ol Kristin oli mas mekem olsem wanem long ol enemi blong olgeta?​—Matiu 5:43-45; Rom 12:20, 21.

◼ ?Jisas i mekem wanem taem ol man oli agensem hem?​—1 Pita 2:21, 23.

◼ ?From wanem ol faswan Kristin oli no joen long faet?​—2 Korin 5:20; 10:3-5.