?From Wanem Ol Witnes Blong Jehova Oli No Joen Long Ol Faet?
Ol Witnes blong Jehova oli no joen long ol faet from ol risen ya:
Mifala i obei long God. Baebol i talem se ol man blong God bambae oli “hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef.” Mo “bambae oli no moa save girap blong go kilim ol narafala man.”—Aesea 2:4.
Mifala i obei long Jisas. Jisas i talem long aposol Pita se: “Yu putumbak naef blong yu long paos blong hem. Man we i stap tekem naef blong faet, hem bambae i ded long naef blong faet.” (Matiu 26:52) Jisas i stap talem se ol man blong hem bambae oli no save yusum ol tul blong faet.
Ol disaepol blong Jisas oli obei long tok blong hem se oli “no man blong wol ya.” Taswe, oli no joen nating long politik. (Jon 17:16) Oli no mekem wan samting blong traem blokem ol ami we oli faet, mo oli no blokem ol man we oli jusum blong joen long ami.
Mifala i lavem ol narafala man. Jisas i talem long ol disaepol blong hem se oli mas ‘lavlavem olgeta.’ (Jon 13:34, 35) Olgeta oli olsem wan famle long fulwol. Neva bambae oli go mekem faet long ol brata mo sista blong olgeta.—1 Jon 3:10-12.
Ol Kristin bifo oli soemaot eksampol. Buk ya Encyclopedia of Religion and War i talem se: “Ol man blong Jisas bifo oli no joen long ami mo oli no go mekem faet.” Olgeta oli luksave se fasin ya i agensem “ol tok blong Jisas se oli mas lavlavem olgeta mo oli mas lavem ol enemi blong olgeta.” Wan man Jemani we i stadi long ol tijing blong jos, nem blong hem Peter Meinhold, i tokbaot ol disaepol blong Jisas, se: “Oli no save stap olsem ol Kristin mo joen long ami tu.”
Oli mekem wok blong givhan long vilej
Ol Witnes blong Jehova oli mekem wok blong givhan long vilej blong olgeta. Mifala i no denja long ol man no long kantri blong mifala. Mifala i respektem gavman, olsem Baebol i talem, se:
“Yumi evriwan i mas ona long gavman.”—Rom 13:1.
“Samting we i blong Sisa, yufala i givimbak long Sisa. Mo samting we i blong God, yufala i givimbak long God.”—Matiu 22:21.
Taswe, mifala i obei long loa, mifala i pem takis, mo mifala i no agensem ol wok blong gavman blong traem mekem laef blong ol man i kam gud moa.