?Wanem Kaen Sta i Lidim Ol “Man We Oli Waes” i Go Long Jisas?

Ol stori long saed blong Krismas oli tokbaot sta ya se i wan gudfala saen we i kam long heven. ?Samting ya i tru?

◼ Matiu we i raetem wan buk blong Baebol, i talem se sam “man we oli waes,” we oli kamaot long wan kantri blong Is, oli luk sta ya we biaen i lidim olgeta i go long pikinini ya Jisas. (Matiu 2:1-12) Ol stori we oli tokbaot Krismas oli soemaot se sta ya i wan gudfala saen we i kam long heven. Wan buk i tokbaot sta ya se hem i haf blong wan “plan we God i rerem finis blong mekem se . . . hem we i Papa, hem i ona mo i luksave bebi ya Jisas olsem Pikinini blong hem we hem i lavem tumas.” Ol singsing blong Krismas tu oli ona long sta ya. ?Sta ya i wanem samting?

Samfala oli talem se hemia wan sta nomo olsem ol narafala sta. Plante man blong stadi oli talem se hem i wan grup blong ol planet we oli joen tugeta. Be wan buk (The New Bible Dictionary) i soemaot se “sipos samting olsem i hapen, yumi no save talem se hemia ‘wan sta.’” Sipos plante planet oli pas kloklosap long olgeta, bambae yumi luk laet blong wanwan long olgeta, be i no laet blong wan sta nomo. Samfala oli talem se sta ya i wan komet no wan bigfala sta we i bosta, nao laet blong hem i saen bigwan. Be i no gat wan long ol samting ya we i save muv olbaot long skae blong lidim ol man i go stret long wan taon, mo biaen, stop stret antap long wan haos.

?Olsem wanem? ?Sta ya i sem mak olsem ol narafala sta nomo, no God i mekem i kamaot? Tingbaot ol samting ya: Ol “man we oli waes” ya oli no ol man we tede yumi talem se oli gat hae edukesen, mo tu oli no ol king. Ol man ya oli ol man we tede yumi kolem “ol man blong stadi long ol sta blong talemaot fiuja.” Oli stap mekem wan wok we Baebol i putum tabu long hem. (Dutronome 18:10-12) Makemgud se ol man ya nomo we oli stap stadi long ol sta, oli “luk” sta ya. Sipos sta ya i sem mak olsem ol narafala sta long skae, bambae plante man oli save luk laet blong hem. Be nogat, King Herod tu i mas askem plante kwestin long ol man ya long saed blong sta ya. Sta ya i lidim ol man ya i go fastaem long Jerusalem, long Herod we i wan bigfala enemi blong Mesaea. Herod i wantem kilim bebi Jisas i ded. Biaen, sta ya i jenisim rod blong hem mo i lidim ol man ya i go long saot, long ples we Jisas i stap long hem long Betlehem. Naoia laef blong Jisas i stap long denja.

Ol save ya oli soemaot se wan rabis samting nao i mekem we sta ya i kamaot, mo i klia se Devel Setan nao i mekem samting ya. Baebol i tokbaot Setan se hem i stap yusum “ol giaman saen mo ol samting blong sapraes.” (2 Tesalonaeka 2:9) Taswe ol trufala Kristin oli no mas sapraes se Setan i save mekem we ol man ya nomo we oli stap stadi long ol sta, oli naf blong luk wan samting we i saen olsem wan sta. Mo Setan i naf blong muvum “sta” ya i go long Pikinini ya blong God, we hem i wantem spolem. Be i no gat wan man we i naf blong trikim Jeova God. From samting ya, yumi no sapraes se plan ya blong Setan blong kilim bebi Jisas, i no wok.

Be i gud tumas blong luk we God i bin talemaot se Jisas bambae i bon from wan merikel. Long naet ya we Jisas i bon, wan enjel i kamtru long wan grup blong ol man blong lukaot long sipsip, mo i talemaot se wan pikinini i jes bon, we ‘hem bambae i sevem olgeta.’ Enjel ya i talemaot stret ples we Jisas i stap long hem, nao ol man ya blong lukaot long ol sipsip oli save go luk hem. Biaen, wan bigfala grup blong ol enjel oli kamtru mo oli singsing blong presem God. (Luk 2:8-14) God i yusum ol enjel ya blong talemaot long ol man se Jisas i bon, be hem i no yusum sta.