Japta 7

Jisas Mo Sam Man Blong Lukluk Long Sta

I GAT sam man we oli aot long saed long Is, oli kam. Olgeta ya oli man blong lukluk long sta. Oli talem se oli save talemaot mining blong ples we ol sta wanwan oli stap long hem. Taem oli stap yet long Is, oli luk wan defren sta. Nao oli folem sta ya plante handred kilomita gogo oli kasem Jerusalem.

Taem ol man ya oli kam long Jerusalem, oli askem se: “?Pikinini ya we i jes bon, we hem i king blong ol man Isrel, hem i stap wea? Mifala i luk sta blong hem finis we i kamaot long is, nao mifala i kam blong leftemap nem blong hem.”

Taem King Herod blong Jerusalem i harem ol tok ya, hem i kros. Nao hem i singaot ol jif pris wetem ol tija blong loa, oli kam luk hem. Nao hem i askem long olgeta se: ‘?Bambae Kraes i bon long weples?’ Oli givim ansa we i stanap long Baebol nomo, oli se: “Long velej ya Betlehem.” Nao Herod i singaot ol man blong lukluk long sta blong oli kam tok wetem hem. Hem i talem long olgeta i se: “Yufala i mas go lukaot pikinini ya, gogo yufala i faenem. Mo taem yufala i faenem, yufala i mas sanem tok i kam long mi, blong mi tu bambae mi go leftemap nem blong hem.” !Be Herod i stap gyaman! !Hem i wantem faenem pikinini ya blong kilim hem i ded nomo!

Taem ol man ya oli aot finis, wan samting blong sapraes i kamaot. Sta ya we oli bin luk taem oli stap long Is, i stap go fastaem long olgeta. I klia se sta ya i wan spesel sta, we i blong lidim olgeta. Ale oli stap folem sta ya gogo i kasem haos we Josef mo Meri tufala i stap long hem.

Taem ol man blong lukluk long sta oli go insaed long haos ya, oli luk Meri wetem smol pikinini blong hem, Jisas. Nao oli nildaon long hem. Oli openem ol basket blong olgeta, oli tekemaot ol presen blong givim long hem. Oli givim gol wetem sam kaen senta, nem blong hem frangkinsens, wetem pomad we nem blong hem mir. Afta, oli rere blong gobak long Herod, blong talemaot long hem weples pikinini ya i stap long hem. Be God i tok long olgeta long wan drim, i blokem olgeta blong oli no gobak. Ale oli folem wan narafala rod, oli gobak long ples blong olgeta nomo.

?Long tingting blong yu, hu i mekem sta ya i muf long skae blong lidim ol man blong lukluk long sta? Tingbaot we sta ya i no lidim olgeta oli go stret long Jisas long Betlehem. No gat. Fastaem hem i lidim olgeta oli go long Jerusalem. Long ples ya oli luk King Herod, man ya we i wantem kilim Jisas i ded. Mo hem i save mekem olsemia. Be God i blokem ol man blong lukluk long sta. Hem i givim woning long olgeta blong oli no gobak long Herod, oli no talemaot long hem weples Jisas i stap long hem. Enemi blong God, Devel Setan, hem i wantem kilim Jisas i ded. Hem nao i yusum sta ya blong traem mekem olsemia. Matyu 2:1-12; Maeka 5:2.

▪ ?Wanem i soemaot se sta ya we ol man blong lukluk long sta oli luk, i wan spesel sta?

▪ ?Ol man blong lukluk long sta oli faenem Jisas long weples?

▪ ?From wanem yumi talem se Setan i yusum sta ya blong lidim ol man blong lukluk long sta?