Baebol i Talem Wanem

Frenem Wan Boe No Wan Gel Wetem Tingting Ya Blong Mared

Julie i gelfren blong Lee. Tufala i tekem desisen se bambae tufala i holem fasin we i klin.a Be wan naet, taem tufala i stap tufala nomo, ol filing blong seks oli kam antap. I gud se gudfala tingting i kambak long tufala, bifo we tufala i go moa, mo mekem wan bigfala sin.

TRUFALA wosip i no blong go nomo long jos evri wik, be hem i moa. Hem i wan rod blong laef we i mekem se man i gat ol gudfala fasin mo i folem ol rul blong stret fasin. Jisas Kraes i talem se olgeta ya we oli stap ‘mekem ol samting we God i wantem,’ olgeta ya nomo God bambae i glad long olgeta. (Matiu 7:21) Blong mekem God i glad, wan boe mo wan gel tufala i mas fren long fasin we i klin mo wetem tingting ya se bambae tufala i mared.

Tede i gat plante samting we i save pulum ol man mo woman blong sakemaot ol klin fasin long saed blong seks. Taswe, taem yu stap frenem wan boe no wan gel, ?olsem wanem yutufala i save gohed blong holem klin fasin long fes blong God? Faswan samting se, yu mas luksave we ol rul ya we God i givim oli blong mekem i gud tumas long yu. Namba tu samting hemia se, yu mas kasem save we yu yu wan sinman. Namba tri samting se, yutufala i mas putum sam rul we yutufala i save folem blong no bitim mak. Mo namba fo, hemia se taem yutufala i stap fren, yutufala wanwan i mas stap klosap long God. Tingbaot ol wanwan poen ya.

Ol Rul We Oli Stret Gud Blong Givhan Long Yumi

Long Aesea 48:17, 18, yumi ridim se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem. Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.”

Yes, ol rul mo ol advaes we oli stap long tok blong God Baebol, oli blong givhan long yumi. (2 Timoti 3:16, 17) Hemia i soemaot se, God ya we i wokem yumi hem i kea bigwan long yumi, i wantem we yumi glad mo yumi win long evri samting long laef blong yumi. (Ol Sam 19:7-10) ?Hemia filing blong yu tu? Sipos i olsem, yu stap soemaot trufala waes.

Kasem Save Se Yu Yu Wan Sinman

Wan trufala fren, oltaem hem i save talem ol trutok long yumi, long saed blong yumi. Jeova i no defren, hem i tok tru tu long yumi. Tingbaot woning we Jeova i givim long yumi, we i stap long Tok blong hem se: “?Hu man i save savegud tingting [“hat,” NW] blong man? Oltaem nomo, tingting [hat] blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.” (Jeremaea 17:9) Baebol i talem tu se: “Man we oltaem i stap folem tingting [“hat,” NW] blong hem nomo, hem i krangke we i bitim mak. I moa gud yu stap folem tok blong ol waes man, we oli stap tijim yu long hem.”—Ol Proveb 28:26.

?Olsem wanem wan boe mo wan gel we tufala i stap fren, tufala i stap soemaot we tufala i trastem hat blong tufala nomo? Wan rod, hemia taem tufala i stap tufala nomo long wan ples we ol filing blong tufala i save kam antap bitim mak, sem mak olsem Julie mo Lee we yumi tokbaot finis. Wan narafala rod, hemia taem tufala i sakemaot ol waes advaes blong papa mama blong tufala we oli onagud long God. Ol papa mama oli save se ol filing blong seks oli strong tumas, speseli long ol yangfala. Ol filing ya oli olsem wan trak we i spid we i spid, mo sipos yu no kontrolem gud, bambae yu save kasem wan aksiden.

Taswe ol yangfala we oli folem “tok blong ol waes man” we i kamaot long God, oli tinghevi long ol advaes blong papa mama blong olgeta. Yes, samtaem ol papa mama we oli gat lav, oli givim advaes we oli save se boe no gel blong olgeta bambae i no wantem harem. Nating se i olsem, ol yangfala ya oli stap tingting dip long ol advaes ya. I tru, papa blong yu long heven, Jeova God, i lavem yu moa i bitim olgeta narafala man mo hem i givim advaes ya se: “I nogud yufala i letem wan samting i mekem yufala i tingting tumas, no i mekem yufala i harem nogud long bodi blong yufala.” (Prija 11:9, 10) ?Olsem wanem yu save mekem samting ya? Yu no mas mekem ol samting we yu nomo yu wantem, we oli no stret.

Putum Sam Rul Blong Folem

“Olgeta we oli toktok gud tugeta fastaem oli waes.” (Ol Proveb 13:10, NW) Wan boe mo wan gel we tufala i waes, tufala i folem advaes ya taem tufala i stat blong fren. Tufala i mas putum sam rul we oli laenap wetem Baebol long fasin blong holholem han, mo kiskis, mo tufala i mas holem strong tingting blong no brekem ol rul ya. Sipos yutufala i bitim mak blong soemaot ol filing blong yutufala, mo trastem yutufala tumas, hemia i wan bigfala denja, olsem taem yu draevem wan trak be yu no lukaot gud. I let tumas blong mekem wan desisen se bambae yu draev gud, taem oli stap tekemaot yu long wan trak we i aksiden finis.

Baebol i talem se: “Man [woman] we i gat gudfala tingting i save luksave we trabol i stap kam, nao i save ronwe long hem, be man [woman] we i no save tingting gud, hem i save letem trabol i kam, i kasem hem, we biaen i sore from.” (Ol Proveb 22:3) Wan boe mo wan gel we tufala i stap fren, tufala i save blokem plante trabol. Tufala i save mekem olsem taem tufala i kampani oltaem long wan grup blong plante man, sipos no, oltaem i mas gat wan we i stap wetem tufala. Sipos yutufala i mekem nogud fasin, hemia bambae i mekem se tingting blong yutufala i no moa klin. Bambae yu yu ting nating long yu wan, mo bambae yu ting nating long boefren no gelfren blong yu tu. Mo bambae yutufala i mekem bigfala sem long yutufala mo long famle blong yutufala. Taswe yutufala i mas gat gudfala tingting, mo agri blong folem ol rul blong Baebol mo mekem ol rul ya oli wok long laef blong yutufala.

Mekem Jeova i Kam Namba “Tri Rop”

Mared hem i olsem tri rop we oli tantanem wanples, mo God i olsem namba tri rop ya. Prija 4:12 i talem se: “Rop ya we oli tantanem tri rop i go wanples, hem i no save brok kwik.” Semfala advaes ya i go tu long ol boefren mo gelfren. Sipos wan boe mo wan gel, tufala i wantem kasem blesing blong God long fasin fren blong tufala, tufala wanwan i mas stap klosap long God. Ol Sam 1:1-3 i talem se: “Olgeta we oli no wantem folem toktok blong ol man nogud, . . . olgeta ya oli save harem gud. Ol man olsem, oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet . . . long sem fasin, ol man ya tu oli stap win long evri samting we oli stap mekem.”

Yes, blong wan man i rili win gud long laef blong hem, hem i mas mekem ol samting we Jeova i glad long hem, antap moa taem hem i stap frenem wan boe no wan gel mo i mared. Olgeta filing we yumi gat long wan boe no wan gel, mo mared tu, oli ol gudfala presen we God ya we i wokem yumi, Jeova, i givim. From samting ya, yumi mas tinghae long olgeta.—Jemes 1:17.

[Futnot]

?YU YU BIN TINGBAOT?

● ?Olsem wanem yumi save se, God i wantem mekem i gud long yumi?—Aesea 48:17, 18.

● ?Wanem trutok long saed blong yumi, we yumi mas kasem save long hem?—Jeremaea 17:9.

● ?Wanem rod blong wingud, taem yu stap frenem wan boe no wan gel, mo biaen long mared?—Ol Sam 1:1-3.

[Tok blong pija long pej 15]

Wan boe mo wan gel we tufala i waes, tufala i mas putum sam rul we oli laenap wetem Baebol taem tufala i stat blong fren. Hemia ol rul long saed blong fasin blong holholem han mo kiskis. Mo tufala i mas holem strong tingting blong no brekem ol rul ya