Strong Tingting Blong Lego

“Wan fasin we ol man blong smok oli mas gat blong oli save lego smok fulwan, hemia se oli mas mekem wan klia desisen blong lego, mo oli mas gat strong tingting blong folem desisen ya.”—“Stop Smoking Now!”

WAN samting we yu mas gat, hemia strong tingting blong lego smok. ?Wanem i save givhan long yu blong yu gat strong tingting blong lego smok? Wan rod, hemia blong tingbaot ol gudfala samting we oli kamaot taem yu lego.

Bambae yu sevem mane. Man we i smok wan paket sigaret evri dei i westem bitim handred taosen vatu evri yia. “Mi neva luksave hamas mane mi stap westem long tabak.”—Gyanu, Nepal.

Bambae yu harem gud bigwan long laef. “Taem mi lego smok, i olsem we mi statem wan niufala laef, mo i stap kam moa gud oltaem.” (Regina, Saot Afrika) Taem ol man oli lego smok, oli save harem bakegen tes blong ol kakae mo harem smel blong ol samting, bodi blong olgeta i gat moa paoa, mo bodi blong olgeta i kam naes.

Bambae helt blong yu i gud. “Taem ol man mo woman oli lego smok, kwiktaem nomo samting ya i givhan bigwan long helt blong olgeta, nomata oli yangfala no olfala.”—The U.S. Centers for Disease Control and Prevention.

Bambae yu save tinghae moa long yu wan. “Mi no moa smok from we mi no wantem we tabak i kam bos blong mi. Mi wan mi wantem bos long bodi blong mi.”—Henning, Denmak.

Bambae famle mo ol fren blong yu oli save harem gud. “Smok . . . i spolem helt blong olgeta we oli stap raonabaot long yu. . . . Ol stadi long saed ya oli soemaot se, evri yia, plante taosen man oli ded from smok blong sigaret blong narafala man, we i givim kansa blong waet leva mo sik blong hat long olgeta.”—American Cancer Society.

Bambae yu mekem Man we i Wokem yu i glad. “Ol fren. . . . Yumi mas mekem yumi klin. Olgeta samting long bodi blong yumi . . . we oli stap mekem yumi doti long fes blong God, yumi mas sakemaot olgeta evriwan.” (2 Korin 7:1) “Yufala i mas givim olgeta laef blong yufala . . . olsem wan sakrefaes. Hemia i wan sakrefaes we i . . . tabu, mo we God i glad blong tekem.”—Rom 12:1.

“Taem mi kasem save se God i no laekem nating ol samting we oli save spolem bodi blong man, mi mekem desisen blong lego smok.”—Sylvia, Spen.

Be plante taem, strong tingting nomo i no naf. Maet yumi nidim tu we ol narafala, olsem famle mo ol fren blong yumi, oli halpem yumi. ?Olgeta ya oli save mekem wanem?