Yu Mas Glad Long Kala Blong Skin Blong Yu

● Sam man long Afrika, Saot Esia, ol aelan blong Karibin, mo long Medel Is, oli ting se man we i laetskin i gat plante samting, mo se hem i naes. From samting ya, plante man mo woman long ol ples ya, oli stap yusum ol krim blong traem jenisim kala blong skin blong olgeta i kam laet moa. Be samting ya i mekem bigfala trabol long helt blong plante long olgeta.

Sam long ol krim ya, i gat hydroquinone insaed long olgeta. Hem i wan kaen losavel, we i save daonem wan wok we bodi blong man i stap mekem. Bodi i wokem wan samting we oli kolem melanin blong protektem skin long laet blong san we oli kolem ultraviolet (UV). Be krim ya i spolem wok ya. Hydroquinone i go insaed long skin mo i save spolem plante samting long ol sela blong bodi. Frut we i kamaot hemia se man i no kam olfala yet, be skin blong hem i luk olsem skin blong olfala finis. Kemikol ya i save mekem kansa i kamaot tu. Sam narafala krim, insaed long olgeta i gat wan narafala posen bakegen we nem blong hem mercury.

Antap long hemia, sipos man i stap gohed blong yusum ol krim ya, oli save mekem se skin blong hem i skras, mo hem i save kasem ol mak we oli spolem gud skin blong hem mo oli no naes nating blong luk. Mo krim ya i save mekem se skin blong hem i kam slak, nao taem hem i katem hem be dokta i no save somap from we skin i no moa strong naf blong holem ol tred. Mo sipos sam kemikol long ol krim ya oli go insaed long string blong blad, hemia i save spolem leva, kidni, no bren blong ol man ya. Mo i save mekem se sam haf insaed long bodi blong olgeta tu oli no moa wok.

Samting we i narakaen se, sam blak man oli wantem mekem skin blong olgeta i kam laet moa, be plante waetman oli traehad blong mekem skin blong olgeta i kam braon. I tru se, taem man i stap long san smoltaem nomo hemia i gud long helt, from se san i save givhan long bodi blong wokem vitamin D. Be taem man i stap longtaem tumas long san, speseli long medel dei, hemia i save spolem skin. Waetman we skin blong hem i kam braon, hemia i soemaot se san i spolem skin blong hem finis. Braon kala ya i soemaot se skin i stap traem blong protektem hem wan bakegen long laet blong san ya we oli kolem UV, blong i no spolem hem moa. Be skin i save protektem hem wan go kasem wan mak nomo. Traem tingbaot, wan man we fastaem skin blong hem i waet be naoia skin blong hem i kam dak braon. Samting we bodi blong hem i save wokem blong protektem skin blong hem long san i smol nomo, i no naf. Taem man ya i yusum krim blong blokem san hemia i save givhan moa, be i no protektem skin blong hem fulwan long san. Taswe hem i save kasem yet sam kaen kansa, wetem kansa blong skin we oli kolem melanoma.

Wol Helt Ogenaesesen i talem se: “Yumi mas strong moa blong talemaot se evri man oli mas glad long kala blong skin blong olgeta.” Hemia nao “wan impoten samting we i save pulum ol man blong lukaotgud blong no stap longtaem tumas long san.” Be olgeta we oli waes gud, oli putum tingting blong olgeta i stap long advaes blong Baebol, we i talem se oli mas ‘mekem fasin blong olgeta i stret gud’ i bitim we oli traehad blong gat wan naes bodi. !Taem ol yia oli stap pas, skin blong man i stap kam olfala, be fasin blong hem i save kam gud moa!—1 Pita 3:3, 4; Ol Proveb 16:31.

[Futnot]