Baebol i Talem Wanem

?Yu Yu Mas Pem Ol Man We Oli Wok Long Saed Blong Jos?

LONG plante kantri, sam lida blong ol skul we oli talem se oli Kristin mo ol skul we oli no Kristin, oli askem long ol man blong oli pem olgeta from ol wok we oli mekem long jos. Hemia wok blong mekem baptaes, mekem mared, mo taem oli mekem seves blong berem dedman. Mane we oli askem i save kasem plante taosen vatu.

Taem gavman i mekem wan seremoni mo i holem wan spesel miting, samtaem hem i pem ol lida blong jos blong oli givim sam toktok long saed blong God. Mo gavman i save pem olgeta tu, blong oli mekem sam kastom long saed blong jos, mo blong openem miting wetem wan prea. Maet ol man oli tinghae long wok ya we ol lida blong jos oli mekem, mo tu, maet oli tingbaot se jos i mas spenem mane blong pem ol samting olsem laet mo wota. ?Be olsem wanem? ?Baebol i agri long fasin ya blong pem ol man we oli wok blong jos, mo long fasin blong pulum ol man blong ting se hemia nao samting we oli mas mekem?

?“Wan Ples Blong Mekem Maket”?

Taem Jisas Kraes i stap long wol, ol lida blong skul blong ol man Jiu mo sam narafala, oli yusum ol lafet blong skul olsem wan janis blong kasem mane, antap moa long taem blong Pasova. ?Olsem wanem? ?Jisas i agri long samting ya? !Nogat! Baebol i talem se, “hem i kafsaedem ol tebol blong ol man ya we oli stap jenisim mane, mo i sakem ol mane blong olgeta i go olbaot.” Jisas i talem se: “!Yufala i tekem ol samting ya i go afsaed! !Yufala i no mekem haos blong Papa blong mi i kam olsem ples blong mekem maket!”—Jon 2:14-16.

Samting ya i bin kamaot finis long taem blong profet Maeka, long ol yia 700 B.K.T.a Baebol i tokbaot ol lida blong ol man Isrel se, “oli jajem man long fasin we i no stret.” Mo ol pris oli stap “talemaot mining blong ol loa blong God long ol man nomo we oli save pem olgeta from.” Be oli ting se God i stap givhan long olgeta yet, oli se: “Hae God i stap wetem yumi ya.” (Maeka 3:9, 11) Jeova God i no glad nating long samting we oli mekem. Taswe, hem i yusum profet blong hem blong talemaot rabis wok we oli mekem.

Tede, plante lida blong jos oli yusum semfala rod blong kasem mane. From samting ya, oli stap mekem haos blong wosip blong olgeta i kam olsem “ples blong mekem maket.” Blong talem stret, long fulwol ol jos ya oli stap mekem bisnes. Plante taem, oli stanemap ol bisnes blong salem ol pija mo plante defdefren kaen aedol blong wosip.b—1 Jon 5:21.

‘Yufala i Kasem Fri, Yufala i Givim Fri’

Taem Jisas i givim wok long ol aposol blong hem blong oli go talemaot gud nius, mo blong mekem ol sik man oli gud bakegen, mo mekem ol dedman oli laef bakegen, hem i talem se: “Paoa ya, yufala i kasem we yufala i no pem, mo yufala i mas yusum, we oli no pem yufala from.” (Matiu 10:7, 8) Yes, ol man blong Jisas oli no kasem mane from wok we oli mekem. Antap long samting ya, Jisas i soemaot rod long olgeta taem hem i mekem wok blong ol narafala, be i no askem mane long olgeta.

Aposol Pol i folem eksampol blong Jisas taem hem i mekem wok blong talemaot gud nius “we i fri nomo long olgeta.” (1 Korin 9:18) Taem Pol i mas pem samting, hem i somap haos tapolen blong winim mane. (Ol Wok 18:1-3) From samting ya, Pol mo ol fren blong hem we oli misinari, oli talem se: “Mifala i no olsem plante narafala man we oli stap yusum tok blong God olsem rod blong winim mane blong olgeta, nogat.” (2 Korin 2:17) ?Be olsem wanem kongregesen i kasem mane, maet blong pem no rentem wan haos blong mekem wosip long hem?

‘God i Lavem Man We i Givim Samting Long Gladhat’

Ol kongregesen blong ol Witnes blong Jeova oli dipen long presen mane nomo. Oli folem rul ya se: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Korin 9:7) Hemia nao risen from wanem ol Witnes oli no askem mane from ol buk we oli givimaot, no from wok ya blong mekem baptaes, mekem mared, mo taem oli mekem seves blong berem ol dedman. Oli no givim taet, mo long taem blong ol miting, oli no pasem plet i goraon blong man i putum mane long hem. Eni man we i wantem givim presen mane blong givhan long wok blong prij long fulwol, i save putum mane long ol bokis we oli stap long ol haos wosip blong olgeta.

Long fulwol, ol Witnes blong Jeova oli yusum ol presen mane nomo blong bildim ol Haos Kingdom, ol Haos Asembli, ol branj ofis, ol ples blong printim ol buk, mo blong givhan long ol man we oli kasem trabol long taem blong ol disasta. Sam oli givim smol presen mane nomo, olsem wido woman ya we Jisas i talem gudfala toktok long saed blong hem. (Luk 21:2) Sam narafala oli save givim moa. Be nomata hamas mane oli givim, sipos oli folem rul blong Baebol blong givim wanem we oli naf blong givim, oli harem gud, God i blesem olgeta, mo oli glad tru.—Ol Wok 20:35; 2 Korin 8:12.

[Ol futnot]

?YU YU BIN TINGBAOT?

● ?Jisas i talem wanem long olgeta we oli mekem bisnes long haos blong God?—Jon 2:14-16.

● ?Olsem wanem? ?Kristin aposol Pol i wantem se ol man oli pem hem from wok blong God we hem i mekem?—2 Korin 2:17.

● ?Jeova i glad taem man i givim presen long wanem fasin?—2 Korin 9:7.

[Tok blong makem poen long pej 23]

“!Yufala i no mekem haos blong Papa blong mi i kam olsem ples blong mekem maket!”—Jon 2:14-16