?Mane i kam wea blong sapotem wok blong ol Witnes?

Evri yia, ol Witnes blong Jehova oli printim mo givimaot plante milian Baebol mo ol buk we oli tokbaot Baebol. Long plante ples long wol, oli wokem ol branj ofis mo faktri blong printim buk. I gat plante taosen kongregesen we oli mekem miting long ol haos wosip we oli naes be oli no flas tumas. Oli kolem haos wosip blong olgeta se, Haos Kingdom. ?Be mane blong ol samting ya i kam wea?

Wok blong ol Witnes i stanap long presen mane nomo. (2 Korin 9:7) Long wan long ol fas Wajtaoa we oli printim long yia 1879, oli talem se: “Mifala i bilif se JEHOVA nomo i sapotem ‘Zion’s Watch Tower’ [hemia nem blong Wajtaoa long taem bifo]. Taswe neva bambae mifala i fosem no askem ol man, blong oli givim mane blong sapotem wok ya.” Tede, ol Witnes oli gat sem tingting yet.

Man we i wantem givim presen mane i save sanem i go stret long wan long ol branj ofis blong ol Witnes, no i save putum long bokis blong presen mane we i stap long Haos Kingdom. Ol Witnes oli no mekem taet, oli no pasem plet i goraon blong askem kleksen, mo oli no askem mane from ol buk mo wok blong olgeta. Oli no kasem pei taem oli prij mo oli tij insaed long kongregesen, mo taem oli bildim ol haos wosip. Jisas i talem se: “Yufala i kasem we yufala i no pem, mo yufala i mas yusum, we oli no pem yufala from.” (Matiu 10:8) Olgeta we oli wok long ol branj ofis mo hedkwota, wetem Hed Kampani tu, oli no kasem pei.

Ol Witnes oli yusum ol presen mane tu, blong givhan long taem blong disasta. Ol Kristin long taem bifo, oli glad blong givim samting we ol narafala Kristin oli nidim, taem oli kasem trabol. (Rom 15:26) Long sem fasin, ol Witnes oli givhan long ol narafala Witnes long taem blong disasta. Oli wokem bakegen haos blong olgeta mo ol haos wosip, mo oli givim klos, mo kakae, mo meresin long olgeta.