?Wanem Bilif Blong Ol Witnes Blong Jeova?
Ol Witnes blong Jeova oli no haedem bilif blong olgeta. Ol man oli save ridim ol buk blong olgeta long plante handred lanwis. Ol haf we oli kam biaen oli eksplenem long sot toktok nomo, ol stamba bilif blong ol Witnes.
1. Baebol Ol Witnes oli bilif se “olgeta tok blong Baebol oli kamaot long God fastaem.” (2 Timoti 3:16) Jason D. BeDuhn i wan tija we i stadi long saed blong ol jos. Hem i raetem se: “Ol tijing blong [ol Witnes blong Jeova] mo fasin blong olgeta blong mekem wosip, i stanap long ol save blong Baebol stret. Oli lukluk long Baebol fastaem, ale oli folem wanem we Baebol i talem.” Oli meksua se ol bilif blong olgeta i laenap wetem Baebol, oli no traem tanem ol tok blong Baebol blong i folem tingting blong olgeta. Be oli luksave tu se, sam toktok blong Baebol oli pija no saen blong wan narafala samting. Hemia i tru long saed blong tok ya we Baebol i talem, se God i mekem skae mo graon long seven dei. Ol seven dei ya oli no ol dei blong 24 aoa, be oli minim wan longfala taem we i gat stat blong hem mo en blong hem.—Jenesis 1:31; 2:4.
2. God Ya We i Mekem Olgeta Samting God ya we i tru, i talemaot se nem blong hem, hemia Jeova (no Yahweh, olsem we Jerusalem Bible blong ol Roman Katolik i talem. Sam man tu we oli stadi long Baebol long taem blong yumi, oli yusum moa Yahweh). Nem ya i makemaot Jeova se hem i defren long ol giaman god.a (Eksodas 3:14, futnot) Nem ya long Hibru lanwis i stap samwe 7,000 taem long ol faswan hanraet blong Baebol. Taem Jisas i tijim ol disaepol blong hem olsem wanem blong prea, hem i soemaot se nem ya i impoten. Hem i prea long God se: “Nem blong yu i tabu.” (Matiu 6:9) God i wantem se ol man oli wosipim hem nomo, mo i stret nomo we hem i wantem olsem. Taswe ol Witnes oli no yusum ol aedol mo ol pija blong wosipim God.—Aesea 42:8.
3. Jisas Kraes Hem i Sevia blong yumi, “hem i Pikinini blong God,” mo “hem i stamba blong olgeta samting we God i mekem.” (Jon 1:34; Kolosi 1:15; Ol Wok 5:31) God i mekem Jisas Kraes, taswe Jisas i no haf blong Triniti. Jisas i talem se: “Papa blong mi, . . . hem i hae moa long mi.” (Jon 14:28) Jisas i stap long heven bifo we hem i kam long wol. Taem hem i stap long wol, hem i givim laef blong hem olsem wan sakrefaes, biaen i laef bakegen mo i gobak long heven. “I no gat man i save kam long Papa blong mi, sipos mi no tekem hem i kam.”—Jon 14:6.
4. Kingdom blong God Hemia wan gavman long heven we i gat King blong hem, Jisas Kraes, mo i gat 144,000 man we God i “tekemaot olgeta long wol,” blong oli rul wetem Jisas long gavman ya. (Revelesen 5:9, 10; 14:1, 3, 4; Daniel 2:44; 7:13, 14) Taem oli rulum wol bambae i no moa gat rabis fasin long hem, mo bambae plante milian man we oli ona long God oli stap long hem.—Ol Proveb 2:21, 22.
5. Wol Prija 1:4 i talem se: “Wol bambae i stap gogo i no save finis.” (The New English Bible) Taem God i spolem ol man nogud, bambae wol i kam paradaes mo bambae ol stret man oli stap long hem gogo i no save finis. (Ol Sam 37:10, 11, 29) Olsem nao ol tok ya we Jisas i talem long prea blong hem bambae oli kamtru, hemia se: ‘Olgeta man long wol bambae oli mekem ol samting we God i wantem.’—Matiu 6:10.
6. Ol profet tok long Baebol “God . . . i no save giaman.” (Taetas 1:2) From samting ya, ol samting we hem i talemaot se bambae oli hapen, oltaem oli kamtru. Samting ya i tru tu long saed blong ol profet tok blong Baebol we oli tokbaot en blong wol ya. (Aesea 55:11; Matiu 24:3-14) ?Hu bambae i stap sef long bigfala trabol ya we bambae i kam? 1 Jon 2:17 i talem se: “Man we i stap mekem ol samting we God i wantem, hem bambae i no save lus samtaem.”
7. Ol gavman Jisas i talem se: “Samting we i blong Sisa, yufala i givimbak long Sisa. Mo samting we i blong God, yufala i givimbak long God.” (Mak 12:17) Folem ol tok ya blong Jisas, ol Witnes blong Jeova oli obei long ol loa blong kantri blong olgeta, sipos ol loa ya oli no agensem ol loa blong God.—Ol Wok 5:29; Rom 13:1-3.
8. Wok blong prij Jisas i talemaot se bifo long en blong wol ya, bambae ol man oli talemaot “gud nius ya blong kingdom” long olgeta ples long wol. (Matiu 24:14, NW) Ol Witnes blong Jeova oli tinghae long nambawan janis we oli gat blong mekem wok ya we i save sevem laef blong narafala. Sipos ol man oli lesin no nogat, hemia jus blong olgeta. Baebol i talem se: “Yufala we i wantem dring, yufala i kam tekem wota ya blong laef, we i olsem presen blong yufala.”—Revelesen 22:17.
9. Baptaes Ol Witnes blong Jeova oli baptaesem ol man ya nomo we oli stadi long Baebol, nao oli wantem mekem wok blong God olsem wan Witnes blong hem. (Hibrus 12:1) Oli soemaot se oli givim laef blong olgeta long God taem oli baptaes. Long taem ya, oli draon fulwan long wota. —Matiu 3:13, 16; 28:19.
10. Fasin ya we ol lida blong jos oli hae moa long ol narafala long jos Jisas i talem long ol man blong hem se: “Yufala evriwan i brata.” (Matiu 23:8) Ol faswan Kristin wetem olgeta ya tu we God i yusum olgeta blong raetem Baebol, oli no folem fasin ya se ol lida blong jos oli hae moa long ol narafala long jos. Taswe ol Witnes blong Jeova oli mekem sem mak olsem Baebol i soemaot, oli no putumap wan grup blong ol man we oli lida blong olgeta.
[Futnot]
a Ol Witnes blong Jeova oli no wokem nem ya “Jeova.” Plante handred yia finis, sam lanwis olsem Inglis mo Jemani we oli no olfala lanwis we Baebol i stap long hem fastaem, oli talem nem ya blong God se “Jeova.” Sore tumas, sam man we oli tanem Baebol long taem blong yumi, oli karemaot nem blong God mo oli putum ol tok olsem “God” mo “Masta” long ples blong nem ya. Samting ya i no soemaot respek nating long Jeova we hem i Stamba blong ol tok blong Baebol.
[Tok blong makem poen long pej 8]
“Papa blong mi, . . . hem i hae moa long mi.”—Jon 14:28
[Tok blong makem poen long pej 9]
“Gud nius ya blong kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.”—Matiu 24:14, NW